រាជធានីភ្នំពេញ ៖ រាជរដ្ឋាភិបាលកម្ពុជាបានសម្រេចបង្កើត «ឯកសណ្ឋានគោរមងារផ្លូវការជូនអ្នកឧកញ៉ា និងឧកញ៉ា» នៅប្រទេសកម្ពុជា ដែលឯកសណ្ឋាន សញ្ញាស័ក្តិ មេដាយ និងបន្តោងខ្សែក…
រាជធានីភ្នំពេញ ៖ រាជរដ្ឋាភិបាលកម្ពុជាបានសម្រេចបង្កើត «ឯកសណ្ឋានគោរមងារផ្លូវការជូនអ្នកឧកញ៉ា និងឧកញ៉ា» នៅប្រទេសកម្ពុជា ដែលឯកសណ្ឋាន សញ្ញាស័ក្តិ មេដាយ និងបន្តោងខ្សែក របស់អ្នកឧកញ៉ា និងឧកញ៉ា ត្រូវប្រើប្រាស់ក្នុងពេលចូលរួមពិធីបុណ្យជាតិ បុណ្យប្រពៃណីជាតិ និងពិធីផ្លូវការផ្សេងៗ ។
យោងតាមអនុក្រឹត្យចុះថ្ងៃទី ១៥ ខែវិច្ឆិកា ឆ្នាំ២០២១ និងចុះហត្ថលេខាដោយសម្តេចតេជោ ហ៊ុន សែន នាយករដ្ឋមន្ត្រីកម្ពុជា មានចំនួន ១១ មាត្រា បានបែងចែកយ៉ាងច្បាស់លាស់អំពីឯកសណ្ឋានសម្រាប់គោរមងារ អ្នកឧកញ៉ា និងឧកញ៉ា ។
មាត្រា ១០ នៃអនុក្រឹត្យបានចែងថា «ឯកសណ្ឋានគោរមងារផ្លូវការ សញ្ញាស័ក្តិ មេដាយ និងបន្តោងខ្សែក សម្រាប់ពាក់លើឯកសណ្ឋានគោរពងារអ្នកឧកញ៉ា និងឧកញ៉ា ត្រូវបានពិនិត្យ និងរៀបចំ និងផ្តល់ជូនតាមគោលការណ៍កំណត់របស់សមាគមមូលនិធិសម្តេចតេជោ ដើម្បីអភិវឌ្ឍន៍សហគ្រាសធុនតូច និងមធ្យមនៅកម្ពុជា» ។
មាត្រា ១១ នៃអនុក្រឹត្យបានចែងផងដែរថា «ឯកសណ្ឋានគោរមងារផ្លូវការ អ្នកឧកញ៉ា និងឧកញ៉ាទាំងអស់ក្នុងព្រះរាជណាចក្រកម្ពុជា និងជាប្រធាន អនុប្រធាន សមាជិកក្រុមប្រឹក្សាភិបាល និងសមាជិកសមាគមនមូលនិធិ សម្តេចតេជោ ដើម្បីអភិវឌ្ឍន៍សហគ្រាសធុនតូច និងមធ្យមនៅកម្ពុជា សម្រាប់ប្រើប្រាស់ក្នុងពេលចូលរួមក្នុងពិធីបុណ្យជាតិ បុណ្យប្រពៃណីជាតិ និងពិធីផ្លូវការផ្សេងៗ» ។
ជាមួយគ្នានោះផងដែរ រាជរដ្ឋាភិបាលក៏បានធ្វើការព្រមានថា «ជនណាដែលបានប្រើប្រាស់ ឬក្លែងបន្លំឯកសណ្ឋានគោរមងារផ្លូវការ សញ្ញាស័ក្តិ មេដាយ និងបន្តោងខ្សែក សម្រាប់ពាក់លើឯកសណ្ឋានគោរមងារអ្នកឧកញ៉ា និងឧកញ៉ា ត្រូវផ្តន្ទាទោសទៅតាមច្បាប់ជាធរមាន៕
ចែករំលែកព័តមាននេះ