កីឡាទោចក្រយានចាប់ផ្ដើមមានគ្រូបង្វឹក កម្រិតអន្តរជាតិហើយ
- ភ្នំពេញ
រាជធានីភ្នំពេញ ៖ ក្រោយបញ្ចប់វគ្គបណ្តុះបណ្តាលបច្ចេកទេសគ្រូបង្វឹកអន្តរជាតិកម្រិត១ យ៉ាងជោគជ័យ កាលពីថ្ងៃទី២៦ វិច្ឆិកា ឆ្នាំ
រាជធានីភ្នំពេញ ៖ ក្រោយបញ្ចប់វគ្គបណ្តុះបណ្តាលបច្ចេកទេសគ្រូបង្វឹកអន្តរជាតិកម្រិត១ យ៉ាងជោគជ័យ កាលពីថ្ងៃទី២៦ វិច្ឆិកា ឆ្នាំ២០២១ មន្ត្រីជំនាញបានអះអាងថា កីឡាទោចក្រយាន ចាប់មានគ្រូបង្វឹក ដែលមានកម្រិតអន្តរជាតិហើយ ដោយគ្រូបង្វឹក ដែលទទួលបានការបណ្ដុះបណ្ដាលទាំងនេះ នឹងបន្តទទួលការបង្វឹកបន្ថែមទៀត ដើម្បីអោយកាន់តែមានស្ដង់ដារពិភពលោក មុនពេលកម្ពុជាធ្វើជាម្ចាស់ផ្ទះស៊ីហ្គេម នៅឆ្នាំ២០២៣។
លោក កឹម សុខុន រដ្ឋលេខាធិការក្រសួងពាណិជ្ជកម្ម និងជាអនុប្រធានសហព័ន្ធខ្មែរកីឡាទោក្រយាន បានវាយតម្លៃខ្ពស់ចំពោះគ្រូបង្វឹកទាំងអស់ ដែលបានខិតខំក្រេបជញ្ជក់ចំណេះដឹងពីគ្រូឧទ្ទេសប្រចាំវគ្គ ដែលនេះ គឺជាការអភិវឌ្ឍខ្លួនមួយដ៏ល្អ ដើម្បីធ្វើអោយវិស័យកីឡាទោចក្រយាននៅកម្ពុជាមានការរីកចំរើន។ លោកថា កម្ពុជាក្រៅពីត្រូវការកីឡាករល្អ ក៏ត្រូវតែមានគ្រូបង្វឹកដែលមានជំនាញលំដាប់ពិភពលោកផងដែរ។
លោក នូ ចំរើន អគ្គលេខាធិការសហព័ន្ធខ្មែរកីឡាទោចក្រយាន បានគូសបញ្ជាក់ថា កម្ពុជាកំពុងរៀបចំផែនការកសាងធនធានមនុស្សរបស់សហព័ន្ធខ្មែរកីឡាទោចក្រយានអោយកាន់តែខ្លាំង ដើម្បីឆ្ពោះទៅកាន់ព្រឹត្តិការណ៍ប្រកួតកីឡាអាស៊ីអាគ្នេយ៍ (SEA GAMES) លើកទី៣២ ឆ្នាំ២០២៣ ដែលកម្ពុជាធ្វើជាម្ចាស់ផ្ទះ។ ការពង្រឹងសមត្ថភាពនេះ ក៏ជាត្រៀមខ្លួន ដើម្បីអោយសហព័ន្ធទាំងមូល កាន់តែមានកម្លាំងគ្រប់គ្រាន់ ក្នុងការពង្រឹងសមត្ថភាពផងដែរ។ លោកថា ក្រោយពេលសហព័ន្ធបានរៀបចំបើកវគ្គបណ្តុះបណ្តាលបច្ចេកទេសគ្រូបង្វឹកនេះ កម្ពុជានឹងមានគឺដើម្បីគោលបំណងអភិវឌ្ឍន៍សមត្ថភាព និង ធនធានគ្រូបង្វឹករបស់សហព័ន្ធ ក្នុងការបង្វឹកកីឡាករ-កីឡាការិនី ទៅតាមស្តង់ដារបច្ចេកទេស។
លោកបានបន្តថា នេះជាគោលដៅស្របតាមផែនការយុទ្ធសាស្ត្រ ដែលប្រទេសកម្ពុជាត្រៀមខ្លួនឆ្ពោះធ្វើជាម្ចាស់ផ្ទះ កីឡាស៊ីហ្គេម លើកទី៣២ ឆ្នាំ២០២៣។ វគ្គបណ្តុះបណ្តាលនេះ គឺមានន័យថា សហព័ន្ធមានគ្រូបង្វឹកកម្រិតអន្តរជាតិចំនួន២៥នាក់ហើយ ដោយបានសិក្សាលើទ្រឹស្តីការបង្វឹកផ្នែកកង់ប៊ី អ៊ឹម អ៊ិច (Theory BMX Bike Training) និងការអនុវត្តជាក់ស្តែង។ សិក្សាអំពី ទ្រឹស្ដីនៃការបង្វឹកផ្នែកកង់ល្បឿន (Thisory Time Trall Bike Training) និងការអនុវត្តជាក់ស្តែង។ វគ្គនេះគឺបានផ្ដោតពីទ្រឹស្ដីនៃការបង្វឹកផ្នែកកង់គួក (Theory Road Bike Training) និងការអនុវត្តជាក់ស្ដែង និងការសិក្សាអំពីទ្រឹស្តីនៃការបង្វឹកផ្នែកកង់ភ្នំ (Theory Mountain Bike Training) និងការអនុវត្តជាក់ស្តែង។
ចំពោះចំណុចខ្លាំង សិក្ខាកាមបានយកចិត្តទុកដាក់ និងខិតខំព្យាយាមខ្លាំងចំពោះវគ្គបណ្តុះបណ្តាលនេះ និងបានយល់កាន់តែច្បាស់អំពីសារប្រយោជន៍ ដែលទទួលបានពីវគ្គបណ្តុះបណ្តាលនេះ។ ក្រុមគណៈកម្មការបានរៀបចំផែនការ កម្មវិធី ឯកសារបណ្តុះបណ្តាល និងផ្សព្វផ្សាយបានល្អជូនដល់សិក្ខាកាម។ វគ្គសិក្សានេះ ទទួលបានថវិកាពីក្រសួងអប់រំ យុវជន និងកីឡាចំនួន ២១,០០០,០០០រៀល សម្រាប់ការរៀបចំ និងមានការយកចិត្តទុកដាក់ និងគាំទ្រពីឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម និងជាប្រធានសហព័ន្ធខ្មែរកីឡាទោចក្រយាន និងមានការជួយសម្របសម្រួលពីថ្នាក់ដឹកនាំសហព័ន្ធខ្មែរកីឡាទោចក្រយាន ក្រសួងអប់រំ យុវជន និងកីឡា គណៈកម្មាធិការជាតិអូឡាំពិកកម្ពុជា និងសម្ព័ន្ធកីឡាប្រណាំងទោចក្រយានអន្តរជាតិ (UCI) ផងដែរ។
ចំពោះចំណុចខ្សោយ គឺវគ្គសិក្សានេះ មានរយៈពេលខ្លីសម្រាប់សិក្ខាកាម ត្រឹមចំនួន៥ថ្ងៃ ហើយសិក្ខាកាមនៅតាមបណ្តាខេត្ត មិនបានចូលរួមសិក្សាដោយផ្ទាល់ ដោយសារបញ្ហាជំងឺកូវីដ-១៩ ដោយរៀនតាមប្រព័ន្ធអនឡាញ។ បើទោះយ៉ាងនេះក្តី ក៏សហព័ន្ធបានវាយតម្លៃនូវលទ្ធផលនៃការសិក្សា ដោយលទ្ធផលល្អ ៣០% លទ្ធផលល្អបង្គួរ ៥០% និងមធ្យម ២០%។
លោក នូ ចំរើន បញ្ជាក់បន្ថែមទៀតថា វគ្គបណ្តុះបណ្តាលនេះ ពិតជាមានសារសំខាន់ណាស់ ក្នុងការលើកកម្ពស់សមត្ថភាពធនធានមនុស្សលើផ្នែកបង្វឹក ដល់ក្រុមកីឡាករ កីឡាការិនី ដើម្បីឈានទៅចូលរួមការប្រកួតកីឡាទោចក្រយានលក្ខណៈជាតិ និងអន្តរជាតិនានា និងជាពិសេសសម្រាប់ត្រៀមខ្លួន ដើម្បីចូលរួមក្នុងការប្រកួតកីឡាស៊ីហ្គេម នាឆ្នាំ២០២៣ខាងមុខ៕
ចែករំលែកព័តមាននេះ