រាជធានីភ្នំពេញ ៖ លោកសាស្ត្រាចារ្យវេជ្ជបណ្ឌិត ឡឹម តារា ឯកទេសវះកាត់ប្រដាប់រំលាយអាហារនិងដុំមហារីក ប្រធានអ៊ុយនីតេ វះកាត់មហារីកនៅមន្ទីរពេទ្យកាល់មែ៉ត បានមានប្រសាសន៍ថា តើគេអាចធ្វើការព្យាបាលជំងឺមហារីកពោះវៀនធំ ដោយមិនបាច់វះកាត់បានឬទេ ? ចម្លើយ ៩៥ទៅ៩៩ភាគរយនៃជំងឺមហារីកពោះវៀនធំយើងមិនអាចចៀសវាងពីការវះកាត់បានទេ ដើម្បីព្យាបាលជំងឺនោះឲ្យជាសះស្បើយឲ្យអ្នកជំងឺរស់នៅបានយូរ តើហេតុអ្វី ?
ពោះវៀនធំរបស់មនុស្សយើងគឺមានលក្ខណៈដូចជាលូទឹកអុីចឹងដែរ គឺមានសំបកលូហើយមានរន្ធលូជារៀងរាល់នាទី និងរាល់មោ៉ងគឺយើងមានចរន្តដែលហូរឆ្លងកាត់លូនោះមានដូចជាទឹកលាមក និងមានខ្យល់ជាដើមហូរកាត់លូនោះជានិច្ច ។ មហារីកពោះវៀតធំចែកចេញជា៤ដំណាក់កាល៖
១-ហាក់ដូចជាដើមឈើនៅខ្ចី
២-វាចាក់ឫសនិងមានបែកមែកសាខាខ្លះ
៣-ដើមឈើនោះចាស់ហើយវាមានផ្លែមានផ្ការដែលអាចជ្រុះគ្រាប់ខ្លះៗ
៤-គឺដើមដែលចាស់មានផ្លែមានផ្កាជ្រុះគ្រាប់ហើយនិងមានការតពូជតទៅទៀត ហើយគ្រាប់ដែលខ្ទាតទៅឆ្ងាយវាអាចដុះចេញទៅជាដើមឈើផ្សេងទៀត
៥-គឺជាដុំសាច់មហារីកមួយដែលមានការរីករាលដាលទៅដល់សរីរាង្គផ្សេងៗទៀត ។
ការដុះសាច់កាន់តែធំទៅវានឹងធ្វើឲ្យរន្ធពោះវៀនយើងមានការតូចចង្អៀតដូច្នេះវាបង្កឲ្យមានការជាប់ស្ទះ ឬមួយមានការហូរឈាមជាដើម។ មហារីកពោះវៀតធំអាចមានដុះសាច់នៅច្រើនកន្លែង ពេលខ្លះនៅក្នុងពោះវៀនធំខាងស្តាំ ពេលខ្លះនៅចំកណ្តាល ពេលខ្លះនៅនឹងពោះវៀនធំខាងឆ្វេង និងនៅជិតទៅដល់កាសាល់គូទ ។ ទោះបីជាមហារីកនេះអាចដុះនៅកន្លែងណាមួយនៃពោះវៀនធំក៏ដោយ យើងចាំបាច់ត្រូវធ្វើការព្យាបាល ហើយការព្យាបាលគ្រប់ទីតាំងនៃជំងឺមហារីកពោះវៀនធំនោះគឺសុទ្ធសឹងតែឆ្លងកាត់នូវការវះកាត់ទាំងអស់ ។ តើហេតុម្តេចបានជាយើងចាំបាច់ត្រូវធ្វើការវះកាត់0x017d7 យើងមិនត្រឹមតែវះយកដុំសាច់ដែលដុះនៅក្នុងពោះវៀននោះចេញប៉ុណ្ណោះទេ តែយើងត្រូវកាត់ពោះវៀនធំមួយកង់ធំឲ្យបានឆ្ងាយ ហើយចងសរសៃឈាមដល់គល់ពោះវៀនថែមទៀតផង ។ ដូច្នេះដើម្បីព្យាបាលមហារីកពោះវៀនធំបានទាល់តែយើងអាចវះកាត់យកដុំសាច់មហារីកនិងគ្រាប់ដែលវាជ្រុះក្នុងខ្លួននោះចេញទាំងអស់ទើបមហារីកហ្នឹងវាជាបាន ។ ទិសដៅនៃការព្យាបាលដោយការវះកាត់គឺយើងមានស្តង់ដារមួយត្រូវវះកាត់ឲ្យបានឆ្ងាយយកប្រព័ន្ធកូនកណ្តុរដែលនៅក្បែរឲ្យបានអស់ ហើយបន្ទាប់មកទៀតយើងរកមធ្យោបាយដើម្បីតពោះវៀនដែលនៅសល់ឲ្យជាប់គ្នាឡើងវិញដើម្បីឲ្យអ្នកជំងឺអាចបរិភោគចំណីអាហារហើយបន្ទោបង់លាមកមកតាមផ្លូវធម្មជាតិវិញបាន ។ ការព្យាបាលមហារីកពោះវៀនធំមានការរួមផ្សំគ្នាហើយការវះកាត់គឺជាភាពចាំបាច់មួយដែលមិនអាចខ្វះបាន សំខាន់បំផុតដែលអាចឲ្យអ្នកជំងឺជាសះស្បើយ អ្នកជំងឺរស់បានយូរ ប៉ុន្តែការព្យាបាលបន្ទាប់បន្សំបន្ថែមដូចជាការចាក់ថ្នាំគីមីការប្រើកាំរស្មីក៏ជាការរួមចំណែកសំខាន់ផងដែរដើម្បីពន្យារអ្នកជំងឺនោះឲ្យរស់បានយូរ ។
ពេលខ្លះអ្នកជំងឺចូលដំណាក់កាលទី៤ដោយសភាពរបស់អ្នកជំងឺមិនអាចធ្វើការវះកាត់ដុំសាច់ចេញបានទេ គឺគ្រាន់តែបើកផ្លូវវាងឲ្យជុះតាមចង្កេះវិញដើម្បីឲ្យអ្នកជំងឺបន្តជីវិតរស់នៅបានទៀត ។ ដើម្បីឲ្យអ្នកជំងឺរស់នៅបានយូរយើងត្រូវបូកផ្សំការព្យាបាលដោយចាក់ថ្នាំគីមីឬក៏បាញ់កាំរស្មីដើម្បីធ្វើយា៉ងណាឲ្យដុំមហារីកនោះកុំឲ្យមានការរីកលូតលាស់លឿនពេក ។ ដូច្នេះហើយដើម្បីឲ្យទទួលបានលទ្ធផលល្អ ការព្យាបាលបែបនេះ គឺអ្នកជំងឺត្រូវតែប្រញាប់មកមន្ទីរពេទ្យកាល់មែ៉តនៅពេលណាដែលអ្នកជំងឺមានសញ្ញាប្រកាសអាសន្នមួយចំនួនដូចជា ការឈឺពោះរុាំរ៉ៃ ការផ្លាស់ប្តូរនូវវិធីបត់ជើង បន្ទោបង់លាមកនោះមានការប្រែប្រួល ។ គឺជាសញ្ញាមួយប្រកាសអាសន្នដល់អ្នកជំងឺប្រញាប់ទៅរកគ្រូពេទ្យជំនាញដើម្បីពិនិត្យរករោគវិនិច្ឆ័យឲ្យបានច្បាស់លាស់ ហើយត្រូវកំណត់ដឹងថា តើមហារីកនោះស្ថិតក្នុងដំណាក់កាលណា ? ដើម្បីចាប់ផ្តើមធ្វើការព្យាបាលចំទិសដៅបានឆាប់រហ័ស និងឲ្យបានទាន់ពេលវេលា ។
ចំណុចសំខាន់មួយទៀត នៅពេលដែលគ្រូពេទ្យឆ្លុះពោះវៀនទៅឃើញមានដុំសាច់នៅក្នុងដំណាក់កាលមួយនៅទាបនៅឡើយ ។ នៅពេលគ្រូពេទ្យពន្យល់ប្រាប់ដល់អ្នកជំងឺឲ្យទទួលការព្យាបាលដោយការវះកាត់ តែភាគច្រើនអ្នកជំងឺហាក់ដូចជាមិនអាចទទួលយកបានដោយសារការភ័យខ្លាចនៃការវះកាត់នោះ ឬមួយអ្នកជំងឺមិនទាន់យល់ច្បាស់អំពីជំងឺរបស់គាត់មិនទាន់ទទួលការព្យាបាល ហើយតែងតែទៅពិភាក្សាជាមួយគ្រូខ្មែរ គ្រូផ្សេងៗទៀត ឬទៅស្រុកក្រៅដែលចំណាយពេលវេលាអស់យូរ ហើយអ្នកជំងឺគាត់រង់ចាំដល់៣ខែ ខ្លះទៀតរង់ចាំរហូតដល់មួយឆ្នាំជាដើម ។ ចំពោះគ្រាប់មហារីកទាំងនេះបើសិនជាយើងមិនឆាប់ព្យាបាលវាទេ គឺវាមានការរីកលូតលាស់ទៅមុខមិនចាំយើងឡើយ ។ ពេលខ្លះរោគសញ្ញាមិនទាន់ប្រកាសអាសន្នអ្នកជំងឺអាចទ្រាំបាន ប៉ុន្តែមហារីកនោះបានវិវឌ្ឍពីដំណាក់កាលទីមួយទៅដំណាក់កាលទីពីរ និងឆ្ពោះទៅដំណាក់កាលទីបីជាប់រហូតដល់ដំណាក់កាលទីបួនមិនឈប់នៅមួយកន្លែងទេ ។ ពេលខ្លះអ្នកជំងឺមកជួបគ្រូពេទ្យក្នុងដំណាក់កាលទីពីរ ហើយគាត់រង់ចាំបីខែក្រោយទើបគាត់ព្រមទទួលយកការព្យាបាល ធ្វើឱ្យមហារីកអាចវិវឌ្ឍដល់ដំណាក់កាលទីបី ដូច្នេះភាពព្យាបាលមិនអាចទៅរួចទេ នេះជាសារសំខាន់នៃដំណឹងជូនចំពោះជនរួមជាតិ ។ បច្ចេកទេសនៃការវះកាត់នៅមន្ទីរពេទ្យកាល់មែ៉តនាពេលបច្ចុប្បន្ននេះមានភាពទំនើប និងមានសុវត្ថិភាព ពីព្រោះមុនការវះកាត់គ្រូពេទ្យតែងតែធ្វើការវាយតម្លៃសុខភាពទូទៅរបស់អ្នកជំងឺ មានការវិភាគជាក្រុមតើអ្នកជំងឺអាចធ្វើការវះកាត់បានដែរឬក៏អត់ ? ការវះកាត់អាចប្រឈមនឹងគ្រោះថ្នាក់អ្វីខ្លះ ? ហើយក្រុមគ្រូពេទ្យត្រៀមលក្ខណៈអ្វីខ្លះដើម្បីជួយសង្គ្រោះអ្នកជំងឺ ។
លើសពីនេះទៅទៀតនៅក្នុងពេលថ្មីៗនេះមន្ទីរពេទ្យកាល់មែ៉តមានវិធីព្យាបាលវះកាត់ពោះវៀនធំដោយមិនបាច់វះបើកស្បែកពោះគឺប្រើវិធីចោះដែលស្នាមមុខតូចធ្វើឲ្យអ្នកជំងឺមិនមានការឈឺចាប់ក្រោយការវះកាត់ហើយមុខរបួសឆាប់ជា ឬអាចឆាប់ចេញពីមន្ទីរពេទ្យ ។
លោកសាស្ត្រាចារ្យ ឡឹម តារា បានបញ្ជាក់ថា បើយើងធ្វើការប្រៀបធៀបទៅនឹងការវះកាត់ពោះវៀនធំដោយការវះបើកស្បែកពោះអ្នកជំងឺដេកពេទ្យក្នុងរយៈពេលជាមធ្យមពីមួយសប្តាហ៍ទៅ១២ថ្ងៃ ការប្រើប្រាស់ថ្នាំបំបាត់ការឈឺចាប់មានច្រើន ហើយផលវិបាកក្រោយការវះកាត់នឹងអាចកើតមាន ។ ប៉ុន្តែជាមួយនឹងវិធីនៃការវះកាត់តាមបែបចោះមុខរបួសតូច រន្ធតូចៗ អ្នកជំងឺសម្រាកនៅមន្ទីរពេទ្យត្រឹមតែបួនថ្ងៃទៅប្រាំមួយថ្ងៃបុ៉ណ្ណោះ អ្នកជំងឺឆាប់ហូបចំណីអាហារបាន ហើយឆាប់ចេញពីមន្ទីរពេទ្យ ត្រឡប់ទៅធ្វើការវិញដោយសុវត្ថិភាព ៕
ចែករំលែកព័តមាននេះ