- ភ្នំពេញ
ភ្នំពេញ៖ ប្តីប្រពន្ធឈ្លោះគ្នា ដុតចង្ក្រាន្ត រាលដាលបង្កជាអគ្គិភ័យ ឆេះផ្ទះអស់ ២ខ្នង ដែលនៅជាប់គ្នា។ នេះគឺជារឿងហេតុ ដែលមិនគួរកើតឡើង ក្នុងសង្គមខ្មែរយើងទៀតទេ…
ភ្នំពេញ៖ ប្តីប្រពន្ធឈ្លោះគ្នា ដុតចង្ក្រាន្ត រាលដាលបង្កជាអគ្គិភ័យ ឆេះផ្ទះអស់ ២ខ្នង ដែលនៅជាប់គ្នា។ នេះគឺជារឿងហេតុ ដែលមិនគួរកើតឡើង ក្នុងសង្គមខ្មែរយើងទៀតទេ ព្រោះគឺជារឿង «ខឹងខុស ខឹងខាត» ហើយចុងក្រោយ ឆេះអស់ទាំងផ្ទះខ្លួនឯង និងបង្កមហន្តរាយដល់ផ្ទះអ្នកជិតខាង ដែលត្រូវតែទទួលខុសត្រូវ សងថ្លៃខូចខាតឲ្យគេថែមទៀត។
ករណីគ្រោះអគ្គិភ័យនោះ បានកើតឡើង នៅវេលាម៉ោង ១១ និង ១០នាទី យប់ថ្ងៃទី២៣ ខែវិឆ្ឆិកា ឆ្នាំ២០២១ នៅតាមផ្លូវបេតុង ក្នុងភូមិខ្វា សង្កាត់ដង្កោ ខណ្ឌដង្កោ រាជធានីភ្នំពេញ។ ហេតុការណ៍នោះ ឆេះបំផ្លាញអស់ផ្ទះ ២ខ្នង រួមនឹងសម្ភារៈប្រើប្រាស់ផ្សេងទៀត។
លោកវរសេនីយ៍ឯក ព្រហ្ម យ៉ន នាយការិយាល័យបង្ការពន្លត់អគ្គិភ័យ និងសង្គ្រោះ នៃស្នងការដ្ឋាននគរបាលរាជធានីភ្នំពេញ បានឲ្យដឹងថា ម្ចាស់ផ្ទះ ដែលបង្កហេតុ ឈ្មោះ សូទ្វ ពិសិទ្ធ ភេទប្រុស អាយុ ២៧ឆ្នាំ ជាយោធា។ ចំពោះមូលហេតុ នៃការឆេះផ្ទះនេះ បណ្តាលមកពីប្តីប្រពន្ធឈ្លោះគ្នា ក៏ដុតចង្ក្រាន្ត ហើយរាលដាល បង្កជាអគ្គិភ័យ ឆេះផ្ទះតែម្តង។
ក្នុងហេតុការណ៍នោះ បណ្តាលឲ្យឆេះផ្ទះ ថ្មក្រោម ឈើលើ ទំហំ ៥ម៉ែត្រ គុណ ១៥ម៉ែត្រ ឆេះអស់ទាំងស្រុង រួមទាំងសម្ភារៈប្រើប្រាស់ ក៏ត្រូវឆេះអស់ដែរ។ ភ្លើងឆេះផ្ទះនោះ ក៏បានរាលដាលឆេះដល់ផ្ទះអ្នកជិតខាង ទំហំ ៧ម៉ែត្រ គុណ ១៧ម៉ែត្រ ត្រូវឆេះអស់ទាំងស្រុង។
ប៉ូលិសបានប្រើប្រាស់រថយន្ដការិយាល័យបង្ការ និងពន្លត់អគ្គិភ័យ ចំនួន ៦គ្រឿង ប្រើប្រាស់ទឹកអស់ ៦ឡាន ស្មើនឹង ២៤ម៉ែត្រគូប និងរថយន្តពន្លត់អគ្គិភ័យ ជំនួយមកពីក្រុមហ៊ុនស្រាបៀរកម្ពុជា ចំនួន ១គ្រឿង ប្រើប្រាស់ទឹកអស់ ១ឡាន ស្មើនឹង ៦ម៉ែត្រគូប ទើបភ្លើងរលត់ទាំងស្រុង នៅវេលាម៉ោង ១១ និង ៥៥នាទីយប់។
ករណីនេះ កើតឡើងដោយសារតែការខឹងខុស ខឹងខាត ផ្តើមចេញពីជម្លោះប្តីប្រពន្ធ ក៏ក្លាយជារឿងបង្កជាបទល្មើស ដុតផ្ទះ ហើយមិនត្រឹមតែឆេះផ្ទះខ្លួនឯង ខានបានរស់នៅទេ តែក៏បានបំផ្លាញដល់ផ្ទះអ្នកជិតខាងថែមទៀត។ ចូរកុំភ្លេចថា «បើខឹង នោះរឿងតូច នឹងក្លាយជារឿងធំ»។ ដូច្នេះរឿងអ្វីក៏ដោយ ត្រូវតែដោះស្រាយ ដោយសន្តិវិធី តាមរយៈការអង្គុយពិភាក្សាគ្នា ហើយបើដោះស្រាយមិនចេញរវាងប្តីប្រពន្ធតែ ២នាក់ទេ គឺត្រូវរកចាស់ទុំ ជាឪពុកម្តាយ មីមា បងប្អូន មកជួយសម្របសម្រួល ដោយត្រូវធ្វើរឿងធំ ឲ្យក្លាយជារឿងតូច ហើយពីរឿងតូច ឲ្យក្លាយជាគ្មានរឿង។
ករណីឈ្លោះប្តីប្រពន្ធ ហើយទៅដុតផ្ទះនេះ មានអ្វីចំណេញ? ចុងក្រោយឆេះអស់ទាំងផ្ទះខ្លួនឯង ខានបានរស់នៅ ហើយថែមទាំងបង្កឲ្យឆេះផ្ទះអ្នកជិតខាង ដែលគ្នាមិនដឹងរឿងអ្វីសោះថែមទៀត។ តាមច្បាប់ ជនបង្កឲ្យមានអគ្គិភ័យ ភ្លើងឆេះផ្ទះនេះ ត្រូវទទួលខុសត្រូវ ដោយចេញសងថ្លៃខូចខាត។ នេះសំណាងហើយ ដែលមិនមានគ្រោះថ្នាក់ ដល់អាយុជីវិតមនុស្ស។ ចុះបើគ្រោះថ្នាក់ដល់អ្នកផ្សេងទៀត តើការខឹងក្រោធ ដោយសារតែឈ្លោះប្តីប្រពន្ធនោះ នឹងត្រូវទទួលខុសត្រូវកម្រិតណា?
ជាធម្មតា ប្តីប្រពន្ធ តែងតែមានរឿងឈ្លោះប្រកែកគ្នា អន់ចិត្តនឹងគ្នាហើយ។ តែបើឲ្យតែឈ្លោះ ខឹងគ្នា បែរជារករឿងឈ្លោះបន្ថែម នោះនឹងកើតរឿងកាន់តែធំ ហើយរហូតដល់សម្រេចចិត្តដុតផ្ទះចោលថែមទៀតដូច្នេះ តើឲ្យកូន បានអ្វីរស់នៅ? ជីវិតប្តីប្រពន្ធ គឺឈ្លោះព្រឹក ត្រូវគ្នាល្ងាច ឬយប់ត្រូវគ្នាវិញ ជារឿងធម្មតា។
ករណីនេះ ជាមេរៀន ហើយយើងត្រូវនាំគ្នា ជៀសឲ្យឆ្ងាយ។ ពោលគឺឈ្លោះគ្នា បែបណាក៏ដោយ មិនថា ប្តីប្រពន្ធ ឬឈ្លោះគ្នា រវាងបងប្អូន ឬក៏ឈ្លោះជាមួយអ្នកជិតខាងទេ គឺធ្វើយ៉ាងណា ជៀសវាងនូវអំពើហិង្សា ទាំងពាក្យសម្តី និងទាំងកាយវិការ វាយតប់ បង្ករបួសស្នាម រួមទាំងការដុតផ្ទះនេះផង។ ម្យ៉ាង ក៏សូមកុំសម្រេចចិត្ត នៅពេលខឹង ព្រោះការសម្រេចចិត្តនៅពេលខឹងនោះ ច្រើនតែខុស។
ជាសរុបមក អ្វីៗក៏ដោយ ត្រូវតែដោះស្រាយតាមសន្តិវិធី ជាវិធីដ៏ល្អបំផុត។ ប្តីប្រពន្ធ បើដល់ដំណាក់កាល ឈ្លោះគ្នាខ្លាំង ហើយមិនអាចបន្តរស់នៅជាមួយគ្នាបានហើយ ត្រូវចែកផ្លូវ លែងលះគ្នា ដោយមិនត្រូវប្តី ឬប្រពន្ធ បង្កហិង្សា ឬក៏ខឹងគោ វ៉ៃរទេះ ដោយដុតបំផ្លាញផ្ទះ ឬបំផ្លាញទ្រព្យសម្បត្តិណានោះទេ។ ជម្លោះផ្សេងទៀត ក៏ដូចគ្នា។ បើស្វែងរកការចរចា ដោះស្រាយដោយសន្តិវិធី ដោយមានទាំងអ្នកសម្របសម្រួលផង នៅតែមិនត្រូវគ្នា គឺនៅមានយន្តការផ្លូវច្បាប់ ដែលត្រូវប្តឹង ទៅកាន់អាជ្ញាធរសមត្ថកិច្ច ហើយចុងក្រោយ បើនៅតែមិនអាចសះជានឹងគ្នា គឺត្រូវប្តឹងឡើងទៅតុលាការ។ ស្រុកយើង មានច្បាប់ ដែលមិនអាចឲ្យជនណាមួយ រំលោភបំពាន ហើយបង្កហិង្សា ទោះជាតាមពាក្យសម្តី ហិង្សាដោយបង្ករបួសស្នាម វាយតប់ ឬក៏ដុតផ្ទះដូច្នេះឡើយ៕
ចែករំលែកព័តមាននេះ