រាជធានីភ្នំពេញ ៖ កាលពីពេលថ្មីនេះ លោកញៀន សុខវិសាល មន្ត្រីសម្របសម្រួលសហព័ន្ធកីឡាស្គីទឹកកកកម្ពុជាបានឱ្យដឹងថា កម្ពុជាត្រៀមបញ្ជូនប្រតិភូកីឡារបស់ខ្លួនទៅចូលរួមប្រកួតក្នុងព្រឹត្តិការណ៍កីឡាអាស៊ីរដូវរងា
រាជធានីភ្នំពេញ ៖ កាលពីពេលថ្មីនេះ លោកញៀន សុខវិសាល មន្ត្រីសម្របសម្រួលសហព័ន្ធកីឡាស្គីទឹកកកកម្ពុជាបានឱ្យដឹងថា កម្ពុជាត្រៀមបញ្ជូនប្រតិភូកីឡារបស់ខ្លួនទៅចូលរួមប្រកួតក្នុងព្រឹត្តិការណ៍កីឡាអាស៊ីរដូវរងា នៅប្រទេសជប៉ុនឆ្នាំក្រោយនេះ ។
លោកបានឱ្យដឹងទៀតថា សហព័ន្ធកីឡាស្គីទឹកកកកម្ពុជា ទើបតែបង្កើតឡើងបានមួយឆ្នាំប៉ុណ្ណោះ គឺបានបើកសម្ពោធជាផ្លូវការនៅខែកញ្ញា ឆ្នាំ២០១៥ ដែលមានលោក ម៉េង ហៀង ជាប្រធានសហព័ន្ធ ។ បច្ចុប្បន្ន មានកីឡាករ-កីឡាការិនីចំនួន៣១នាក់កំពុងហ្វឹកហាត់ ដោយសហព័ន្ធបានជ្រើសរើសយកទីលាន Ice Park Cambodia នៅក្នុងផ្សារទំនើបអុីអនម៉ល ធ្វើជាកន្លែងហ្វឹកហាត់ ។ លោកបញ្ជាក់ថា ការប្រកួតកីឡាអាស៊ីរដូវរងាឆ្នាំក្រោយនេះ គឺជាលើកទី៨ហើយដែលនឹងចាប់ផ្ដើមធ្វើពីថ្ងៃទី១៩ ដល់ថ្ងៃទី២៦ កុម្ភៈ នៅទីក្រុងសាប៉ូរ៉ូ ប្រទេសជប៉ុន ដោយមានប្រទេសចំនួន៣២នៅក្នុងទ្វីបអាស៊ីចូលរួមប្រកួត ។ ម្យ៉ាងវិញទៀត នេះគឺជាលើកទី១ហើយដែលកម្ពុជាគ្រោងបញ្ជូនប្រតិភូកីឡារបស់ខ្លួនមួយចំនួនឱ្យទៅចូលរួមប្រកួតនៅក្នុងព្រឹត្តិការណ៍កីឡាអាស៊ីរដូវរងាមួយនេះ ។
គួររំលឹកផងដែរថា កីឡាស្គីទឹកកកជាប្រភេទកីឡាដែលមានចលនារហ័សរហួន ទន់ភ្លន់ ពិបាកហ្វឹកហាត់បំផុត ។ សម្រាប់បណ្ដាប្រទេសដទៃ គេមានកីឡានេះមុនយើងជាយូរមកហើយ ដូច្នេះការទៅប្រកួតលើកនេះ កម្ពុជាប្រហែលជាមិនងាយដណ្ដើមបានមេដាយឡើយ តែយ៉ាងហោចណាស់ ក៏យើងមានឱកាសស្វែងរកបទពិសោធន៍ឱ្យបានច្រើនបន្ថែមទៀតដែរ ។
លោក វ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា បានមានប្រសាសន៍ថា ព្រឹត្តិការណ៍កីឡាអាស៊ីរដូវរងាគឺត្រូវបានគេរៀបចំធ្វើឡើងរយៈពេល២ឆ្នាំម្ដង ជា ប្រភេទកីឡាអូឡាំពិក ។ សម្រាប់ការប្រកួតកីឡាស៊ីហ្គេមលើកទី៣២ ឆ្នាំ២០២៣ ដែលកម្ពុជាទទួលធ្វើជាម្ចាស់ផ្ទះក៏គ្រោងដាក់បញ្ចូលប្រភេទកីឡាមួយនេះចូលរួមប្រកួតដែរ។ ដូច្នេះ ចាប់ពីពេលនេះទៅ យើងទាមទារឱ្យមានការទៅចូលរួមប្រកួតនៅក្រៅប្រទេសឱ្យបានច្រើន ៕
ចែករំលែកព័តមាននេះ