បញ្ជូនជនសង្ស័យ ៥នាក់ ទៅតុលាការ ពាក់ព័ន្ធករណីធាក់ប្លន់យកម៉ូតូ ២ករណី
រាជធានីភ្នំពេញ ៖ លោកឧត្តមសេនីយ៍ទោ សុង លី ស្នងការរងទទួលផែនការងារព្រហ្មទណ្ឌ កាលពីថ្ងៃទី២៤ ខែវិច្ឆិកា ឆ្នាំ២០២១ បានដឹកនាំបញ្ជាផ្ទាល់…
រាជធានីភ្នំពេញ ៖ លោកឧត្តមសេនីយ៍ទោ សុង លី ស្នងការរងទទួលផែនការងារព្រហ្មទណ្ឌ កាលពីថ្ងៃទី២៤ ខែវិច្ឆិកា ឆ្នាំ២០២១ បានដឹកនាំបញ្ជាផ្ទាល់ កម្លាំងជំនាញការិយាល័យនគរបាលព្រហ្មទណ្ឌកម្រិតធ្ងន់ នៃស្នងការដ្ឋាននគរបាលរាជធានីភ្នំពេញ សហការជាមួយកម្លាំងអធិការដ្ឋាននគរបាលខណ្ឌច្បារអំពៅ បានធ្វើការបង្ក្រាប និងឃាត់ខ្លួនជនសង្ស័យ ចំនួន០៥នាក់ ពាក់ព័ន្ធករណីធាក់ប្លន់យកម៉ូតូ ប្រព្រឹត្តនៅត្រង់ចំណុចភូមិអូរអណ្តូង១ សង្កាត់ព្រែកប្រា ខណ្ឌច្បារអំពៅ ។
ជនសង្ស័យចំនួន ០៥នាក់ ដែលត្រូវឃាត់ខ្លួន រូមមាន ៖
១- ឈ្មោះដន ដេត ហៅ ដូច ភេទប្រុស ជនជាតិខ្មែរ ស្នាក់នៅបន្ទប់ជួលលេខ៣១ ផ្លូវលំ សង្កាត់ព្រែកប្រា ខណ្ឌច្បារអំពៅ មុខរបរ មិនពិតប្រាកដ (មានសារធាតុញៀន)។
២- ឈ្មោះខៀវ សុវណ្ណារ៉ាត់ ហៅ វីង ភេទប្រុស ជនជាតិខ្មែរ មុខរបរ បុគ្គលិកវីរះប៊ុនថាំង។ ស្នាក់នៅផ្ទះគ្នានលេខផ្លូវលំ ភូមិព្រែកតាងូវ សង្កាត់ព្រែកប្រា ខណ្ឌច្បារអំពៅ។
៣- ឈ្មោះវុន ណាង ហៅ តូ ភេទប្រុស ជនជាតិខ្មែរ មុខរបរជួសជុលម៉ូតូ ស្នាក់នៅផ្ទះគ្មាន លេខផ្លូវបេតុង ភូមិអូរអណ្តូង សង្កាត់ព្រែកប្រា ខណ្ឌច្បារអំពៅ។
៤- ឈ្មោះសែម សុធារិទ្ធ ភេទប្រុស ជនជាតិខ្មែរ មុខរបរ រត់តុការ ស្នាក់នៅផ្ទះគ្មានលេខ ផ្លូវបេតុង ភូមិអូរអណ្តូង សង្កាត់ព្រែកប្រា ខណ្ឌច្បារអំពៅ។
និង៥- ឈ្មោះកាន វណ្ណាហៅ រដ្ឋ ភេទប្រុស ជនជាតិខ្មែរ មុខរបរសិស្សសាលា។
ក្រោយការសាកសួរយកចម្លើយ ក្រុមជនសង្ស័យទាំង០៥នាក់ បានសារភាពថា ពួកខ្លួនមានបក្សពួកចំនួន ០៦នាក់ (គេចខ្លួនម្នាក់ឈ្មោះត្រា ភេទប្រុស អាយុហែល២០ឆ្នាំ) បានធ្វើសកម្មភាពធាក់ប្លន់យកម៉ូតូ ចំនូន០២លើក ៖
លើកទី១ ៖ នៅវេលាម៉ោង២១ និង៣០នាទីថ្ងៃទី១១ ខែតុលា ឆ្នាំ២០២១ ធាក់ប្លន់យកម៉ូតូ០១គ្រឿង ម៉ាកហុងដាស្កូបពី ពណ៍ស សេរីឆ្នាំ២០២១ ពាក់ផ្លាកលេខ ភ្នំពេញ IM 9244 និងគ្រឿងអលង្ការ (ខ្សែកមាស០១ដំឡឹង ខ្សែកប្លាទីន០២ដំឡឹង កងដៃប្លាកទីន២កង តម្លៃ៦០០ដុល្លារ លុយខ្មែរ ៣០ម៉ឺនរៀល និងទូរសព្ទ័ដៃ ០២គ្រឿង) ។
លើកទី២ ៖ នៅម៉ោង២២និង១៣នាទីថ្ងៃទី១៩ ខែតុលា ឆ្នាំ២០២១ នៅចំណុចដីឡូតិ៍គ្មានលេខ ផ្លូវថៃហ្គ័រ ភូមិទួលតាចាន់ សង្កាត់ព្រែកឯង ខណ្ឌច្បារអំពៅ ធាក់ប្លន់យកម៉ូតូស្កូបពី ០១គ្រឿង ពណ៍ស សេរីឆ្នាំ២០២១ ពាក់ផ្លាកលេខ ព្រៃវែង 1S-1641 ។ ចំពោះគ្រឿងអលង្ការពួកខ្លួនបានបោះចោលនៅស្ថានីយ៍ប្រេងកាល់តិច មុខប៉ុងឌីយ៉ាល់ ដោយគិតថា ជារបស់ក្លែងក្លាយ ។
សម្ភារៈ ដែលសមត្ថកិច្ចដកហូតបាន រួមមាន ៖ ម៉ូតូម៉ាកហុងដាសេ ១២៥ ពណ៍ខ្មៅ សេរីឆ្នាំ២០១៨ ពាក់ផ្លាកលេខ 1HI 8418 ជារបស់ជនសង្ស័យ ជិះធ្វើសកម្មភាព, ម៉ូតូម៉ាកស្សុយគី ពណ៍ស សេរីឆ្នាំ២០១៩ ពាក់ផ្លាកលេខ 1DD 4561 ជារបស់ជនសង្សយ័ ជិះធ្វើសកម្មភាព និងកាំបិតកែឆ្នៃ ចំនួន០១ ដើម ។
បច្ចុប្បន្នជនសង្ស័យទាំងអស់ខាងលើ ត្រូវបានកម្លាំងជំនាញកសាងសំណុំរឿងបញ្ជូនទៅកាន់សាលាដំបូងរាជធានីភ្នំពេញ ចាត់ការបន្តតាមនីតិវិធី ៕
ចែករំលែកព័តមាននេះ