ទីបំផុត! គ្រូបង្វឹកកម្ពុជា មាស ចាន់ណា និងគ្រូបង្វឹកកូរ៉េ Lee Tae Hoon ប៉ះគ្នាជាថ្មី
- ភ្នំពេញ
រាជធានីភ្នំពេញ ៖ ក្រោយក្លិបបាល់ទាត់វិសាខាប្រកាសតែងតាំង លោក Lee Tae Hoonជាគ្រូបង្គោលថ្មីសម្រាប់ក្លិបត្រៀមប្រកួត
រាជធានីភ្នំពេញ ៖ ក្រោយក្លិបបាល់ទាត់វិសាខាប្រកាសតែងតាំង លោក Lee Tae Hoonជាគ្រូបង្គោលថ្មីសម្រាប់ក្លិបត្រៀមប្រកួត
រាជធានីភ្នំពេញ ៖ ក្រោយក្លិបបាល់ទាត់វិសាខាប្រកាសតែងតាំង លោក Lee Tae Hoonជាគ្រូបង្គោលថ្មីសម្រាប់ក្លិបត្រៀមប្រកួតរដូវកាល២០២២ ខាងមុខ ធ្វើអោយគេមើលឃើញភ្លាមៗថា កំពុងផ្ដល់ឱកាសអោយគ្រូបង្វឹកល្បីឈ្មោះ២រូបនៅក្នុងវិស័យបាល់ទាត់កម្ពុជា គឺលោក មាស ចាន់ណា ដែលទើបត្រូវបានតែងតាំងជាអ្នកចាត់ការ និងលោក Lee Tae Hoonប៉ះគ្នាក្នុងក្រុមតែមួយ បន្ទាប់ពីអ្នកទាំងពីរធ្លាប់ធ្វើការរួមគ្នាក្នុងក្រុមជម្រើសជាតិ ហើយក្រោយមក ក៏ចែកជើងគ្នាបំពេញភារកិច្ចរៀងៗខ្លួន។
ការប្រកាសតែងតាំងលោក Lee Tae Hoon អតីតគ្រូបង្វឹកក្រុមជម្រើសជាតិកម្ពុជា អោយក្លាយជាគ្រូបង្គោលប្រចាំក្លិបនេះ បានធ្វើអោយក្លិបវិសាខា ក្លាយជាក្លិបបាល់ទាត់អភិជនតែមួយគត់ ដែលមានលទ្ធភាពយកគ្រូបង្វឹកល្បីៗ នៅក្នុងវិស័យបាល់ទាត់ ដើម្បីជួយក្រុមអោយកាន់តែលេចធ្លោ ។ វត្តមានរបស់លោក Lee Tae Hoon គឺតែប៉ុន្មានថ្ងៃប៉ុណ្ណោះ ក្រោយក្លិបអ្នកមានមួយនេះ បានតែងតាំងលោក មាស ចាន់ណា អតីត គ្រូបង្វឹកណាហ្គាវើលដ៍អោយក្លាយជាអ្នកចាត់ការក្នុងរដូវកាលថ្មី ។
អ្នកទាំងពីរមិនគ្រាន់តែជាជើងខ្លាំងដែលស្ទួយវិស័យបាល់ទាត់ដែលមានការទទួលស្គាល់តែម្យ៉ាងទេ កាលពីពេលថ្មីៗនេះ គឺមុនវត្តមានអ្នកទាំងពីរកាលប៉ុន្មានខែមុន ក្លិបវិសាខា ក៏បានតែងតាំងលោក ភា សុភ័ក្ត្រា ដែលជាអ្នកជំនាញបាល់ទាត់ អោយក្លាយជាអ្នកវិភាគដើម្បីជួយក្រុមក្នុងការពង្រឹងយុទ្ធសាស្ត្រផងដែរ ។ អ្នកគាំទ្រច្រើនណាស់ កំពុងចាប់អារម្មណ៍ថា ក្លិបចំណូលថ្មីក្នុងលីគ
កំពូលកម្ពុជា វិសាខា កំពុងក្លាយជាក្លិបដែលរឹងមាំ ជាងគេ ទាំងផ្នែកកីឡាករ ក្រុមគ្រូបង្វឹក និង ហិរញ្ញវត្ថុ ដោយចាប់តាំងពីបានបង្ហាញខ្លួន គឺក្លិបមួយនេះ បោះទុនយ៉ាងច្រើនបង្កើតតារាងផ្ទាល់ខ្លួន ទិញកីឡាករឆ្នើមៗ និងចុងក្រោយនេះ គឺឈានដល់ការផ្ដល់ប្រាក់ខែដ៏ខ្ពស់ដើម្បីយកគ្រូបង្វឹកល្បីៗអោយមកជួយក្រុម ។
ការប្រកាសរបស់ក្លិប បង្ហាញយ៉ាងច្បាស់ថា លោក Lee Tae Hoon និងលោក មាស ចាន់ណា មានឱកាសធ្វើការជាមួយគ្នាជាថ្មីទៀតហើយ បើងាកទៅគ្រាមុនដែលអ្នកទាំងពីរ ធ្លាប់ធ្វើការជាមួយគ្នា នៅក្រុមជម្រើសជាតិក្នុងពេលលោកគ្រូបង្វឹកជនជាតិកូរ៉េខាងត្បូងធ្វើជាគ្រូ បង្គោល ហើយលោក មាស ចាន់ណា ធ្វើជាគ្រូជំនួយ ។ ម្នាក់ៗនិយាយថា ជំនួបគ្រូបង្វឹកដ៏ឆ្នើមទាំងពីរពិតជាធ្វើអោយក្លិបបាល់ទាត់វិសាខា ឈរជើងកាន់តែលេចធ្លោសម្រាប់ការប្រកួត ហើយផ្អែកតាមស្នាដៃដែលលេចធ្លោស្រាប់ គឺឱកាសកាន់ពានជើងឯកសម្រាប់លីគកំពូលកម្ពុជា ក្នុងឆ្នាំ២០២២ គឺមិនឆ្ងាយពីដៃនោះឡើយ ។
លោក Lee Tae Hoon ធ្លាប់ដឹកនាំក្រុមជម្រើសជាតិកម្ពុជា ពីរ ដង ពោលគឺលើកទី១ ចាប់ពីឆ្នាំ២០១០ ដល់ឆ្នាំ២០១២ និងលើកទី២ ចាប់ពីឆ្នាំ ២០១៣ ដល់ឆ្នាំ២០១៧ ។ បន្ទាប់មក លោកបានទៅធ្វើ ជានាយកបច្ចេកទេសនៅក្លិប Hoang Anh Gia Lai FC របស់ប្រទេសវៀតណាម និងជាគ្រូជំនួយ ជម្រើសជាតិវៀតណាម ហើយចុងក្រោយនៅឆ្នាំ ២០២១ នេះ ដឹកនាំក្រុមក្រសួងការពារជាតិ មុន ពេលត្រូវបានតែងតាំងជាគ្រូបង្គោលក្លិបវិសាខា។
ដោយឡែកលោក មាស ចាន់ណាវិញ មានបទពិសោធន៍ក្នុងវិស័យបាល់ទាត់ប្រមាណ ២០ឆ្នាំជាមួយណាហ្គាវើលដ៍(១៣ឆ្នាំជាកីឡាករ និង៧ឆ្នាំជាគ្រូបង្វឹក)។ លោកគ្រូធ្លាប់ជាអតីតកីឡាករឆ្នើមមួយរូបដែលពាក់អាវលេខ៧ និងជាប្រធានក្រុមផងដែរ ។ អតីតកីឡាករក្រុមណាហ្គាវើលដ៍រូបនេះពូកែខាងលើកបាល់ចូលប្រអប់គ្រោះថ្នាក់ ក៏ដូចជាការលើកបាល់ជ្រុងនិងការទាត់បាល់ហ្វ្រីឃីក ។
លោក មាស ចាន់ណា បានសម្រេចចិត្តបោះបង់ក្លិបចាស់ដែលរួមការងារអស់ប្រមាណ២០ឆ្នាំ ដោយសារតែលោកចង់ប្ដូរបទពិសោធន៍ និងដោយសារតែក្លិបវិសាខា បានផ្ដល់ឱកាសអោយលោកទទួលបានអត្ថប្រយោជន៍ច្រើនជាង ។ លោកបានប្រកាស
អោយដឹងថា ជំហាននៅក្នុងក្លិបថ្មី លោកនឹងប្រើអោយអស់ពីសមត្ថភាព ហើយអ្នកគាំទ្រមិនតិចទេ ជឿថាលោកនឹងកាន់តែកសាងស្នាដៃល្បីខ្លាំង ជាមួយនឹងការប៉ះគ្នាក្នុងក្រុមតែមួយ ជាមួយគ្រូបង្វឹកជនជាតិកូរ៉េ ដោយសារតែអ្នកទាំងពីរសុទ្ធតែឆ្នើមហើយមានស្នាដៃ ៕
ចែករំលែកព័តមាននេះ