ខេត្តបន្ទាយមានជ័យ ៖ ដីព្រៃលិចទឹកតំបន់ដែលត្រូវបានគេទន្ទ្រានយកមានផ្ទៃដីចំនួនជាង៧ពាន់ហិកតា ដែលក្នុងនោះកំពុងអាស្រ័យផលស្រូវចំនួនជាង១០០ហិកតា ស្ថិតក្នុងភូមិសាស្រខេត្តបន្ទាយមានជ័យ ។ លោក ឈុំ ឆាន អភិបាលរងស្រុកមង្គលបូរីបានប្រាប់កាលពីថ្ងៃទី១៣…
ខេត្តបន្ទាយមានជ័យ ៖ ដីព្រៃលិចទឹកតំបន់ដែលត្រូវបានគេទន្ទ្រានយកមានផ្ទៃដីចំនួនជាង៧ពាន់ហិកតា ដែលក្នុងនោះកំពុងអាស្រ័យផលស្រូវចំនួនជាង១០០ហិកតា ស្ថិតក្នុងភូមិសាស្រខេត្តបន្ទាយមានជ័យ ។
លោក ឈុំ ឆាន អភិបាលរងស្រុកមង្គលបូរីបានប្រាប់កាលពីថ្ងៃទី១៣ ធ្នូ ថា នៅស្រុកមង្គលបូរី មានឃុំសំបួរ ដែលត្រូវទន្ទ្រានយកដីព្រៃលិចទឹកតំបន់បីបឹងទន្លេសាបជាង២០០ហិកតា ហើយមានប្រមាណជាង១០០ហិកតាដែលត្រូវបានអាស្រ័យផលស្រូវដែលមានដើមដង។
លោក ឃូរ ពៅ អភិបាលស្រុកព្រះនេត្រព្រះថា ស្រុកព្រះនេត្រព្រះមានឃុំប្រាសាទ និងឃុំភ្នំលៀប ដែលត្រូវបានទន្ទ្រានយកដីព្រៃលិចទឹកតំបន់បីបឹងទន្លេសាបជាង៥.០០០ហិកតា ហើយរហូតពេលនេះមិនទាន់មានអាស្រ័យផលនៅឡើយទេ ព្រោះទឹកមិនទាន់ស្រកនៅឡើយរាល់ឆ្នាំនៅអំឡុងខែធ្នូ និងខែមករា ទើបបានអាស្រ័យ។
គួររំលឹកថា សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានដាក់បទបញ្ជាដើម្បីបង្ក្រាបទប់ស្កាត់ការរុករានទន្ទ្រានព្រៃលិចទឹកតំបន់បីបឹងទន្លេសាបឯកឧត្តម ឧបនាយករដ្ឋមន្ត្រី ជា សុផារ៉ា រដ្ឋមន្ត្រីក្រសួងរៀបចំដែនដីនគរូបណីយ៍កម្ម សំណង់និងសូរិយោដីបានដឹកនាំក្រុមការងារចុះពិនិត្យព្រៃលិចទឹកតំបន់បីបឹងទន្លេសាប និងខេត្តបានចុះពិនិត្យនិងស្រាវជ្រាវ ហើយលើកប៉ាណូភូមិសាស្គ្រតំបន់៣ខេត្តបន្ទាយមានជ័យនិងដាក់បង្គោលដែលបាត់និងបាក់ដែលបានបោះដោយថ្នាក់ជាតិនិងខេត្ត។
ខេត្តបន្ទាយមានជ័យមានស្រុកចំនួន២មានស្រុកមង្គលបូរី និងស្រុកព្រះនេត្រព្រះដែលជាប់ដីព្រៃលិចទឹកតំបន់៣បឹងទន្លេសាបដែលមានផ្ទៃដី១២.២៩៧ហិកតា ត្រូវបានរុករានទន្ទ្រានយកដីព្រៃលិចទឹកតំបន់៣មានចំនួន៧.៨៣៤ហិកតាដែលមានប្រជាពល រដ្ឋទន្ទ្រាន៤៣៩នាក់មានប្រជាពលរដ្ឋមូលដ្ឋានចំនួន៤១៩នាក់ស្មើផ្ទៃដី៣.៦០៨ហិកតា និងប្រជាពលរដ្ឋក្រៅស្រុកចំនួន២០នាក់ ៣៣២ហិកតា។
ព័ត៌មានដែលទទួលបានពីប្រជាពលរដ្ឋដែលអាស្រ័យផលលើដីតំបន់៣ គឺប្រជាពលរដ្ឋមួយចំនួនធំបានជួលដីអាស្រ័យផល និងមួយចំនួនតូចបានទន្ទ្រានយកធ្វើដោយខ្លួនឯង ហើយអ្នកដែលបានរុករានទន្ទ្រាន់ព្រៃលិចទឹកតំបន់៣ មិនដែលមានប្រជាពលរដ្ឋណាមួយហ៊ានទន្ទ្រានឡើយ ភាគច្រើនជាមន្ត្រី និងអ្នកមានបុណ្យស័ក្តិ ដែលរុករានទន្ទ្រានហើយជួលអោយប្រជាពល រដ្ឋអាស្រ័យផល៕
ចែករំលែកព័តមាននេះ