ខេត្តរតនគិរី៖ កាលពីរសៀលថ្ងៃទី២៦ វិច្ឆិកា មានប្រជាពលរដ្ឋជនជាតិដើមភាគតិចជាង១០០គ្រួសារ រស់នៅក្នុងភូមិយឺនចាស់ ឃុំកក់ ស្រុកបកែវ ខេត្តរតនគិរី អំពាវនាវស្នើសុំឱ្យអាជ្ញាធរជួយពន្លឿនក្នុងការរៀបចំបណ្តាញភ្លើងអគ្គិសនីសម្រាប់ប្រើប្រាស់បានលឿនផង បន្ទាប់ពីមានដាក់បង្គោលភ្លើងរាយតាមភូមិរបស់ពួកគាត់រយៈពេល២ឆ្នាំទៅហើយនោះ…
ខេត្តរតនគិរី៖ កាលពីរសៀលថ្ងៃទី២៦ វិច្ឆិកា មានប្រជាពលរដ្ឋជនជាតិដើមភាគតិចជាង១០០គ្រួសារ រស់នៅក្នុងភូមិយឺនចាស់ ឃុំកក់ ស្រុកបកែវ ខេត្តរតនគិរី អំពាវនាវស្នើសុំឱ្យអាជ្ញាធរជួយពន្លឿនក្នុងការរៀបចំបណ្តាញភ្លើងអគ្គិសនីសម្រាប់ប្រើប្រាស់បានលឿនផង បន្ទាប់ពីមានដាក់បង្គោលភ្លើងរាយតាមភូមិរបស់ពួកគាត់រយៈពេល២ឆ្នាំទៅហើយនោះ ។
លោក ទីន ខាំលើន ជនជាតិទំពួន រស់នៅក្នុងភូមិខាងលើ និងជាជំទប់ទី១ ឃុំកក់ផងបានរៀបរាប់ប្រាប់កោះសន្តិភាពថា បញ្ហាភ្លើងអគ្គិសនីសព្វថ្ងៃនេះ ពួកគាត់មិនទាន់មានប្រើប្រាស់នៅឡើយទេ ។ ឯការដាក់រាយបង្គោលភ្លើង និងតខ្សែភ្លើងគឺមានរយៈពេល២ឆ្នាំហើយ គឺទុកចោលមិនព្រមតភ្ជាប់ភ្លើងឱ្យប្រជាពលរដ្ឋប្រើប្រាស់ឡើយ ដោយសារតែមានម្ចាស់ចម្ការកៅស៊ូនៅខាងដើមផ្លូវ មិនអនុញ្ញាតឱ្យខាងអគ្គិសនីតបណ្ដាញភ្លើងកាត់ដីមុខចម្ការ ដែលជាហេតុធ្វើឱ្យពួកគាត់មិនមានភ្លើងប្រើប្រាស់បែបនេះ។ លោកបន្តថា ទន្ទឹមនេះ ប្រជាពលរដ្ឋនៅក្នុងភូមិយឺនជាង១០០គ្រួសារបានសំណូមពរដល់អាជ្ញាធរស្រុកខេត្ត ជួយសម្របសម្រួលដល់ម្ចាស់ចម្ការកៅស៊ូផងដែរ ដើម្បីបានរាយខ្សែភ្លើងដល់ភូមិពួកគាត់បានប្រើប្រាស់ដូចភូមិដទៃ។
លោកហេង ប៊ុននី អភិបាលស្រុកបរកែវបានមានប្រសាសន៍ថា ទាក់ទងទៅនឹងការផ្ដល់ភ្លើងទៅដល់ភូមិរបស់បងប្អូនជនជាតិដើមភាគតិចនេះ ខាងសាលាស្រុកបានសម្របសម្រួលជាមួយម្ចាស់ចម្ការពីរលើកហើយ។ តែក្នុងការសម្របសម្រួលជាមួយម្ចាស់ចម្ការនៅអមសងខាងផ្លូវចូលទៅភូមិនោះ លើកទី១-គឺម្ចាស់ចម្ការមានភាពតឹងរឹងមិនព្រមអនុញ្ញាត ។ ហើយអាជ្ញាធរក៏បានសម្របសម្រួលជាលើកទី២ទៀតនោះ ក៏មានការយល់ព្រមពីម្ចាស់ចម្ការវិញ ។ លោកអភិបាលស្រុកបរកែវបានបន្តថា ចំពោះបណ្ដាញភ្លើងគឺខាងអាជ្ញាធរកំពុងតែរៀបចំតបណ្ដាញឱ្យដល់ភូមិរបស់គាត់ហើយ ។
លោកអភិបាលស្រុកបរកែវ ក៏បានសំណូមពរបងប្អូនពលរដ្ឋរស់នៅក្នុងភូមិខាងលើ គួរមានការយោគយល់ដល់អាជ្ញាធរដែលកំពុងរៀបចំនេះផង ។ ទោះមានការយឺតយ៉ាវក្តី កុំមានការយល់ច្រឡំថា អាជ្ញាធរមិនបានគិតគូរ ដែលបច្ចុប្បន្នខាងអគ្គិសនីក៏កំពុងប្រជុំពិភាក្សា និងរៀបចំចុះតភ្ជាប់បណ្ដាញតាមមូលដ្ឋានផងដែរ ៕
ចែករំលែកព័តមាននេះ