ភ្នំពេញ៖ នៅតែប៉ុន្មានថ្ងៃទៀត នឹងដល់បុណ្យណូអែល និងបុណ្យឆ្លងឆ្នាំសកល ដែលជាពេលវេលាជួបមនុស្សច្រើន ហើយក៏ជាការបារម្ភពីការឆ្លងរាលដាលជំងឺកូវីដ១៩ បើសិនជាមិនមានវិធានការការពារ និងទប់ស្កាត់ទេនោះ។ ក្នុងពេលជួបជុំកន្លងមក មិនថា នៅតាមហាង តាមរោងបុណ្យ រោងការ ឬក៏ការជួបជុំប្រកួតកីឡាទេ គឺវិធានការ ៣កុំ និង៣ការពារ ពិសេសគម្លាតសុវត្ថិភាព មិនត្រូវបានគោរព និងអនុវត្តឲ្យបានត្រឹមត្រូវឡើយ។
ដើម្បីចូលរួមទប់ស្កាត់ការឆ្លងរាលដាលជំងឺកូវីដ១៩ ក្នុងឱកាសបុណ្យឆ្លងឆ្នាំសកល ក្រសួងទេសចរណ៍ បានចេញសារាចរណែនាំ ស្ដីពី ការរៀបចំគ្រប់គ្រងចរន្តភ្ញៀវទេសចរ និងពង្រឹងគុណភាពផលិតផលទេសចរណ៍។ វិធានការទាំងនោះ រួមមាន៖ ត្រូវជំរុញអនុវត្តឲ្យបានខ្ជាប់ខ្ជួន និងម៉ឹងម៉ាត់នូវវិធានការទាំងឡាយ ដែលបានដាក់ចេញដោយរាជរដ្ឋាភិបាល ក្នុងការទប់ស្កាត់ការរីករាលដាលជំងឺកូវីដ១៩ ពិសេសវិធានការ ៣ការពារ និង ៣កុំ ឲ្យបានខ្ជាប់ខ្ជួន។ ត្រូវពង្រឹងការអនុវត្តវិធានសុវត្ថិភាពទេសចរណ៍ និងនីតិវិធីស្តង់ដារប្រតិបត្តិអប្បបរមា ( SOP ) តាមគន្លងប្រក្រតីភាពថ្មី ដែលត្រូវបានដាក់ឲ្យអនុវត្តដោយក្រសួងទេសចរណ៍ ទៅលើអាជីវកម្មទេសចរណ៍នានា ដើម្បីរក្សាស្ថិរភាពអាជីវកម្ម និងធានាសុវត្ថិភាពជូនដល់ភ្ញៀវទេសចរជាតិ និងអន្តរជាតិ។ ត្រូវជំរុញឲ្យរមណីយដ្ឋាន និងគោលដៅទេសចរណ៍ទាំងអស់ ណែនាំឲ្យភ្ញៀវទេសចរ ស្កេន QR Code ឬធ្វើការកត់ត្រាព័ត៌មានភ្ញៀវទេសចរ ដែលចូលកម្សាន្ត និងប្រើប្រាស់សេវានៅក្នុងកន្លែងរបស់ខ្លួន ជាពិសេសអាសយដ្ឋាន និងលេខទំនាក់ទំនង។
នៅតាមរមណីយដ្ឋាន និងគោលដៅទេសចរណ៍ទាំងអស់ ក៏ត្រូវរៀបចំឲ្យមានការត្រួតពិនិត្យកំដៅ ការបាញ់អាល់កុលសម្លាប់មេរោគ និងមានអាល់កុលសម្រាប់លាងដៃឲ្យបានគ្រប់គ្រាន់ ហើយគ្រប់ទីកន្លែង ដែលចាំបាច់។ ក្នុងនោះ ភ្ញៀវទេសចរ ត្រូវតម្រូវឲ្យពាក់ម៉ាស់ជាប្រចាំ។
នៅតាមរមណីយដ្ឋាន និងគោលដៅទេសចរណ៍នានា ត្រូវកំណត់សមត្ថភាពផ្ទុកអតិបរមា ដែលអាចទទួលភ្ញៀវបាន ក្នុងពេលតែមួយ អនុលោមតាមស្តង់ដាគម្លាតសុវត្ថិភាព និងមិនត្រូវទទួលភ្ញៀវលើសពីចំណុះ ជាដាច់ខាត។ ក្នុងករណីមានការកកកុញលើសពីសមត្ថភាពផ្ទុក មន្ទីរទេសចរណ៍ ត្រូវរាយការណ៍មកក្រសួងទេសចរណ៍ និងរដ្ឋបាលរាជធានីខេត្តជាបន្ទាន់ ដើម្បីមានវិធានការផ្អាកសកម្មភាពរមណីយដ្ឋាន និងគោលដៅទេសចរណ៍នោះ ជាបណ្តោះអាសន្នសិន។
ក្រសួងទេសចរណ៍ ក៏បានកំណត់ថា បុគ្គលិកបម្រើការនៅរមណីយដ្ឋាន និងគោលដៅទេសចរណ៍ទាំងអស់ ត្រូវទទួលបានការចាក់វ៉ាក់សាំង តាមការកំណត់របស់ក្រសួងសុខាភិបាល។ ក្នុងនោះ អាជីវករ និងប្រតិបត្តិករទេសចរណ៍ ក៏ត្រូវពង្រឹងគុណភាពផលិតផលទេសចរណ៍ ថែរក្សាបរិស្ថានអនាម័យ និងរក្សាតម្លៃផលិតផល និងសេវាឲ្យបានសមរម្យ។ រាល់តម្លៃស្នាក់នៅ ម្ហូបអាហារ និងសេវាផ្សេងៗ ត្រូវសរសេរឲ្យបានច្បាស់ដាល់ក្នុងតារាង ដើម្បីជម្រាបជូនភ្ញៀវឲ្យបានដឹងជាមុន ជៀសវាងការកំណត់ថ្លៃខ្ពស់ហួសហេតុ។ ករណីមិនអនុវត្តតាមតារាង ដែលបានបិទផ្សាយ ម្ចាស់មូលដ្ឋានអាជីវកម្ម ត្រូវទទួលខុសត្រូវចំពោះមុខច្បាប់ជាធរមាន។
បុណ្យឆ្លងឆ្នាំសកល ឬ Count Down នាយប់ថ្ងៃទី៣១ ខែធ្នូ ចូលថ្ងៃទី១ ខែមករា ខាងមុខនេះ នឹងធ្វើឡើង ខណៈដែលពិភពលោក ក៏ដូចជា ប្រទេសកម្ពុជាយើង កំពុងប្រឈមនឹងការឆ្លងរាលដាលជំងឺកូវីដ១៩ ប្រភេទអូមីក្រុង។ អូមីក្រុង ដែលមកដល់ថ្ងៃទី១៨ ខែធ្នូ ឆ្នាំ២០២១ នៅកម្ពុជា រកឃើញអ្នកឆ្លង ៤នាក់ហើយ សុទ្ធតែជាអ្នកដំណើរតាមយន្តហោះ មកពីក្រៅប្រទេស។ ក្នុងនោះ មានស្ត្រីខ្មែរម្នាក់ រកឃើញកាលពីថ្ងៃទី១៤ ខែធ្នូ ជាអ្នកដំណើរមកពីប្រទេសហ្គាណា បុរសអ្នកទេសចរជនជាតិអៀរ៉ង់ មកពីកេនយ៉ា រកឃើញកាលពីថ្ងៃទី១៧ ខែធ្នូ និងស្ត្រីខ្មែរ ២នាក់ទៀត ជាអ្នកដំណើរមកពីបារាំង និងអាមេរិក រកឃើញកាលពីថ្ងៃទី១៨ ខែធ្នូ។
ការរកឃើញអ្នកឆ្លងកូវីដ១៩ ប្រភេទអូមីក្រុងជាបន្តបន្ទាប់នេះ ខណៈដែលករណីឆ្លងកូវីដក្នុងប្រទេសយើង បានថយចុះនៅក្រោម ១០នាក់ ក្នុង ១ថ្ងៃ ហើយស្លាប់មានត្រឹមតែ ២នាក់ ទៅ ៣នាក់ ក្នុង ១ថ្ងៃៗ។
យ៉ាងណាក៏ដោយ ចំពោះមុខនៃការរីករាលដាលកូវីដ១៩ ដែលនៅតែបន្តឆ្លង ហើយអូមីក្រុង ក៏ចូលមកជាបន្តបន្ទាប់នេះ ត្រូវបានអ្នកជំនាញសុខាភិបាល លោកស្រីវេជ្ជបណ្ឌិត ឱ វណ្ណឌីន ជឿជាក់ថា យើងទាំងអស់គ្នា អាចធ្វើបាន ក្នុងការទប់ស្កាត់កូវីដ១៩ តាមរយៈវិធានាការ ៣ការពារ ៣កុំ និងការចាក់វ៉ាក់សាំងកូវីដ-១៩។ វិធានការទាំងនេះ នឹងការពារលោកអ្នកពីការវ៉ៃលុកធ្ងន់ធ្ងរលើសុខភាព ពីការចូលសម្រាកពេទ្យ និងពីការស្លាប់បាត់បង់ជីវិត។
ជាមួយគ្នានេះ អ្នកជំនាញសុខាភិបាល ក៏លើកឡើងថា ឆ្នាំ២០២២ នឹងជាឆ្នាំ ដែលវីរុសអូមីក្រុង ដើរហើរពេញពិភពលោក រួមទាំងកម្ពុជាផងដែរ។ ដូច្នេះត្រូវមានការប្រុងប្រយ័ត្នជានិច្ច និងត្រៀមលក្ខណ: ក្នុងការឆ្លើយតបទៅនឹងការផ្ទុះការរាតត្បាតជាយថាហេតុណាមួយ។
អ្នកជំនាញ ក៏បានប្រកាសអំពាវនាវ សូមជូនពរបងប្អូនទាំងអស់គ្នា សូមរីករាយថ្ងៃបុណ្យណូអែល និងថ្ងៃចូលឆ្នាំសាកលថ្មី ឆ្នាំ២០២២ ដែលជាឆ្នាំ យើងត្រូវបន្តរៀនរស់ជាមួយកូវីដ-១៩ ជាពិសេស អូមីក្រុង និងវីរុសបម្លែងថ្មីផ្សេងៗទៀត។ សូមថែទាំសុខភាពបុគ្គលជាទីស្រឡាញ់របស់លោកអ្នក ក្រុមគ្រួសារលោកអ្នក និងសហគមន៍លោកអ្នកឱ្យបានល្អ ពីការចម្លងវីរុសអូមីក្រុង។
ចំណែកបុគ្គលម្នាក់ៗ មិនថា ចាស់ ឬក្មេងទេ ក៏សូមបន្តការពារខ្លួន ដោយអនុវត្តវិធានការសាមញ្ញ ៣កុំ និង៣ការពារ ហើយចូរកុំភ្លេចថា ទោះបីជាអ្នកចាក់វ៉ាក់សាំងបង្ការជំងឺកូវីដ១៩ រួចហើយ រហូតដល់ទៅ ៣ដូសក៏ដោយ ក៏អ្នកនឹងនៅតែអាចឆ្លងកូវីដ១៩ ដែរ បើសិនជាធ្វេសប្រហែស ជាពិសេសអំឡុងពេលជួបជុំទទួលទានអាហារ និងការជួបជុំផឹកស៊ី៕
អត្ថបទសរសេរ ដោយ
អត្ថបទសរសេរ ដោយ
ចែករំលែកព័តមាននេះ