De La Hoya បោះសម្តីចង់ប៉ះដៃគូចាស់ Floyd Mayweather នៅឆ្នាំក្រោយ
សហរដ្ឋអាមេរិក ៖ កំពូលអ្នកប្រដាល់ Oscar De La Hoya បានបោះសម្តីចង់ប៉ះ Floyd Mayweather លើសង្វៀនជាថ្មីម្តងទៀត
សហរដ្ឋអាមេរិក ៖ កំពូលអ្នកប្រដាល់ Oscar De La Hoya បានបោះសម្តីចង់ប៉ះ Floyd Mayweather លើសង្វៀនជាថ្មីម្តងទៀត
សហរដ្ឋអាមេរិក ៖ កំពូលអ្នកប្រដាល់ Oscar De La Hoya បានបោះសម្តីចង់ប៉ះ Floyd Mayweather លើសង្វៀនជាថ្មីម្តងទៀត នៅឆ្នាំក្រោយ ដើម្បីទូទាត់គំនុំចាស់ ដែលខ្លួនចាញ់កាលពី១៤ឆ្នាំមុន។
ដើមឡើយ De La Hoya ដែលបានប្រកាសចូលនិវត្តន៍ពីប្រដាល់សកល បន្ទាប់ពីចាញ់ស្តេចប្រដាល់ហ្វីលីពីន Manny Pacquiao កាលពីឆ្នាំ ២០០៨ គ្រោងត្រឡប់ឡើងសង្វៀនសារជាថ្មីម្តងទៀត ដើម្បីប្រកួតទល់នឹង Vitor Belfort អតីតម្ចាស់ជើងឯក UFC នៅដើមឆ្នាំនេះ។ ប៉ុន្តែការប្រកួតត្រូវបានលុបចោលវិញ ដោយសារតែ De La Hoya បានឆ្លងកូវីដ១៩។
លុះក្រោយជាសះស្បើយពីកូវីដ១៩ ឥឡូវនេះ De La Hoya ចង់រៀបចំការប្រកួតដ៏កក្រើកមួយនៅឆ្នាំ ២០២២ ខាងមុខ ហើយ Mayweather បច្ចុប្បន្នវ័យ៤៤ឆ្នាំ សក្តិសមបំផុតសម្រាប់ការប្រកួតនេះ។
ថ្លែងទៅកាន់គេហទំព័រ TMZ Sport កាលពីពេលថ្មីៗនេះ អំពីគូប្រកួតដែលគាត់ចង់តទល់ជាមួយនៅឆ្នាំក្រោយ De La Hoya ឈានដល់វ័យ៤៨ឆ្នាំ បាននិយាយថា «វាអាចជា Floyd Mayweather ។ វាមិនមែនជាការប្រកួតសប្បុរធម៌នោះទេ។ ដើម្បីប្រកួតជាមួយនរណាម្នាក់ដូច Floyd នេះ វានឹងក្លាយជាការប្រកួតដ៏ពិតប្រាកដ។ ហើយវាប្រហែលជាការប្រកួតដ៏ធំបំផុត ដែលអាចរកប្រាក់ចំណូលបានច្រើនសន្ធឹកសន្ធាប់ ដូច្នេះវាពិតជាល្អខ្លាំងណាស់»។
គួររំលឹកថា ការប្រកួតដណ្តើមខ្សែក្រវាត់ WBC super welterweight ដែល Oscar De La Hoya ចាញ់ Floyd Mayweather ដោយពិន្ទុ កាលពីថ្ងៃទី៥ ខែឧសភា ឆ្នាំ ២០០៧ បានធ្វើឱ្យកក្រើកប្រវត្តិសាស្ត្រ ដោយនៅពេលនោះ ការប្រកួតនេះ គឺជាការប្រកួតប្រដាល់សកល ដែលរកប្រាក់ចំណូលបានច្រើនបំផុតមិនធ្លាប់មានរហូតដល់ជាង ១៣០លានដុល្លារ៕ (ដកស្រង់ចេញពី Dailymail)
ចែករំលែកព័តមាននេះ