រាជធានីភ្នំពេញ ៖ ការដ្ឋានសំណង់ដ៏រឹងមាំមួយកន្លែងកំពុងតែដំណើរការសាងសង់រំលោភយកច្រាំងទន្លេមេគង្គប្រមាណជាង១០ម៉ែត្រចូលទៅក្នុងផ្ទៃទឹកទន្លេ ហើយពុំត្រូវបានអាជ្ញាធរខណ្ឌជ្រោយចង្វារមើលឃើញចុះទៅហាមឃាត់ទប់ស្កាត់ឡើយ ដែលគេសង្ស័យថា អាចមានការឃុបឃិត ។ តែទោះបីជាយ៉ាងណា គេពុំដឹងថា សំណង់នោះមានច្បាប់ឬយ៉ាងណានោះទេ…
រាជធានីភ្នំពេញ ៖ ការដ្ឋានសំណង់ដ៏រឹងមាំមួយកន្លែងកំពុងតែដំណើរការសាងសង់រំលោភយកច្រាំងទន្លេមេគង្គប្រមាណជាង១០ម៉ែត្រចូលទៅក្នុងផ្ទៃទឹកទន្លេ ហើយពុំត្រូវបានអាជ្ញាធរខណ្ឌជ្រោយចង្វារមើលឃើញចុះទៅហាមឃាត់ទប់ស្កាត់ឡើយ ដែលគេសង្ស័យថា អាចមានការឃុបឃិត ។ តែទោះបីជាយ៉ាងណា គេពុំដឹងថា សំណង់នោះមានច្បាប់ឬយ៉ាងណានោះទេ ?
សំណង់ដែលកំពុងតែសាងសង់រំលោភច្រាំងទន្លេនេះ ស្ថិតនៅខាងត្បូងទីបញ្ជាការកងព័ទជើងទឹក ក្នុងភូមិទី៣ សង្កាត់ជ្រោយចង្វារ ខណ្ឌជ្រោយចង្វារ រាជធានីភ្នំពេញ។ សំណង់នេះគេដឹងថា បានដំណើរការសាងសង់ជាច្រើនខែមកហើយ ដោយបុកគ្រឹះ ចូលក្នុងផ្ទៃទឹកទន្លេមេគង្គប្រមាណជាង១០ម៉ែត្រដោយចាក់បេតុងក្រវ៉ាត់ជុំវិញ ដើម្បីរំលោភយកដីនិងបានបូមខ្សាច់ដាក់។
នៅព្រឹកថ្ងៃទី២៣ វិច្ឆិកា នេះ គេឃើញក្រុមជាងកំពុងតែជីកគ្រឹះដើម្បីធ្វើសំណង់លើដីដែលបានរំលោភនោះ ។ ប្រជាពលរដ្ឋ ដែលបានធ្វើដំណើរឆ្លងកាត់ឃើញ ម្នាក់ៗធ្វើការិះគន់ថា ដីច្រាំងទន្លេសុទ្ធសាធ បែរជាអាជ្ញាធរមើលមិនឃើញ ឬអនុញ្ញាតអោយគេរំលោភយកមកធ្វើជាកម្មសិទ្ធិទៅវិញ ។
គេពុំដឹងថា សំណង់នោះមានម្ចាស់ឈ្មោះអ្វីឡើយ។ បើសិនគ្មានភ្លើង ខៀវ ពីអាជ្ញាធរនោះទេ មិនអាចដំណើរការសាងសង់រំលោភបែបនោះទេ ។ អាជ្ញាធរសូម្បីតែធ្វើរបងបន្តិចបន្តួច ឬធ្វើរោងក៏ដឹងដែរ ទំរាំតែសំណង់រំលោភច្រាំងទន្លេបែបនេះរឿងអីមិនដឹង?
គួរបញ្ជាក់ថា ច្រាំងទន្លេសាប និងច្រាំងទន្លេមេគង្គនៅក្នុងមូលដ្ឋាន ខណ្ឌជ្រោយចង្វារ កំពុងតែត្រូវប៉ាន់បានក្រុមហ៊ុន និងអ្នកមានលុយ មានអំណាច បក្សពួក បុកគ្រឹះ ធ្វើរបង រំលោភយកជាកម្មសិទ្ធិបណ្តើរៗហើយ ពុំត្រូវបានអាជ្ញាធរ ខណ្ឌរាជធានីភ្នំពេញ ឬមន្ត្រីជំនាញយកចិត្តទុកដាក់ទប់ស្កាត់នោះទេគឺបណ្តោយអោយរំលោភយកតាមចិត្តតែម្តងទើបវាយកម្ទេចពេលក្រោយឬ?
កន្លងមក ភូមិគ្រឹះធំៗស្ថិតនៅក្នុងភូមិដើមគ សង្កាត់ព្រែកតាសេក ខណ្ឌជ្រោយចង្វារ បានសាងសង់ដោយបុកគ្រឹះរំលោភចូលច្រាំងទន្លេប្រមាណជាង២០ម៉ែត្រ ។ ក្រៅពីនោះ ក៏មានសំណង់របងជាច្រើនទៀត កំពុងតែសង់រំលោភយកច្រាំងទន្លេសាប ហើយសំណង់ទាំងនោះ បានសាងសង់រួចរាលើហើយ និងខ្លះទៀតកំពុងតែសាងសង់។ ក្រៅពីនោះ នៅតាមដងទន្លេមេគង្គវិញកំពុងរង់ការរំលោភយកដូចគ្នាដែរ ដូចជានៅខាងជើង កំពុងស្វាយជ្រុំនិងនៅខាងត្បូងបន្ទាយទាហានជើងទឹកក្នុងសង្កាត់ជ្រោយចង្វារជាដើម។
ទាក់ទិនសំណង់រំលោភច្រាំងនេះ កោះសន្តិភាពបានព្យាយាមទាក់ទង់បំភ្លឺពីលោកឃ្លាំង ហួត អភិបាលខណ្ឌជ្រោយចង្វារ តែពុំអាចទាក់ទងបាន ។ ចំណែក លោកកៅ សារ៉ាវុធ អភិបាលរងខណ្ឌជ្រោយចង្វារទទួលបន្ទុកសំណង់ បានអោយដឹងថា សំណង់នោះមានច្បាប់អនុញ្ញាតពីរដ្ឋបាលរាជធានីភ្នំពេញធ្វើកំពុងផែ។ តាមទិដ្ឋភាពជាក់ស្តែង សំណង់នោះហាក់ដូចជាមិនមែនកំពង់ផែនោះទេ។ គេមានការងឿងឆ្ងល់ថា តើច្បាប់អនុញ្ញាតអោយគេរំលោភទន្លេបែបនេះ?
សំណង់កំពង់ផែអីធ្វើតូចប៉ុណ្ណឹង? ថ្ងៃក្រោយបើសំណង់រឹងមាំគេធ្វើបាននរណាទៀតក៏ធ្វើបានដែរ ធ្វើបានពេញលើច្រាំងទន្លេ ដើម្បីស្មើភាពគ្នា ។
ព័ត៌មានពិស្តារមានផ្សាយជូននៅលើកាសែតកោះសន្តិភាព ។
ចែករំលែកព័តមាននេះ