រាជធានីភ្នំពេញ ៖ រថយន្តស៊ីទែនប្រេងរបស់ក្រុមហ៊ុន SAVIMEX ចំណុះ១៦០០០លីត្រមួយគ្រឿងបានដាច់កង់រមៀលចេញទៅបុកម៉ូតូ១គ្រឿង បណ្តាលអោយរងការខូចខាត ហើយរថយន្តអូសប្រមាណជិត៥០ម៉ែត្រ បណ្តាលអោយប្រេងបានហូរពេញផ្លូវ ផ្អើលដល់អ្នកដំណើរ , អ្នកស្រុកនាំគ្នាដួស និងត្រង់បានរាប់សិបកាន តែសំណាងល្អពុំបណ្តាលអោយឆាបឆេះក្លាយជាអគ្គីភ័យឡើយ ។
នៅក្នុងហេតុការណ៍រថយន្តពន្លត់អគ្គីភ័យចំនួន៥គ្រឿង ទៅត្រៀមអន្តរាគមន៍ ខ្លាចកើតមានអគ្គីភ័យជាយថាហេតុ ដែលហេតុការណ៍នេះ បង្កអោយមានការភ្ញាក់ផ្អើល កាលពីវេលាម៉ោងប្រមាណ១១និង២០នាទីព្រឹក ថ្ងៃទី០៨ ខែធ្នូ ឆ្នាំ ២០២១ នៅចំណុចគល់ស្ពានព្រែកព្នៅខាងកើត តាមបណ្តោយមហាវិថីឈ្នះឈ្នះ ក្នុងភូមិ ព្រែកតារ័ត្ន សង្កាត់ព្រែកតាសេក ខណ្ឌជ្រោយចង្វារ រាជធានីភ្នំពេញ។
រថយន្តដែលដាច់កង់នោះរថយន្តម៉ាក IZUSU ពណ៌ស ពាក់ស្លាកលេខ ភ្នំពេញ ៣A.៩៣៦៨ ជារថយន្តស៊ីទែនប្រេងរបស់ក្រុមហ៊ុន SAVIMEX បានដាច់កង់ក្រោយខាងស្តាំ និងកាច់ដាច់ទុយោបូមប្រេង ។ ចំណែកម៉ូតូដែលកង់រថយន្តរមៀលដឹកកាំបិតពូថៅលក់ បានរងការខូចខាតផ្នែកខាងមុខ ។
តាមសាក្សី បានអោយដឹងថា នៅមុនពេលកើតហេតុរថយន្តស៊ីទែន បានដឹកប្រេងម៉ាស៊ូតចំណុះចំនួន១៦០០០លីត្រធ្វើដំណើរឆ្លងស្ពានពីលិចទៅកើត ពេលចុះពីលើស្ពានដល់គល់ស្ពាន ស្រាប់ដាច់កង់ក្រោយខាងផ្នែកខាងស្តាំ បានរមៀលចេញឆ្លងផ្លូវទៅជើងទៅបុកម៉ូតូ អ្នកលក់កាំបិត ដែលកំពុងតែឈប់ ។
តាមសាក្សីបានអោយដឹងទៀតថា នៅពេលដាច់កង់រថយន្តបានផ្អៀងអូសទៅលើថ្នល់បង្កអោយបាក់ដាច់ទុយោបូមប្រេង ជាហេតុបណ្តាលអោយប្រេងម៉ាស៊ូតហូរពេញផ្លូវ ។ ដោយសារតែល្បឿនលឿនរថយន្តបានអូសប្រមាណជិត៥០ម៉ែត្រទើបឈប់ហើយប្រេងបានអូសចេញតាមទុយោបាក់ដាច់ស្រោចពេញផ្លូវ ។
ភ្លាមៗ អ្នកដំណើរ ក៏ដូចជា ប្រជាពលរដ្ឋ ដែលរស់នៅជុំវិញបានផ្អើលនាំគ្នា ទៅត្រង និងដួសប្រេង ដែលហូរ និងទៅដក់នៅទីទំនាបដែលខ្លះ ម្នាក់ៗបានជិត១០កានក៏មានដែរ ។
តាមអ្នកបើកម៉ូតូលក់កាំបិតពូថៅឈ្មោះ ឡុង ចាន់ចាវ អាយុ២៥ឆ្នាំ មានលំនៅភូមិ ក្រួចសើច ឃុំកោះអណ្តែត ស្រុកស្រីសន្ធរ ខេត្តកំពង់ចាម បានអោយដឹងថា នៅមុនពេលកើតហេតុ ខ្លួនបានជិះម៉ូតូមកពីលក់នៅខេត្តកំពង់ស្ពឺ រួចក៏បានបត់ម៉ូតូត្រឡប់ក្រោយ ប្រុងចុះទិញរ៉ូបអោយប្រពន្ធ ស្រាប់តែកង់រថយន្តបានរមៀលចេញរថយន្តតាំងពីលើស្ពានមកបុកបណ្តាលអោយដួល និងរងការខូចខាតតែម្តង ។ បន្ទាប់ពីកើតមានគ្រោះថ្នាក់ប្រុងបង្កអោយកើតមានអគ្គីភ័យដែរ តែអ្នកបើកបរ បានយកបំពង់បាញ់ពន្លត់ទាន់ ព្រមទាំងហៅរថយន្ត មកបូមប្រេងចេញ ។
នៅក្នុងហេតុការណ៍នេះ នគរបាលបង្ការពន្លត់អគ្គីភ័យ និងសង្គ្រោះនិងក្រុមហ៊ុន OCIC បានចេញរថយន្ត ពន្លត់អគ្គីភ័យចំនួន៥គ្រឿងទៅត្រៀមអន្តរាគមន៍ផងដែរ ។ នេះចាត់ទុកជាសំណាង បើសិនជាប្រេងសាំងអាចបង្កអោយកើតមានអគ្គីភ័យពុំខានឡើយ ៕
ចែករំលែកព័តមាននេះ