រាជធានីភ្នំពេញ ៖ បន្ទាប់ពីសហព័ន្ធកីឡាប្រដាល់គុនខ្មែរប្រកាសឱ្យដឹងពីប្រធានសហព័ន្ធនិងមន្ត្រីក្នុងអាណ្ណត្តិថ្មី ដែលខាងសហ
រាជធានីភ្នំពេញ ៖ បន្ទាប់ពីសហព័ន្ធកីឡាប្រដាល់គុនខ្មែរប្រកាសឱ្យដឹងពីប្រធានសហព័ន្ធនិងមន្ត្រីក្នុងអាណ្ណត្តិថ្មី ដែលខាងសហព័ន្ធអះអាងថា ជាមន្ត្រីអាណ្ណត្តិថ្មីដែលកើតចេញពីការបោះឆ្នោតនោះ លោក រាជ សូផែន ដែលជាអគ្គលេខាធិការរងក្នុងអាណ្ណត្តិចាស់កាលពីថ្ងៃទី១២ ធ្នូ បានបង្ហោះភ្ជាប់នឹងបញ្ជីឈ្មោះដែលទើបបានបង្ហាញថា«លទ្ធផលបោះឆ្នោតជ្រើសរើសគណៈកម្មាធិការប្រតិបត្តិសហព័ន្ធកីឡាប្រដាល់គុនខ្មែរអាណត្តិទី៧(២០២១ -២០២៥)កាលពីថ្ងៃទី១០ ខែធ្នូ ឆ្នាំ២០២១ បានធ្វើឡើងដោយការចាប់បង្ខំ និងសម្រេចដោយភាពតក់ក្រហល់។
លទ្ធផលមិនឯកច្ឆន្ទដោយសមាជិកមួយចំនួនមិនលើកដៃឯកភាពឡើយ ព្រោះនេះជាការរៀបចំទុកជាមុនដោយលក្ខណៈបក្សពួកនិយម ។ ខ្ញុំខិតខំស្ទើរមួយជីវិតដើម្បីគុនខ្មែរ ប៉ុន្តែគ្មានន័យអ្វីដូចបក្សពួកអែបអបឡើយ ។ ឱគុនខ្មែរអើយតើឆ្នាំ២០២៣ក្នុងនាមជាម្ចាស់ផ្ទះទៅជាយ៉ាងណា? បើផ្ទៃក្នុងដឹកនាំសហព័ន្ធ កំពុងតែរកាំរកូសគ្នាចាប់ពីពេលនេះទៅហើយនោះ»។
ក្នុងឯកសារលោក រាជ សូផែន បង្ហោះ ក៏បានសរសេរនៅក្បាលខាងលើថា«ការបញ្ចប់អាណ្ណត្តិទី៦ (2016-2021) និងលទ្ធផលបោះឆ្នោតជាកញ្ចប់ ដើម្បីរៀបចំគណៈកម្មការប្រតិបត្តអាណ្ណត្តិទី៧ (2021-2025) របស់សហព័ន្ធគុនខ្មែរ កាលពីថ្ងៃទី១០ ធ្នូ ឆ្នាំ២០២១ ប្រកបដោយភាពចម្រូងចម្រាស មិនចុះសម្រុងគ្នា ព្រោះលទ្ធផលនេះ បញ្ចប់ដោយភាពតក់ក្រហល់ជាទីបំផុត(លទ្ធផលមិនឯកច្ឆន្ទ)ការរៀបចំសមាសភាពដឹកនាំមិនតម្លាភាព បក្សពួកនិយម ហើយបានធ្វើអោយមនុស្សមួយចំនួន ក្នុងជួរដឹកនាំសហព័ន្ធមិនពេញចិត្តតាមការរៀបចំរចនាសម្ព័ន្ធនេះឡើយ(តើវាសនាគុនខ្មែរ ឆ្ពោះទៅស៊ីហ្គេម២០២៣ ក្នុងនាមជាម្ចាស់ផ្ទះនឹងទៅជាយ៉ាងណា)។ ក្រោយការបង្ហោះរបស់លោក គឺមានការបញ្ចេញមតិជាច្រើន។
ម្ចាស់គណនីហ្វេសប៊ុកឈ្មោះ ផល បាយ័ន ដែលអះអាងថា ជាអតីតគណៈកម្មការក្នុងវិស័យនេះ បានសរសេរបង្ហោះថា«ខ្ញុំមិនចង់ដឹង មិនចង់ឮ ប្រដាល់គុនខ្មែរ ព្រោះដើរចេញយូរហើយ។ ចង់សួរថា មុខតំណែងបោះឆ្នោតមន្ត្រីសហព័ន្ធគុនខ្មែរ មុខតំណែងខ្លះ មានអ្នកនាំចូល អ្នកនាំចេញ ហើយមានប្អូនធម៌ បងធម៌ និងបងប្អូនថ្លៃទៀត ចឹងបោះឆ្នោតធ្វើអី នៅតែមិនយល់។ លោកគ្រូៗដឹងបកស្រាយផង អរគុណទុកមុន»។
ជាមួយនឹងការចោទថា គណៈកម្មការដែលទើបបោះឆ្មោតថ្មី គឺជាការរៀបចំទុក ហើយជាមន្ត្រីដែលគណៈកម្មការភាគច្រើនខាងក្នុងមិនពេញចិត្ត គេមិនទាន់ឃើញឯកឧត្តម តែម ម៉ឺន និងមន្ត្រីធំៗ ក្នុងអាណ្ណត្តិថ្មី ចេញមុខបកស្រាយឡើយ គឺស្ងាត់ឈឹងនៅឡើយ ស្របពេលដែលអ្នកតាមដានច្រើនឡើងបង្ហាញប្រតិកម្មចំពោះលទ្ធផលបោះឆ្នោតនោះ។
លោក វីជេ ហេរ៉ូ អ្នកអត្ថាធិប្បាយប្រដាល់ បានប្រកាសថា នឹង Live រិះគន់លើករណីនេះ។
លោកបានសរសេរភ្ជាប់នឹងសំណេររបស់លោកគ្រូរាជ សូផែន ថា «ខ្ញុំថាមែនៗ ថាអីចេះខុស ប្រាប់ហើយមិនជឿ តែគេទ្រាំលែងបានគឺវាអញ្ចឹងឯង ចាំមើលថាតើមានអ្នកតស៊ូជាមួយគុនខ្មែរណាខ្លះទៀតចេញមុខពន្លះបែបនេះ តើបងប្អូនចង់អោយខ្ញុំសម្ភាសន៍ជាមួយលោកគ្រូទេ ចង់អោយខ្ញុំ Live ទេ?»។
លោកបន្តថា មកទល់ពេលនេះ ការរិះគន់ចំពោះសមាសភាពក្នុងអាណ្ណត្តិថ្មីរបស់សហព័ន្ធប្រដាល់គុនខ្មែរ កាន់តែបង្កការចាប់អារម្មណ៍ ។ ការរិះគន់ក៏កំពុងធ្វើឱ្យមានការរំពឹងថា អាចនឹងធ្វើឱ្យរង្គោះរង្គើដល់សមាសភាពដែលទើបជាប់ឆ្នោតផងដែរ បន្ទាប់ពីអ្នកមិនពេញចិត្តច្រើនឡើងហ៊ានលើកឡើងពីករណីនេះ និងបានបន្តការចោទថា នេះគឺជាសមាសភាពដែលកើតចេញពីបក្សពួក និងខ្សែបណ្ដាញ ហើយមិនបានផ្ដល់ឱកាសអោយអ្នកមានសមត្ថភាព និងមន្ត្រីដែលតស៊ូពិតប្រាកដ ៕
ចែករំលែកព័តមាននេះ