រាជធានីភ្នំពេញ ៖ ទិវារត់ប្រណាំងភ្នំពេញពាក់កណ្ដាលម៉ារ៉ាតុងអន្តរជាតិ លើកទី៦ ឆ្នាំ២០១៦ នឹងត្រូវធ្វើឡើងនៅមុខព្រះបរមរាជវាំង នាថ្ងៃទី១២ មិថុនា ខាងមុខនេះហើយ។
លោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា
រាជធានីភ្នំពេញ ៖ ទិវារត់ប្រណាំងភ្នំពេញពាក់កណ្ដាលម៉ារ៉ាតុងអន្តរជាតិ លើកទី៦ ឆ្នាំ២០១៦ នឹងត្រូវធ្វើឡើងនៅមុខព្រះបរមរាជវាំង នាថ្ងៃទី១២ មិថុនា ខាងមុខនេះហើយ។
លោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា បានមានប្រសាសន៍ឱ្យដឹងតាមរយៈសន្និសីទសារព័ត៌មាននៅទីស្នាក់ការគណៈកម្មាធិការជាតិអូឡាំពិកកម្ពុជា កាលពីថ្ងៃទី២៣ ឧសភា កន្លងមកនេះថា ទិវារត់ប្រណាំងភ្នំពេញពាក់កណ្ដាលម៉ារ៉ាតុងនេះ ត្រូវបានរៀបចំឡើងជារៀងរាល់ឆ្នាំ ក្នុងគោលបំណងអបអរសាទរព្រះរាជពិធីបុណ្យចម្រើនព្រះជន្ម សម្ដេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ និងអបអរសាទរទិវាអូឡាំពិកលើកទី១២២ ពិសេសរត់ដើម្បីបរិស្ថានទីក្រុងស្អាត ទីក្រុងបៃតង ហើយក៏មានគោលដៅប្រមូលមូលនិធិជួយដល់មន្ទីរពេទ្យគន្ធបុប្ផាផងដែរ ។
គណៈកម្មាធិការជាតិអូឡាំពិកកម្ពុជា ប្រកាសបើកទូលាយដើម្បីឱ្យមានអ្នកចូលរួមរត់ឱ្យបានច្រើនកុះករ ដើម្បីរួមចំណែកក្នុងសកម្មភាពសង្គម និងធ្វើឱ្យទិវានេះទទួលបានជោគជ័យ ។ មកទល់ពេលនេះ មានអ្នកចុះឈ្មោះចូលរួមប្រកួតជាង១.០០០នាក់ហើយ ក្នុងនេះជនបរទេសមានចំនួនប្រហែលជា១០០នាក់ មកពី២៧ប្រទេស ។ លោកសង្ឃឹមថា ទម្រាំដល់ថ្ងៃប្រកួត នឹងមានអ្នកមកចុះឈ្មោះមិនចាញ់ឆ្នាំមុនឡើយ ដែលឆ្នាំមុនទាំងបរទេស និងកម្ពុជាមានចំនួនជិត៤.០០០នាក់ ។ ចំពោះតម្លៃចុះឈ្មោះរត់ចម្ងាយផ្លូវ២១គីឡូម៉ែត្រ ជនបរទេសបង់់៤០ដុល្លារអាមេរិក កម្ពុជាបង់១៥ដុល្លារ ។ រត់ចម្ងាយ១០គីឡូម៉ែត្រ ជនបរទេសបង់៣០ដុល្លារ កម្ពុជាបង់១០ដុល្លារ និង៣គីឡូម៉ែត្រជនបរទេសបង់១០ដុល្លារ កម្ពុជាបង់តែ៥ដុល្លារ ។ ចំណែកទីតាំងចុះឈ្មោះមាននៅមុខព្រះបរមរាជវាំង គណៈកម្មាធិការជាតិអូឡាំពិកកម្ពុជា ក្រុមហ៊ុនស្មាត និងហាងលក់ស្បែងជើងSKECHERS ក្នុងសង្កាត់ទន្លេបាសាក់ ។ លោកវ៉ាត់ ចំរើន បានបញ្ជាក់បន្ថែមទៀតថា ទិវារត់ប្រណាំងនេះផ្ដោតសំខាន់ ទៅលើការប្រមូលមូលនិធិជួយដល់មន្ទីរពេទ្យគន្ធបុប្ផាឱ្យបានច្រើន ។ កាលពីឆ្នាំ២០១៥កន្លងទៅ យើងមានថវិកាចំនួន៥.០០០ដុល្លារនៅក្នុងដៃរួចហើយ ។ ដូច្នេះ ឆ្នាំនេះ យើងសង្ឃឹមថា នឹងប្រមូលបានប្រហែល៥.០០០ដុល្លារ ឬក៏ច្រើនជាងនេះ ដើម្បីយកទៅជូនដល់មន្ទីរពេទ្យគន្ធបុប្ផា ៕
ចែករំលែកព័តមាននេះ