វិស័យកាយសម្ព័ន្ធ ខំប្រឹងផលិតធនធានកីឡាករ
- ភ្នំពេញ
រាជធានីភ្នំពេញ ៖ បើទោះជាមិនទាន់មានផ្លែផ្កាល្អលើឆាកអន្តរជាតិ តែសហព័ន្ធកីឡាកាយសម្ព័ន្ធមិនព្រមបញ្ឈប់ការពុះពារនោះ
រាជធានីភ្នំពេញ ៖ បើទោះជាមិនទាន់មានផ្លែផ្កាល្អលើឆាកអន្តរជាតិ តែសហព័ន្ធកីឡាកាយសម្ព័ន្ធមិនព្រមបញ្ឈប់ការពុះពារនោះ
រាជធានីភ្នំពេញ ៖ បើទោះជាមិនទាន់មានផ្លែផ្កាល្អលើឆាកអន្តរជាតិ តែសហព័ន្ធកីឡាកាយសម្ព័ន្ធមិនព្រមបញ្ឈប់ការពុះពារនោះទេ គឺនៅបង្កើនការផលិតធនធានមនុស្ស ដើម្បីប្រកួតប្រជែងលើឆាកអន្តរជាតិ។ យោងតាមវគ្គបណ្តុះបណ្តាលបច្ចេកទេសគ្រូជំនាញកម្រិត១ (Level 1 Class P3+Training Camp) នៅតែត្រូវបានគេមើលឃើញថា ធ្វើឡើងដើម្បីពង្រឹងនូវគុណភាពបច្ចេកទេស ជូនដល់គ្រូបង្វឹកកម្រិត១ ប្រភេទកីឡាកាយសម្ព័ន្ធ ឆ្ពោះទៅស្វែងរកនូវឧត្តមភាព នៃការទទួលធ្វើម្ចាស់ផ្ទះ ជាប្រវត្តិសាស្ត្រជាលើកដំបូង ស៊ីហ្គេម លើកទី៣២ ឆ្នាំ២០២៣ នៅកម្ពជា។
លោក ណយ ផាណា គ្រូឧទ្ទេសប្រចាំវគ្គសិក្សានេះ និងជាអគ្គលេខាធិការសហព័ន្ធកីឡាកាយសម្ព័ន្ធកម្ពុជា មានប្រសាសន៍ថា ផ្អែកតាមផែនការសកម្មភាព ឆ្នាំ២០២១ របស់សហព័ន្ធកីឡាកាយសម្ព័ន្ធកម្ពុជា សហការណ៍ជាមួយក្រសួងអប់រំ យុវជន និងកីឡា បានរៀបចំបើកវគ្គបណ្តុះបណ្តាលបច្ចេកទេស គ្រូជំនាញ កម្រិត១ (Level 1 Class P3+Training Camp) ដើម្បីពង្រឹងនូវគុណភាពបច្ចេកទេស ជូនដល់គ្រូបង្វឹកកម្រិត១ ប្រភេទកីឡាកាយសម្ព័ន្ធ ឱ្យមានការយល់ដឹងកាន់តែប្រសើរ និងត្រៀមលក្ខណៈឱ្យបានល្អ សម្រាប់ចំណេះ ជំនាញមួយនេះ ដើម្បីឆ្ពោះទៅរកភាពជោគជ័យ ក្នុងព្រឹត្តិការណ៍កីឡាជាតិ និងត្រៀមឆ្ពោះទៅរកឧត្តមភាព ក្នុងព្រឹត្តិការណ៍កីឡាស៊ីហ្គេម លើកទី៣២ ឆ្នាំ២០២៣ ជូនជាតិមាតុភូមិ ដែលកម្ពុជាទទួលធ្វើជាម្ចាស់ផ្ទះ។
លោកអគ្គលេខាធិការរូបនេះបន្ថែមថា ដោយមានការគាំទ្រកញ្ចប់ថវិកាពីក្រសួងអប់រំ យុវជន និងកីឡា ដែលបានទម្លាក់ជូនសហព័ន្ធកីឡាកាយសម្ព័ន្ធកម្ពុជា ក្នុងគោលបំណងពង្រឹងសមត្ថភាព ក្នុងកញ្ចប់បណ្តុះបណ្តាលធនធានមនុស្ស វគ្គសិក្សានេះ បានប្រព្រឹត្តទៅចាប់ពីថ្ងៃទី១-៧ ខែធ្នូ ឆ្នាំ២០២១ នៅខេត្តកំពង់ឆ្នាំង។ វគ្គបច្ចេកទេសគ្រូជំនាញកម្រិត១ ត្រូវបានបង្រៀនដោយគ្រូឧទ្ទេស លោក ណយ ផាណា និងគ្រូជំនួយ លោក សោ សុផេង ជាគ្រូជំនាញរបស់សហព័ន្ធកីឡាកាយសម្ព័ន្ធ ដែលមានកម្រិតបច្ចេកទេស FIG Academy Level I and Level II in Artistic and Aerobic Gymnastics។
លោក ណយ ផាណា បញ្ជាក់ជូនទៀតថា ឆ្លងកាត់ការសិក្សានេះ សិក្ខាកាម បានបង្ហាញឱ្យឃើញអំពីការយល់ដឹងបន្ថែមលើទ្រឹស្តី និងការអនុវត្តជាក់ស្តែងផ្ទាល់ នៃប្រភេទកីឡាកាយសម្ព័ន្ធគ្រូបង្វឹកកម្រិត១ ព្រមទាំងលើកកម្ពស់នូវកម្រិតសមត្ថភាពបច្ចេកទេស និងដកស្រង់បាននូវបទពិសោធន៍ល្អៗ ថ្មីៗបន្ថែមទៀត ជាពិសេសគឺបានយល់ដឹងអំពីការផ្លាស់ប្តូរច្បាប់ថ្មី ២០២១-២០២៤ ផងដែរ។ បើសិនមានលទ្ធភាពធ្វើការសិក្សាតាមរយៈការបើកវគ្គបច្ចេកទេសគ្រូជំនាញ និងសិក្ខាសាលា ឬធ្វើការបោះជំរុំ (Training Camp) ឱ្យបានញឹកញាប់ជារៀងរាល់ឆ្នាំ គ្រូបង្វឹក គ្រូជំនួយ និងកីឡាករ-កីឡាការិនី កាន់តែមានការយល់ដឹងលើបច្ចេកទេស និងអាចលើកកម្ពស់គុណផលកាន់តែប្រសើរ និងធ្វើអោយកីឡាកាយសម្ព័ន្ធកម្ពុជា ឈានទៅរកឧត្តមភាព និងភាពជោគជ័យ ជូនប្រទេសជាតិមាតុភូមិ ជាពិសេស ឆ្ពោះទៅកាន់ការប្រកួតកីឡា ស៊ីហ្គេម លើកទី៣២ ឆ្នាំ២០២៣ ដែលកម្ពុជាធ្វើជាម្ចាស់ផ្ទះ។
សូមបញ្ជាក់ថា ឆ្លងកាត់ការសិក្សាទ្រឹស្តី និងការអនុវត្តជាក់ស្តែង សិក្ខាកាមទាំង២២នាក់ មាននារី៦នាក់ ទទួលបានការយល់ដឹងកាន់តែស៊ីជម្រៅ ដោយទទួលបាននិទ្ទេសល្អ ចំនួន១០នាក់ ស្មើ៤៥,៤៥%, និទ្ទេសល្អបង្គួរ៨នាក់ ស្មើ៣៦,៣៦% និងនិទ្ទេសមធ្យម០៤នាក់ ស្មើ១៨,១៨%៕
ចែករំលែកព័តមាននេះ