កាលពីថ្ងៃចន្ទកន្លងទៅនេះ ភ្នាក់ងារប្រឆាំងសារធាតុញៀនពិភពលោក (WADA) បានប្ដេជ្ញាស៊ើបអង្កេតតាមសេចក្តីថ្លែងការណ៍ចុងក្រោយបំផុត ទាក់ទងនឹងការប្រើប្រាស់សារធាតុញៀន ក្នុងការប្រកួត Winter Olympics 2014
កាលពីថ្ងៃចន្ទកន្លងទៅនេះ ភ្នាក់ងារប្រឆាំងសារធាតុញៀនពិភពលោក (WADA) បានប្ដេជ្ញាស៊ើបអង្កេតតាមសេចក្តីថ្លែងការណ៍ចុងក្រោយបំផុត ទាក់ទងនឹងការប្រើប្រាស់សារធាតុញៀន ក្នុងការប្រកួត Winter Olympics 2014 នៅទីក្រុង Sochi ប្រទេសរុស្ស៊ី ។
WADA បាននិយាយថា ការស៊ើបអង្កេតនេះ នឹងធ្វើឡើងយ៉ាងហ្មត់ចត់បំផុត យោងតាមសេចក្តីថ្លែងការណ៍របស់ទូរទស្សន៍ CBS “60mintues” និងសារព័ត៌មាន The New York Times ដែលបានចេញផ្សាយអំពីការប្រើប្រាស់សារធាតុញៀនដ៏ទូលំទូលាយនៅក្នុងប្រទេសរុស្ស៊ី ។
ប្រធាន WADA លោក Craig Reedie បាននិយាយថា៖ “WADA បានបេ្ដជ្ញាយ៉ាងមុឺងម៉ាត់ក្នុងការស៊ើបអង្កេតទៅលើការចោទប្រកាន់បន្ថែមទាំងនេះ ដែលត្រូវបានទម្លាយដោយទូរទស្សន៍ CBS “60mintues” និងសារព័ត៌មាន The New York Times ព្រមទាំងសេចក្តីរាយការណ៍ពីមជ្ឈដ្ឋាននានាទាក់ទងនឹងបញ្ហានេះផងដែរ ។” លោក Reedie បានបន្ថែមថា WADA នឹងព្យាយាមដោះស្រាយបញ្ហានេះឱ្យបានល្អ ព្រោះវាជារឿងចាំបាច់បំផុតដែលត្រូវដោះស្រាយ ដើម្បីធានានូវភាពស្អាតស្អំក្នុងវិស័យកីឡា ។
សូមបញ្ជាក់ថា កាលពីសប្តាហ៍មុនសារព័ត៌មាន The New York Times បានដកស្រង់សម្តីអតីតប្រធានមន្ទីរពិសោធន៍សារធាតុញៀនរបស់រុស្ស៊ីក្នុងទីក្រុង Sochi លោក Grigory Rodchenkov ដែលបាននិយាយថា យ៉ាងហោចណាស់មានអត្តពលិក១២នាក់ រួមទាំងកីឡាករទទួលមេដាយមាសមួយចំនួន គឺមានជាប់ទាក់ទងនឹងការប្រើប្រាស់សារធាតុញៀន ។
លោក Rodchenkov បានបង្ហើបឱ្យដឹងថា មន្ទីរពិសោធន៍បានយកសំណាកទឹកនោមយ៉ាងហោចណាស់១០០សំណាកសម្រាប់ការធ្វើតេស្តមុនចូលប្រកួត ។
ប្រធាន WADA លោក Reedie បាននិយាយថា ការចោទប្រកាន់របស់សារព័ត៌មាន The New York Times និងទូរទស្សន៍ CBS “60minutes” នឹងត្រូវស៊ើបអង្កេតដឹកនាំដោយអតីតភ្នាក់ងារប៉ូលិសអន្តរជាតិអាំងទែប៉ូលលោក Mathieu Holz ។
WADA បាននិយាយថា លោក Holz គ្រោងធ្វើទស្សនកិច្ចនៅប្រទេសរុស្ស៊ី ដើម្បីជួបចរចាជាមួយលោក Vitaly Stepanov និងលោក Rodchenkov អំពីបញ្ហាពាក់ព័ន្ធក្នុងរឿងក្តីនេះ ៕
ចែករំលែកព័តមាននេះ