អង់គ្លេស ៖ ខ្សែប្រយុទ្ធ Cristiano Ronaldo បាន​បង្កើត​កំណត់​ត្រា​ថ្មី​មួយ​ក្នុង​ប្រវត្តិសាស្ត្រ​បាល់ទាត់ ក្រោយ​រកបាន​២​គ្រាប់​ក្នុង​ជំនួប​បិសាច​ក្រហម Manchester United យកឈ្នះ​លើ​កាំភ្លើង​ធំ Arsenal លទ្ធផល ៣-២ កាលពី​យប់​រំលង​អា​ធ្រា​ត្រ​ថ្ងៃ​ទី​២ ឈាន​ចូល​ថ្ងៃ​ទី​៣ ខែធ្នូ ឆ្នាំ​២០២១​។

ជំនួប​ដ៏​ធំ​ប្រចាំ​ស​ប្តា​ហ៍​ទី​១៤ នៃ​ក្រប​ខណ្ឌ English Premier League ដែល​ធ្វើ​ឡើង​នៅ​ឯ​កីឡដ្ឋាន Old Trafford ក្រុម​ភ្ញៀវ Arsenal មានឱកាស​នាំមុខ​មុន​នៅ​នាទី​១៣ ដោយ​ខ្សែបម្រើ​ប្រយុទ្ធ Emile Smith Rowe មុន​ពេល​ម្ចាស់ផ្ទះ តាម​ស្មើ​មក​វិញ​នៅ​នាទី​៤៤ ដោយ​ខែ​បម្រើ Bruno Fernandes​។

ចូល​វគ្គ​ទី​២ ពោល​នាទី​៥២ ម្ចាស់ផ្ទះ​បើក​ការ​នាំមុខ​វិញ​ម្តង សម្រេច​ដោយ​ខ្សែប្រយុទ្ធ Cristiano Ronaldo​។ លុះ​២​នាទី​ក្រោយ ខ្សែបម្រើ​ប្រយុទ្ធ Martin Odegaard រក​គ្រាប់​តាម​ស្មើ​មក​វិញ​។ ប៉ុន្តែ​អ្វី​ៗ​បាន​ចប់​សព្វគ្រប់ ពេល C.Ronaldo សម្រេច​គ្រាប់​ជ័យជម្នះ​នៅ​នាទី​៧០ ដោយ​បាល់​ប៉េ​ណា​ល់​ទី​។

ជាមួយ​លទ្ធផល​នេះ Man Utd ក្រោម​ការ​ដឹកនាំ​របស់​អ្នកចាត់ការ​បណ្តោះអាសន្ន Michael Carrick បាន​ឡើង​មក​ឈរ​នៅ​លេខ​៧ មាន​២១​ពិន្ទុ ខណៈ Arsenal ក្រោម​ការ​ដឹកនាំ​របស់​លោក Mikel Arteta ឈរ​នៅ​លេខ​៥ មាន​២៣​ពិន្ទុ​។

ក្រោយ​រកបាន​២​គ្រាប់​ពី​ជំនួប​ទល់​នឹង Arsenal ខ្សែប្រយុទ្ធ​ព័រ​ទុ​យ​ហ្គា​ល់ C.Ronaldo បាន​កើន​គ្រាប់​ស៊ុត​សរុប​៨០១​គ្រាប់​ហើយ ពី​ការ​បង្ហាញខ្លួន​សរុប​១,០៩៧​ប្រកួត ក្នុង​អាជីព​បាល់ទាត់​របស់​ខ្លួន និង​បាន​ក្លាយជា​កីឡាករ​ដែល​ស៊ុត​គ្រាប់​ទី​៨០០ ដំបូង​គេ​បង្អស់​ក្នុង​ប្រវត្តិសាស្ត្រ​បាល់ទាត់​។

៨០១​គ្រាប់​របស់ Cristiano Ronaldo រកបាន​ពី Sporting Lisbon ៥​គ្រាប់​, Man Utd ១៣០​គ្រាប់​, Real Madrid ៤៥០​គ្រាប់​, Juventus ១០១​គ្រាប់ និង​ជម្រើសជាតិ​ព័រ​ទុ​យ​ហ្គា​ល់ ១១៥​គ្រាប់​៕ (​ដកស្រង់​ចេញពី BBC)