ខេត្តកំពត ៖ កាស៊ីណូសាន់រ៉ាយដែលមានទីតាំងស្ថិតនៅក្បែរច្រកទ្វារអន្តរជាតិព្រែកចាកស្រុកកំពង់ត្រាច បានត្រូវបិទទ្វារដោយខ្លួនឯងកាលពីដើមខែមករាកន្លងទៅនេះ បន្ទាប់ពីបានដំណើរការមួយរយៈពេលខ្លីដោយមានល្បែងស៊ីសងជាច្រើនប្រភេទរាប់ទាំងល្បែងភ្នាល់បញ្ជល់មាន់ផង ។ ការដួលរលំរបស់កាស៊ីណូមួយនេះម្ចាស់ភាគហ៊ុនជាច្រើនមិនហ៊ានចេញមុខមកអះអាងទេ ព្រោះមានបុគ្គលិកជាច្រើននាក់បានមកចាំទារលុយប្រាក់ខែពីថៅកែរបស់ខ្លួន ។ យោងតាមសំដីបុរសដែលជាអ្នកមើលការខុសត្រូវក្នុងកាស៊ីណូសាន់រ៉ាយម្នាក់បាននិយាយថា កាស៊ីណូសាន់រ៉ាយបានបិទទ្វារដោយខ្លួនឯង ហើយការបិទទ្វារនេះ ក៏ព្រោះតែគ្មានមនុស្សចូលមកលេងល្បែងសូម្បីតែខ្សែបណ្តាញអគ្គិសនីក៏ត្រូវបានកាត់ផ្តាច់ផងដែរ ។
ប្រភពដដែលបានបន្តថា ម្ចាស់ភាគហ៊ុនរបស់កាស៊ីណូសាន់រ៉ាយទាំងអស់មិនមានទំនុកចិត្តគ្នាទាល់តែសោះ ទើបមិនមានលុយបោះទុនឱ្យអ្នកលេងសំរាប់ការដាក់បញ្ចាំរបស់។ លោកហ៊ាន សុផល ប្រធាននគរបាលត្រួតពិនិត្យច្រកទ្វារអន្តរជាតិព្រែកចាក មិនបានបំភ្លឺពីការក្ស័យធនរបស់កាស៊ីណូសាន់រ៉ាយនេះទេ ដោយលោកនិយាយថា កុំចង់ដឹងរឿងគេច្រើននាំតែគេស្អប់ ។ រីឯលោកខេង ជាប្រធានកងរាជអាវុធហត្ថស្នាក់ការព្រែកចាកនិយាយថា កាស៊ីណូទាំងអស់មិនមានមន្ត្រីប៉េអឹមណាទៅទទួលខុសត្រូវទេ ព្រោះម្ចាស់គេជាអ្នកទទួលខុសត្រូវពេលកើតបញ្ហា ។ លោកប៊ូ សមសាក់ អតីតស្នងការរងខេត្តកំពតដែលជាម្ចាស់ភាគហ៊ុនមួយរូបផងដែរ ហើយលោកជាអ្នកចាត់ចែងសាងសង់កាស៊ីណូនេះ កាលពីពាក់កណ្តាលខែមករាកន្លងទៅថ្មីៗនេះសាលាដំបូងខេត្តកំពតបានចេញលិខិតអញ្ជើញឱ្យលោកចូលខ្លួន ដើម្បីសាកសួរ ។ គេមិនដឹងថា សាកសួរពីបញ្ហាអ្វីទេ តែអាចទំនងជារឿងដីធ្លីច្រើនជាងជំលោះក្នុងកាស៊ីណូ ។
មានការសំគាល់ថា នៅច្រកទ្វារអន្តរជាតិព្រែកចាកមានកាស៊ីណូ៤ ហើយកាស៊ីណូធំជាងគេឈ្មោះហាទៀង វេហ្គាស មានបុគ្គលិកធ្វើការ៨០០នាក់ ។ ចំពោះកាស៊ីណូសាន់រ៉ាយពេលនេះមួយថ្ងៃៗគេឃើញតែបុគ្គលិកមកចាំទារប្រាក់ខែដែលមិនទាន់បើកឱ្យពួកគេ ឯលោកប៊ូ សមសាក់ ត្រូវបានមន្ត្រីតុលាការថា លោកក៏មិនទាន់បានចូលខ្លួនបំភ្លឺនៅសាលាដំបូងដែរ ។ ដោយឡែកកាស៊ីណូមួយទៀតឈ្មោះសាន់ដេ ដែលមានទីតាំងជាប់គ្នាដែរ ម្ចាស់កាស៊ីណូនេះក៏ត្រូវបានកំលាំងកងរាជអាវុធហត្ថលើផ្ទៃប្រទេសចាប់ខ្លួន កាលពីចុងឆ្នាំ២០១០ដែរ តែមិនបានប៉ុន្មានថ្ងៃផង ក៏ដោះលែងវិញ ហើយមិនត្រូវគេដឹងពីរឿងរ៉ាវនោះដែរ ៕
ចែករំលែកព័តមាននេះ