អ្នកកាសែតដល់៤៨៨នាក់ជាប់ឃុំឃាំងក្នុងឆ្នាំ២០២១
ក្នុងរបាយការណ៍ប្រចាំឆ្នាំរបស់ខ្លួនចេញផ្សាយកាលពីថ្ងៃទី១៤ធ្នូកន្លងទៅអង្គការអ្នកកាសែតគ្មានព្រំដែនRSF មានមូលដ្ឋាននៅបារាំងអះអាងថា
ប្រទេសបារាំង ៖ ក្នុងរបាយការណ៍ប្រចាំឆ្នាំរបស់ខ្លួនចេញផ្សាយកាលពីថ្ងៃទី១៤ធ្នូកន្លងទៅអង្គការអ្នកកាសែតគ្មានព្រំដែនRSF មានមូលដ្ឋាននៅបារាំងអះអាងថា ជាមួយអ្នកកាសែត៤៨៨នាក់ជាប់ឃុំឃាំងលើពិភពលោក ឆ្នាំ២០២១ ពិតជាឆ្នាំដែលមានអ្នកកាសែតជាប់ឃុំឃាំងច្រើនបំផុតពុំធ្លាប់មាន។
ក្នុងរបាយការណ៍នោះRSF ក៏លើកដែរថា ក្នុងឆ្នាំ២០២១អ្នកកាសែតដែលត្រូវស្លាប់មានត្រឹម៤៦នាក់ ដែលនោះជាតួលេខទាបបំផុត ពុំធ្លាប់មានចាប់តាំងពី២០ឆ្នាំមកហើយ។ ចំនួនអ្នកកាសែតជាប់ឃុំឃាំងច្រើនបែបនេះ មានជាលើកដំបូងចាប់តាំងពីបង្កើតតុល្យការប្រចាំឆ្នាំរបស់RSF ពីឆ្នាំ១៩៩៥មក។ ការកើនឡើងខ្ពស់នេះនៃចំនួនអ្នកកាសែតជាប់ឃុំឃាំងដែលមានខ្ទង់២០%ក្នុង១ឆ្នាំ គិតចាប់ពីថ្ងៃទី១មករាដល់ថ្ងៃទី១ធ្នូ មានជាពិសេសក្នុងប្រទេស៣គឺ មីយ៉ាន់ម៉ា បេឡារុសនិងចិន ដែលច្បាប់ស្ដីពីសន្តិសុខជាតិនៅហុងកុង នាំឲ្យមានការកើនខ្ព្ស់នៃចំនួនអ្នកកាសែតត្រូវជាប់ឃុំឃាំំង ក្នុងដែនដីអតីតអាណានិគមអង់គ្លេសនោះ។ តែនៅតំបន់សីុនជាំងដែលនៅទីនោះមានការបង្ក្រាប ពួកបំបែកខ្លួននិយមនៃជនជាតិភាគតិចអ៊ួយហ្កួរ អ្នកកាសែតអ៊ួយហ្គួរដល់៧០នាក់កំពុងជាប់ឃុំឃាំង។
ប្រទេស៥ដែលមានការឃុំឃាំងអ្នកកាសែតច្រើនមកដល់ថ្ងៃទី១ធ្នូ មានចិន១២៧នាក់ មីយ៉ាន់ម៉ា៥៣នាក់ វៀតណាម៤៣នាក់ បេឡារុស៣២នាក់និងអារ៉ាប៊ីសាអូឌីត៣១នាក់។ ពុំធ្លាប់មានសោះដែលRSFកំណត់ឃើញអ្នកកាសែតនារីជាប់ឃុំឃាំងច្រើន ដល់សរុប៦០នាក់ពោលត្រូវជា១ភាគ៣លើសកាលពីឆ្នាំ២០២០។ ខណៈបុរសនៅតែតំណាងឲ្យអ្នកកាសែតជាប់ឃុំឃាំងច្រើនលើពិភពលោកដល់៨៧,៧%តែ បេឡារុសជាប្រទេសដែលមានអ្នកកាសែតជានារីជាប់ឃុំឃាំងច្រើន ដល់១៧នាក់លើសអ្នកកាសែតបុរសដែលមានត្រឹម១៥នាក់។
ផ្ទុយទៅវិញRSFលើកពីនិន្នាការវិជ្ជមានដែលចំនួនអ្នកកាសែតស្លាប់មានទាបបំផុតពុំធ្លាប់មានចាប់តាំងពី២០ឆ្នាំមកហើយ។ និន្នាការចុះថយនេះមានចាប់ពីឆ្នាំ២០១៦មក ដោយសារពិសេសមកពីការវិវត្តិនៃបណ្ដាជម្លោះតំបន់ ដូចជានៅសីុរី អីុរ៉ាក់និងយេម៉ែន។
តាមរបាយការណ៍ប្រចាំឆ្នាំនេះ ប្រទេសម៉ិកស៊ិកនិងអាហ្វហ្គានីស្ថាន នាឆ្នាំនេះនៅតែជាប្រទេស២ ដែលមានគ្រោះថ្នាក់បំផុតសម្រាប់អ្នកកាសែត ដោយនៅម៉ិកស៊ិកមានស្លាប់៧នាក់និងអាហ្វហ្គានីស្ថាន៦នាក់ បន្ទាប់គឹយេម៉ែននិងឥណ្ឌាដែលស្ថិតក្នុងលំដាប់ថ្នាក់ទី៣ដូចគ្នា ជាមួយអ្នកកាសែតស្លា.ប់៤នាក់ដូចគ្នា៕ ដកស្រង់ចេញពីវេបសាយ ៖ yahoo
ចែករំលែកព័តមាននេះ