ខេត្តសៀមរាប ៖ លោក ឃឹម ប៊ុនសុង អភិបាលខេត្ត បានអនុញ្ញាតឱ្យបវរកញ្ញាជប៉ុន កញ្ញា Hisae ARAI និងកញ្ញា Kiko ARAI ចូលជួបសម្តែងការគួរសមនៅសាលាខេត្ត នារសៀលថ្ងៃទី១៨ ខែឧសភា
ខេត្តសៀមរាប ៖ លោក ឃឹម ប៊ុនសុង អភិបាលខេត្ត បានអនុញ្ញាតឱ្យបវរកញ្ញាជប៉ុន កញ្ញា Hisae ARAI និងកញ្ញា Kiko ARAI ចូលជួបសម្តែងការគួរសមនៅសាលាខេត្ត នារសៀលថ្ងៃទី១៨ ខែឧសភា ក្នុងការបង្ហាញអំពីសកម្មភាពមូលនិធិទឹកចិត្តទាំង៣ ។
ក្នុងឱកាសនោះ កញ្ញា Hisae ARAI បានលើកឡើងអំពីគោលបំណងនៃមូលនិធិទឹកចិត្តទាំង៣នៅលើទឹកដីព្រះរាជាណាចក្រកម្ពុជា ដោយផ្តោតឆ្ពោះទៅលើវិស័យអប់រំ កីឡា សុខភាព អនាម័យមាត់ធ្មេញ បរិស្ថាន និង វប្បធម៌ប្រពៃណី ។ កញ្ញា Hisae ARAI បានឱ្យដឹងថា អង្គការមូលនិធិទឹកចិត្តទាំង៣ បានចូលមកកម្ពុជាមានរយៈពេល៦ឆ្នាំមកហើយ ដោយសហការជាមួយវិស័យអប់រំនៅតាមបណ្តាមូលដ្ឋាន សំខាន់លើការងារកីឡាវាយកូនបាល់។កន្លងមក កម្មវិធីប្រកួតកីឡាវាយកូនបាល់នេះ ត្រូវបានធ្វើនៅមុខទីលានជល់ដំរីក្នុងបរិវេណអង្គរធំ ហើយក៏មានការចូលរួមពីសិស្សានុសិស្ស និស្សិត និងភ្ញៀវទេសចរផងដែរ ។
កញ្ញា Hisae ARAI បានគូសបញ្ជាក់ថា ការងារអប់រំ និងកីឡា បានផ្សាភ្ជាប់ទៅនឹងបរិស្ថាន អនាម័យ ។ កន្លងមក អង្គការមូលនិធិទឹកចិត្តទាំង៣ បានរួមសហការធ្វើនៅតាមសាលារៀន សាកលវិទ្យាល័យ និងបណ្តាខេត្តមួយចំនួនជាប់នឹងសមុទ្រ ក្នុងការលើកស្ទួយបរិស្ថានអនាម័យ និងសុខភាពមាត់ធ្មេញ ។
កញ្ញាបានលើកនូវកម្មវិធីមួយចំនួន ក្នុងសកម្មភាពរបស់មូលនិធិទឹកចិត្តទាំង៣ ក្នុងនោះកំណត់យកខេត្តសៀមរាបក្នុងការធ្វើអនាម័យបរិស្ថាននៅថ្ងៃទី១៨និង១៩ ខែធ្នូ ខាងមុខ ក្នុងគោលដៅលើកស្ទួយនូវបរិស្ថាន អនាម័យនៅលើទឹកប្រវត្តិសាស្ត្រ ដែលបានកំពុងទាក់ទាញអារម្មណ៍ភ្ញៀវទេសចរមកពីគ្រប់មជ្ឈដ្ឋានលើពិភពលោក ។ ជាមួយនេះ ក៏ដើម្បីពញ្ញាក់ស្មារតីរបស់ប្រជាជននិងសិស្សានុសិស្ស ក្នុងការចូលរួមលើកស្ទួយនូវបរិស្ថាននៅក្នុងសហគមន៍របស់ខ្លួន ព្រោះខេត្តសៀមរាបជាមជ្ឈមណ្ឌលវប្បធម៌ សម្បូរទៅដោយប្រាង្គប្រាសាទបុរាណ ដែលជាសម្បត្តិបេតិកភណ្ឌពិភពលោករបស់មនុស្សជាតិ ។
ការរៀបចំកម្មវិធីនេះ ក៏មានការចូលរួមពីតារាបង្ហាញម៉ូដ ដោយបានយកកាកសំណល់ពីសំរាមមកធ្វើការកែច្នៃជាសម្លៀកបំពាក់ផងដែរ ។
លោកអភិបាលខេត្ត ឃឹម ប៊ុនសុង បានគាំទ្រនូវរាល់សកម្មភាពដែលអង្គការមូលនិធិទឹកចិត្តទាំង៣ មានគោលបំណងចូលរួមលើកស្ទួយបរិស្ថាន អនាម័យនៅលើទឹកដីប្រវត្តិសាស្ត្រខេត្តសៀមរាប ក្នុងនោះក៏មានកីឡាវាយកូនបាល់ ដែលជាប្រភេទកីឡាមួយបានធ្វើការបណ្តុះបណ្តាលដល់សិស្សានុសិស្សកម្ពុជា ។
លោកអភិបាលខេត្តគូសបញ្ជាក់ថា ខេត្តសៀមរាបជាគោលដៅទេសចរណ៍របស់ភ្ញៀវនៅលើពិភពលោក ដូច្នេះបញ្ហាបរិស្ថាន អនាម័យ ជាកត្តាដ៏សំខាន់របស់ខេត្តដែលត្រូវយកចិត្តទុកដាក់ខ្ពស់ ។ ម្យ៉ាងទៀត ការរៀបចំធ្វើបរិស្ថាននៅតំបន់អង្គរនេះ លោកសូមឱ្យធ្វើការរៀបចំនូវគណៈកម្មការមួយ ដោយមានសមាសភាពចូលរួមពីអាជ្ញាធរជាតិអប្សរា និងអាជ្ញាធរខេត្ត មន្ទីរអង្គភាពជំនាញចូលរួមផងដែរ ។ លោកមានក្តីសង្ឃឹមជឿជាក់ផងដែរថា ការរៀបចំធ្វើបរិស្ថាននេះនឹងមានការចូលរួមពីភ្ញៀវជាតិ-អន្តរជាតិ សំខាន់ភ្ញៀវទេសចរ ។ កន្លងមកនៅខេត្តសៀមរាបបានរៀបចំពិធីបុណ្យធំៗ ហើយក៏បានទាក់ទាញភ្ញៀវចូលមកទស្សនាយ៉ាងច្រើនផងដែរ ។
លោកអភិបាលខេត្ត បានធ្វើការកោតសរសើរចំពោះការយកចិត្តទុកដាក់របស់កញ្ញា ចំពោះកុមារកម្ពុជានៅតាមសាលារៀន ក៏ដូចក្នុងសហគមន៍ផងដែរ ។ ម្យ៉ាងទៀត កាយវិការសប្បុរសធម៌ទាំងនេះ លោកសូមធ្វើការគាំទ្រនូវរាល់សកម្មភាពរបស់អង្គការមូលនិធិទឹកចិត្តទាំង៣ដើម្បីមាតុភូមិកម្ពុជា ។ កន្លងមកនេះ ក៏មានសប្បុរសជន ប្រជាជនជប៉ុន រាជរដ្ឋាភិបាលជប៉ុន ចូលរួមក្នុងការសាងសង់អគារសិក្សា អណ្តូងទឹកស្អាត មណ្ឌលសុខភាព និងបង្គន់អនាម័យ សំខាន់ការបញ្ជូនក្រុមគ្រូពេទ្យស្ម័គ្រចិត្តចុះមកព្យាបាលជំងឺជូនប្រជាពលរដ្ឋនៅតាមមូលដ្ឋានខេត្តសៀមរាប ដោយឥតគិតថ្លៃផងដែរ ៕
ចែករំលែកព័តមាននេះ