រាជធានីភ្នំពេញ ៖ បើទោះបីឆ្នាំ ២០២១ សេដ្ឋកិច្ចកម្ពុជាបន្តញំញ៉ីទៅដោយជំងឺកូវីដ ១៩ ក្តី ចំពោះការផ្តល់ឥណទាន និងការដាក់បញ្ញើសន្សំនៅធនាគារ និងគ្រឹះស្ថានហិរញ្ញវត្ថុនៅតែបន្តមានកំណើន ដែលមានការរំពឹងថា មានការកើនឡើងពី ១០% ទៅ ១៥%សម្រាប់វិស័យមីក្រូហិរញ្ញវត្ថុ និងប្រមាណ ២០% ក្នុងវិស័យធនាគារ ។
លោក ផល វ៉ាន់ឌី នាយកប្រតិបត្តិនៃសមាគមមីក្រូហិរញ្ញវត្ថុកម្ពុជាបានឱ្យដឹងថា វិស័យមីក្រូហិរញ្ញវត្ថុសម្រាប់ការដាក់បញ្ញើគឺមានការកើនឡើងជាប្រចាំក្នុងរង្វង់ ១០% ដែលនេះបង្ហាញឱ្យឃើញនូវភាពជឿជាក់របស់សាធារណជនលើវិស័យធនាគារ បើទោះពីស្ថិតក្នុងវិបត្តិជំងឺកូវីដ ១៩ ក៏ដោយវិស័យមួយនេះនៅមានភាពធន់ និងរឹងមាំ ។
នៅក្នុងឆ្នាំ ២០២១ នេះ ទោះបីសេដ្ឋកិច្ចកម្ពុជាញំញីទៅដោយជំងឺកូវីដ ១៩ ក្តី តែវិស័យមីក្រូហិរញ្ញវត្ថុយើងបានកត់សម្គាល់ថា បន្តមានកំណើនផ្តល់ឥណទានជាធម្មតាក្នុងរង្វង់ពី ១០% ទៅ ១៥% ហើយនេះជាសញ្ញាមួយល្អ ព្រោះថា វិស័យមួយនេះបានចូលរួមចំណែកជួយដល់ប្រជាពលរដ្ឋដែលរងផលប៉ះពាល់ដោយសារជំងឺកូវីដ ១៩ និងបានជួយខ្លួនឯងឱ្យតែរឹងមាំនិងបន្តរីកចម្រើនដើម្បីឱ្យកំណើននេះបានចូលរួមធ្វើឱ្យកើនទៅដល់កំណើនសេដ្ឋកិច្ចសង្គមរបស់កម្ពុជា ។
តាមសមាគមមីក្រូហិរញ្ញវត្ថុកម្ពុជាគិតត្រឹមដំណាច់ខែកញ្ញា ឆ្នាំ ២០២១ ចំនួនអតិថិជនដែលដាក់ប្រាក់បញ្ញើបានកើនឡើងដល់ចំនួន ២.៨៤៩.៣៤៤ នាក់ ពោលគឺកើនឡើងចំនួន ៣៣.៦៨៦ នាក់ ធៀបនឹងត្រីមាសមុន ខណៈបរិមាណប្រាក់បញ្ញើបានកើនឡើងដល់ ៤.០៧៣ លានដុល្លាសហរដ្ឋអាមេរិក ពោលគឺកើនឡើងចំនួន ១៩០ លានដុល្លាសហរដ្ឋអាមេរិកធៀបនឹងត្រីទី ២ ។ ចំពោះឥណទានក៏បានកើនឡើងរហូតដល់ ៨.២១៨ លានដុល្លាសហរដ្ឋអាមេរិក ដោយកើនឡើងប្រមាណ ៦០០ លានដុល្លាសហរដ្ឋអាមេរិកបើធៀបនឹងត្រីមាសមុន ខណៈចំនួនអតិថិជនកម្ចីបានកើនឡើងដល់ ២.០២៨.៨៨២ នាក់ ដោយកើនឡើង ៥១.១១៦ នាក់បើធៀបនឹងត្រីមាសទី ២ ក្នុងឆ្នាំ ២០២១ ។
ការកើនឡើងនេះជាសញ្ញាណបង្ហាញការងើបឡើងវិញនៃសេដ្ឋកិច្ចកម្ពុជា ដោយសារតម្រូវការឥណទានក្នុងការចាប់ផ្តើមឬ ពង្រីកអាជីវកម្ម ។ យ៉ាងណាក្តីសមាគមមីក្រូហិរញ្ញវត្ថុ នឹងបន្តតាមដានដោយយកចិត្តទុកដាក់នូវនិនាការណ៍ផ្សេងៗក្នុងវិស័យ ដើម្បីការពារផលប៉ះពាល់ណាមួយដែលអាចនឹងកើតឡើងជាយថាហេតុ ។
លោកបណ្ឌិត អ៊ិន ចាន់នី ប្រធានសមាគមធនាគារកម្ពុជានិយាយថា នៅឆ្នាំ ២០២០ ទោះបានបានរងផលប៉ះពាល់ពីជំងឺកូវីដ ១៩ប៉ុន្តែកំណើនហិរញ្ញវត្ថុនៅតែមានអត្រាខ្ពស់រហូតជិត ២០% ហើយនៅឆ្នាំ ២០២១ នេះ រំពឹងទុកថាវាមានកំណើនដូចគ្នា និងឆ្នាំ២០២០ ព្រោះនៅមានសាច់ប្រាក់ទំនេរច្រើនសម្រាប់ផ្គត់ផ្គង់ដល់ការលូតលាស់ ។
លោកបណ្ឌិត លើកឡើងថា «គ្រាន់តែស្ថាប័នធនាគារអេស៊ីលីដាមួយអត្រាកំណើនទាំងឥណទាននិងការដាក់ប្រាក់បញ្ញើមានប្រមាណ ១៨% នៅក្នុងខែ ១១ ហើយខ្ញុំរំពឹងថានៅពេលដាច់ឆ្នាំ ២០២១ នេះកំណើនមិនទាបជាង ២០% នោះទេសម្រាប់ប្រាក់បញ្ញើសន្សំ រីឯការផ្តល់ឥណទានមានជិត ២០% ។ សម្រាប់វិស័យធនាគារទាំងមូលខ្ញុំគិតវាក៏មិនខុសគ្នាទៅ និងអេស៊ីលីដា បាននឹងរីកចម្រើននោះទេ ៕
ចែករំលែកព័តមាននេះ