ក្តីប្រាថ្នារបស់ក្លិបបិសាចក្រហម Man Utd គ្រងពានជើងឯក FA Cup លើកទី១២របស់ខ្លួនបានក្លាយជាការពិតទាំងព្រលឹងចុងសក់ បន្ទាប់ពីបានបំបាក់ក្លិបឥន្ទ្រីកំណាច Crystal Palace វគ្គផ្តាច់ព្រ័ត្រក្នុងលទ្ធផល២-១ក្នុងម៉ោងបន្ថែមកាលពីរាត្រីថ្ងៃសៅរ៍កន្លងទៅ នៅពហុកីឡដ្ឋាន Wembley ចក្រភពអង់គ្លេស ។
នៅក្នុងការប្រកួតនេះ គេសង្កេតឃើញថាកីឡាករក្លិបទាំងពីរបានព្យាយាមរកឱកាសស៊ុតបញ្ចូលទីគ្នារៀងៗខ្លួន តែធ្វើមិនបានសម្រេចឡើយក្នុងតង់ទី១ ។ លទ្ធផលស្មើ១-១ក្នុងតង់ទី២ បានធ្វើឱ្យក្លិបទាំងពីរឈានដល់ម៉ោងបន្ថែម។ សំឡេងហ៊ោកញ្ជ្រៀវចេញពីអ្នកគាំទ្រក្លិបបិសាចក្រហម បានផ្ទុះឡើងបន្ទាប់ពីខ្សែបម្រើJesse Lingardស៊ុតបំប៉ោងសំណាញ់ទីក្លិបCrystal Palace នៅនាទីទី១១០ បើទោះបីជាក្រុមរបស់ខ្លួនសល់កីឡាករតែ១០នាក់ក៏ដោយ ។
សូមរំលឹកថា ក្លិប Man Utd បានគ្រងជាម្ចាស់ជើងឯក FA Cup លើកចុងក្រោយក្នុងឆ្នាំ ២០០៤ក្រោមការដឹកនាំរបស់អតីតគ្រូបង្វឹកលោក Alex Ferguson ខណៈប៉ះជាមួយក្លិប Millwall ក្នុងលទ្ធផលឈ្នះ៣-០ ។
គ្រូបង្វឹកក្លិបបិសាចក្រហម Van Gaal បានសម្តែងអារម្មណ៍រំភើបរីករាយ បន្ទាប់ពីការប្រកួតត្រូវបានបញ្ចប់ដោយនិយាយថា៖ “នេះជាជ័យជម្នះដ៏ប្រពៃមួយដែលយើងទទួលបានសម្រាប់ក្លិប ហើយក៏សម្រាប់អ្នកគាំទ្ររបស់យើងផងដែរ ។ បើទោះបីជាយើងមានកីឡាករត្រឹមតែ១០នាក់ក៏ដោយ ក៏យើងនៅតែអាចបំបែករនាំងការពារគូប្រកួតបានដែរ៕
ចែករំលែកព័តមាននេះ