ឈានដល់ការដាក់ពិន័យអាជ្ញាកណ្ដាល ករណីឲ្យ ធន់ ក្របី ជាអ្នកឈ្នះ
រាជធានីភ្នំពេញ ៖ ក្រោយពីទទួលបានរបាយការណ៍ប្រកួតរវាងកីឡាករ ធន់ ក្របី ជាមួយកីឡាករ សូដា សុភាព នៅសង្វៀនប្រដាល់បាយ័នស្ទឹងមានជ័យ កាលពីថ្ងៃសៅរ៍ទី២៧…
រាជធានីភ្នំពេញ ៖ ក្រោយពីទទួលបានរបាយការណ៍ប្រកួតរវាងកីឡាករ ធន់ ក្របី ជាមួយកីឡាករ សូដា សុភាព នៅសង្វៀនប្រដាល់បាយ័នស្ទឹងមានជ័យ កាលពីថ្ងៃសៅរ៍ទី២៧…
រាជធានីភ្នំពេញ ៖ ក្រោយពីទទួលបានរបាយការណ៍ប្រកួតរវាងកីឡាករ ធន់ ក្របី ជាមួយកីឡាករ សូដា សុភាព នៅសង្វៀនប្រដាល់បាយ័នស្ទឹងមានជ័យ កាលពីថ្ងៃសៅរ៍ទី២៧ ខែវិច្ឆិកា ឆ្នាំ២០២១ នៅទីបំផុតសហព័ន្ធកីឡាប្រដាល់បានឈានដល់ការដាក់ពិន័យលោកអាជ្ញាកណ្ដាល ជាផ្លូវការហើយ ដោយអ្នកពាក់ព័ន្ធនឹងករណីអយុត្តិធម៌នេះក៏រងការពិន័យផងដែរ។ យោងតាមការបង្ហោះ កាលពីល្ងាចថ្ងៃទី៣០ វិច្ឆិកា ឆ្នាំ២០២១ បានបង្ហោះលិខិតបញ្ឈរជើង អមដោយសំណេរថា ដោយមើលឃើញពីការដឹកនាំប្រកួតរបស់អាជ្ញាកណ្តាលមានការខុសឆ្គងទៅនឹងបទបញ្ជាប្រកួត និងថែមទាំងបានសម្រេចលទ្ធផលមិនបានត្រឹមត្រូវទៅនឹងសកម្មភាព និងលទ្ធផលជាក់ស្តែង ឯកឧត្តមប្រធានសហព័ន្ធបានកោះប្រជុំគណៈកម្មាធិការប្រតិបត្តិសហព័ន្ធ ដើម្បីពិនិត្យ វាយតម្លៃ និងសម្រេចដាក់វិធានការរដ្ឋបាលចំពោះមន្ត្រីដែលអនុវត្តខុសឆ្គងភ្លាមៗ។
សេចក្ដីប្រកាសនោះ បានសម្រេចផ្អាកការងារជាបណ្តោះអាសន្នរយៈពេល០៦សប្តាហ៍ចំពោះអាជ្ញាកណ្តាលលោក (ម៉ី រតនៈ) និងគណៈវិនិច្ឆ័យលោក (ហង្ស ស៊ឺន) រីឯកីឡាករ(ធន់ ក្របី) សហព័ន្ធសម្រេចផ្អាកការចាប់គូមិនឲ្យប្រកួតរយៈពេល០៦សប្តាហ៍ដែរ។ ជាមួយនឹងការប្រកាសនេះ ផេកសហព័ន្ធបន្តថា ហេតុនេះសូមបងប្អូនដែលស្រឡាញ់ និងគាំទ្រគុនខ្មែរទាំងអស់មេត្តាជ្រាប និងសូមខន្តីអភ័យទោស ចំពោះកំហុសឆ្គងទាំងនេះ ធ្វើឲ្យប៉ះពាល់ដល់អារម្មណ៍បងប្អូន សហព័ន្ធនឹងខិតខំធ្វើការអប់រំ ណែនាំ ពង្រឹងឡើងវិញដល់មន្ត្រី និងកីឡាករទាំងអស់ឲ្យអនុវត្តឲ្យបានត្រឹមត្រូវតាមបទបញ្ជាបច្ចេកទេសរបស់សហព័ន្ធ សូមអរគុណ។ អ្នកគាំទ្រមិនតិចទេ បានបង្ហាញការសាទរចំពោះចំណាត់ការនេះ ហើយអ្វីដែលបានសម្រេចក៏បានធ្វើឲ្យអ្នកគាំទ្រអស់ចិត្តផងដែរ។
គួរបញ្ជាក់ផងដែរថា ករណីដែលបានកើតឡើងនេះ គឺដោយសារតែការប្រកួតប្រដាល់ជើងឯកនៅទូរទស្សន៍បាយ័ន ដែលបានធ្វើឡើងកាលពីថ្ងៃទី២៧ វិច្ឆិកា ដែលជាការប្រកួតផ្ដាច់ព្រ័ត្រដណ្ដើមជើងឯក រវាងកីឡាករ ធន ក្របី និង បង្គោលខៀវ សូដា សុភាព នោះ បានផ្ទុះឡើងនូវដ៏អយុត្តិធម៌រហូតបណ្ដាលឲ្យមានការរិះគន់។ ការរិះគន់នោះ គឺបន្ទាប់ពីកីឡាករបង្គោលក្រហម ធន ក្របី បានវាយអោយបង្គោលខៀវដួល ហើយក្នុងពេលបង្គោលខៀវដួល ស្រាប់តែបង្គោលក្រហមថែមមួយជើងត្រូវភ្នែក បណ្ដាលឲ្យរាប់ដល់១០ ប៉ុន្តែអាជ្ញាកណ្ដាល និងគណៈកម្មការធ្វើជាមិនឃើញ ហើយនៅតែកាត់ក្ដីឲ្យអ្នកល្មើសឈ្នះ។ វីដេអូការប្រកួតនោះ ត្រូវបានគេចែកចាយរិះគន់យ៉ាងខ្លាំង រហូតធ្វើឲ្យវីជេ ហេរ៉ូ ឈានដល់ការ Live រិះគន់ បណ្ដាលឲ្យមានការភ្ញាក់ផ្អើល។ លោក ហេរ៉ូ បានអំពាវនាវឲ្យមានចំណាត់ការ និងលើកឡើងថា នេះគឺជាវប្បធម៌ធ្វើស៊ីចំពោះកីឡាករអត់ខ្សែអត់បណ្ដាញ ដែលលោកយល់ថា កំពុងធ្វើឲ្យអ្នកគាំទ្ររិះគន់ និងលែងចង់គាំទ្រវិស័យគុនខ្មែរ។
លោកថា សង្វៀនទាំងមូល គឺមានគណៈកម្មការកំពុងមើលច្រើនណាស់ គឺមិនអាចគ្មានអ្នកណាមើលឃើញនោះទេ ប៉ុន្តែអាចបណ្ដាលមកពីគេមានចេតនាចង់យោងបង្គោលក្រហម ឲ្យឈ្នះប្រាក់រង្វាន់លេខ១តែម្ដង។ លោកបានទាំងរិះគន់ចំពោះកីឡាករ ធន ក្របី ផងដែរ ដែលបានធ្វើរឿងល្មើសពិន័យដើម្បីជ័យជម្នះ ហើយញញឹមទទួលចំណាត់ថ្នាក់លេខ១ ទាំងដែលចំណាត់ថ្នាក់នោះ គឺគ្មានមហាជនណាកោតសរសើរ។ លោកក៏បានលើកទឹកចិត្តចំពោះ កីឡាករ សូដា សុភាព កុំឲ្យបាក់ទឹកចិត្ត និងកុំឲ្យបោះបង់ការប្រដាល់ ដោយលោកថា ដ្បិតតែគណៈកម្មការបិទភ្នែកឲ្យចាញ់ ប៉ុន្តែគឺចាញ់ដោយកិត្តិយស ហើយក៏មានអ្នកគាំទ្រមិនតិចដែរ ចងចាំប្អូន និងស្រលាញ់គាំទ្រ។ យ៉ាងណាក៏ដោយ នៅក្នុងពេលនេះ កីឡាករ សូដា សុភាព បានទទួលយុត្តិធម៌ ក្រោយការរិះគន់ដ៏ក្ដៅរបស់លោកនោះហើយ ទើបគេឃើញលោកបង្ហោះអរគុណចំពោះ ប្រធានសហព័ន្ធកីឡាប្រដាល់ផង៕ ដោយ ៖ ផាត់ តារារដ្ឋ
ចែករំលែកព័តមាននេះ