- ភ្នំពេញ
ភ្នំពេញ៖ ក្នុងពេលឈប់សម្រាកនៃព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក ៣ថ្ងៃ ត្រូវនឹងថ្ងៃទី១៨-២០ ខែវិច្ឆិកា ឆ្នាំ២០២១ ក្រសួងទេសចរណ៍…
ភ្នំពេញ៖ ក្នុងពេលឈប់សម្រាកនៃព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក ៣ថ្ងៃ ត្រូវនឹងថ្ងៃទី១៨-២០ ខែវិច្ឆិកា ឆ្នាំ២០២១ ក្រសួងទេសចរណ៍…
ភ្នំពេញ៖ ក្នុងពេលឈប់សម្រាកនៃព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក ៣ថ្ងៃ ត្រូវនឹងថ្ងៃទី១៨-២០ ខែវិច្ឆិកា ឆ្នាំ២០២១ ក្រសួងទេសចរណ៍ ប្រកាសថា នៅទូទាំងប្រទេស មានអ្នកទេសចរ សរុបចំនួន ៩១០ ១៥០នាក់ ក្នុងនោះ ភ្ញៀវជាតិ មានចំនួន ៨៩៩ ៨៦៩នាក់ និងភ្ញៀវបរទេសផ្ទៃក្នុង ១០ ២៨១នាក់។ នៅរាជធានីភ្នំពេញ ទោះបីជាឆ្នាំនេះ មិនមានរៀបចំពិធីបុណ្យអុំទូក បណ្តែតប្រទីប នៅមុខព្រះបរមរាជវាំង តែមានអ្នកទេសចរ ដើរលេងច្រើនជាងគេ រហូតដល់ ១៩៩ ៨៣៥នាក់។
កំណើនអ្នកទេសចរនេះ ក៏បង្កើតជាសំរាមច្រើនដែរ។ តែនៅរយៈពេល ៣ថ្ងៃនេះ គ្រាន់តែភ្លឺភ្លាម នៅមុខព្រះបរមរាជវាំង និងតាមផ្លូវជួរមាត់ទន្លេ ក្នុងរាជធានីភ្នំពេញ និងនៅខាងជ្រោយចង្វារ គឺមានក្រុមអ្នកបោសសម្អាត និងឡានដឹកជញ្ជូនសំរាម ហើយមានទាំងឡានបាញ់ទឹក និងបោសសម្អាតផ្លូវឡើងស្អាតឡើងវិញ។
នៅជ្រោយចង្វារ តាមផ្លូវមាត់ទន្លេ បានដាក់ពង្រាយធុងសំរាម ១០ម៉ែត្រ មានធុងសំរាម ១ ទៅ ២ ហើយនៅពេលព្រឹកៗ មានក្រុមអ្នកប្រមូល និងបោសសម្អាត ដោយមានឡានដឹកជញ្ជូនសំរាមទាំងនោះ ឡើងស្អាតផ្លឹង។ ប៉ុន្តែនៅខាងរង្វង់មូលនាងមច្ឆា ខាងតំបន់អភិវឌ្ឍន៍ជ្រោយចង្វារ សំរាមហាក់ដូចជារាយប៉ាយបន្តិច បើទោះបីជាមានធុងសំរាមច្រើនហើយក៏ដោយ តែធុងសំរាមទាំងនោះ ពោរពេញដោយសំរាម ជាហេតុនាំឲ្យមានអ្នកបោះចោលសំរាមតាមផ្លូវ និងនៅកន្លែង ដែលអ្នកទៅដើរលេង វាតវង់អង្គុយផឹកស៊ី តាមចិញ្ចើមផ្លូវ និងនៅលើទីវាលម្តុំរង្វង់មូលនាងមច្ឆា។ ប៉ុន្តែនៅព្រឹកម៉ោង ៨-៩ ក៏មានក្រុមអ្នកបោសសម្អាត និងដឹកជញ្ជូនសំរាមកាកសំណល់ទាំងនោះ យកចេញទាំងឡានៗ។
ចំណែកនៅវាលកោះពេជ្រ មុខរោងមហោស្រព នៅពេលព្រឹកៗ ក្នុងរយៈពេល ៣ថ្ងៃ នៃការឈប់សម្រាកបុណ្យអុំទូកនេះ មានអ្នកទៅលេងច្រើន ហើយក៏វេចខ្ចប់នំចំណី ម្ហូបអាហារ ភេសជ្ជៈ និងស្រាបៀ ផឹកស៊ីទាំងក្រុមៗ នៅពេលព្រលប់ រហូតដល់យប់។ ប៉ុន្តែអ្នកផឹកស៊ីមួយចំនួនណានោះ អន់ចរិត គឺស៊ីផឹករួច មិនប្រមូលកាកសំណល់ ថង់ផ្លាស្ទិក ប្រអប់ជ័រ កែវជ័រ និងដបទឹកសុទ្ធ ជាដើម យកទៅបោះចោលនៅធុងសំរាមនោះទេ។ គឺកាកសំណល់ជាច្រើន នៅរាយប៉ាយពេញទីវាល នៅកោះពេជ្រនោះ។
យ៉ាងណាក៏ដោយ នៅកោះពេជ្រ មិនសូវមានធុងសំរាមច្រើនទេ ហើយធុងសំរាម ដែលដាក់ពង្រាយតាមផ្លូវ ក៏ពេញហៀរដោយសំរាម ដោយមានទាំងថង់ខ្មៅធំៗ ក៏មានសំរាម កាកសំណល់ពេញៗ ដែរ។
ក៏ប៉ុន្តែទន្ទឹមនឹងបញ្ហាសំរាម រាងធូរស្រាលជាងឆ្នាំកន្លងៗមក ដែលមានប្រារព្ធពិធីបុណ្យអុំទូក បណ្តែតប្រទីប អកអំបុក និងសំពះព្រះខែ នៅមុខព្រះបរមរាជវាំង គឺសណ្តាប់ធ្នាប់ ហាក់ដូចជាអាជ្ញាធរសមត្ថកិច្ច បើកដៃឲ្យអ្នកលក់ដូរចំណីអាហារ ក្រាលកន្ទេល លើសួនស្មៅ មុខព្រះបរមរាជវាំង បណ្តាលឲ្យបាត់សោភណ្ឌភាព និងខូចងាប់ស្មៅទាំងនោះ ថែមទៀត។
មែនទែនទៅ បើសិនជាអាជ្ញាធរសមត្ថកិច្ច មិនយកលុយពីអ្នកលក់ដូរទាំងនោះ ក៏អ្នកលក់ដូរទាំងអស់នោះ មិនអាចបោះទីតាំងលក់ដូរ និងរហូតហ៊ានក្រាលកន្ទេល អង្គុយលើស្មៅ និងដើរជាន់ស្មៅ លើសួនច្បារឡើយ។ នេះគឺជាការធ្វេសប្រហែស នាំដល់ការបំផ្លាញទ្រព្យសម្បត្តិជាតិ។ នៅក្រោយការឈប់សម្រាកពិធីបុណ្យនេះ អាជ្ញាធរខណ្ឌដូនពេញ ឬក៏អាជ្ញាធររាជធានីភ្នំពេញ ច្បាស់ជាត្រូវឡើងគម្រោង ស្នើសុំលុយរដ្ឋ យកមកជួសជុល ថែទាំ ឬក៏ត្រូវដាំស្មៅថ្មី លើសួនច្បារមុខព្រះរាជវាំង ដែលគេក្រាលកន្ទេលអង្គុយលើ និងដើរជាន់ទាំងនោះ ជាមិនខាន។
អ្នកដើរលេងទៀតសោត ក៏ហាក់ដូចជា មិនយល់អ្វីសោះតែម្តង។ សុខចិត្តដើរជាន់ស្មៅ លើសួនច្បារ ខណៈដែលអ្នកមានផ្លូវក្រាលថ្មក្រានីត នៅព័ទ្ធជុំវិញសួនច្បារ ដែលដាំស្មៅទាំងនោះ តែមិនព្រមដើរ។ ចំណែកអ្នកអង្គុយស៊ីនំចំណីអាហារ និងផឹកស៊ីនោះទៀតសោត ក៏មិនកោធក្រែងអ្វីសោះ ក៏ចំណាយលុយ ដើម្បីបានបំផ្លាញទ្រព្យសម្បត្តិសាធារណៈ និងធ្វើឲ្យបាត់បង់សោភ័ណ្ឌភាពសួនច្បារ ដែលជាទីទាក់ទាញ នៅមុខព្រះបរមរាជវាំង ដោយគ្មានគិតអ្វីសោះឡើយ។
តែទាំងអស់នេះ ក៏ដោយសារតែអាជ្ញាធរសមត្ថកិច្ច ជាអ្នកបើកដៃ ដោយយកលុយពីក្រុមអ្នកលក់ដូរទាំងអស់នោះដែរ។ នៅថ្ងៃធម្មតា សូម្បីតែអ្នកទៅលេងមុខវាំង បាចចំណីឲ្យព្រាប នៅលើសួនច្បារមុខព្រះបរមរាជវាំងនោះ ក៏ត្រូវអាជ្ញាធរខណ្ឌដូនពេញ ហាមឃាត់ ហើយបើមានអ្នកល្មើស នឹងត្រូវចាប់ផាកពិន័យថែមទៀតផង។
ជាសរុបទៅ ទាំងសន្តិសុខ សុវត្ថិភាពអ្នកដើរលេង នៅថ្ងៃឈប់សម្រាកបុណ្យអុំទូកឆ្នាំនេះ ចាត់ទុកថា ល្អប្រសើរ ទោះពីជាអំឡុងពេល ៣ថ្ងៃនេះ មានអ្នកឆ្លងកូវីដ ១២៦នាក់ ជាសះស្បើយ ១២៤នាក់ និងស្លាប់ ១៣នាក់ ហើយគ្រោះថ្នាក់ចរាចរណ៍ នៅទូទាំងប្រទេស រយៈពេលឈប់សម្រាកបុណ្យអុំទូក ៣ថ្ងៃនេះ សម្លា.ប់មនុស្ស ២២នាក់ និងរបួស ៤៤នាក់ ក៏ដោយ។
ចំណែកបញ្ហាសំរាម ក៏ហាក់ដូចជា ប្រជាពលរដ្ឋយើង យល់ដឹងច្រើន ហើយអាជ្ញាធរសមត្ថកិច្ច ក៏ដាក់ពង្រាយធុងសំរាមច្រើន និងចាត់កម្លាំងការងារ បោសសម្អាតបានទាន់ពេលវេលា មិនឲ្យសំរាមនៅបង្ហាញអ្នកទេសចរដូចឆ្នាំមុនៗឡើយ។ តែការរក្សាសោភ័ណ្ឌភាពតាមសួនច្បារ នៅមិនទាន់ល្អ ដោយអាជ្ញាធរសមត្ថកិច្ច នៅអនុញ្ញាតឲ្យមានអ្នកលក់ដូរក្រាលកន្ទេល សម្រាប់អ្នកដើរលេង អង្គុយទទួលទាននំចំណីអាហារ ដោយមិនខ្វល់អ្វីទាល់តែសោះ៕
ចែករំលែកព័តមាននេះ