អត្ថប្រយោជន៍សុខភាពដែលបានមកពីការហាត់ប្រាណទៀងទាត់ជាបញ្ហាមួយដែលគេមិនគួរមើលរំលង ។ ចូរចាប់យកអត្ថប្រយោជន៍ទាំងនេះទៅធ្វើជាកម្មសិទ្ធិរបស់លោកអ្នក។ តាមអ្នកជំនាញ ការធ្វើសកម្មភាពរាងកាយទៀងទាត់
អត្ថប្រយោជន៍សុខភាពដែលបានមកពីការហាត់ប្រាណទៀងទាត់ជាបញ្ហាមួយដែលគេមិនគួរមើលរំលង ។ ចូរចាប់យកអត្ថប្រយោជន៍ទាំងនេះទៅធ្វើជាកម្មសិទ្ធិរបស់លោកអ្នក។ តាមអ្នកជំនាញ ការធ្វើសកម្មភាពរាងកាយទៀងទាត់រាល់ថ្ងៃផ្តល់អត្ថប្រយោជន៍សំខាន់ៗ៧ចំណុចដូចខាងក្រោម ៖
១-ជួយទប់ទល់ការឡើងទម្ងន់ខ្លួន ៖ ហាត់ប្រាណទៀងទាត់ជួយទប់ស្កាត់ល្បឿននៃការឡើងទម្ងន់ ។ នៅពេលរាងកាយមានសកម្មភាព កាឡូរីនឹងត្រូវដុតបំផ្លាញ(ធ្វើសកម្មភាពរាងកាយកាន់តែយូរ ការដុតបំផ្លាញកាឡូរីកាន់តែច្រើនផងដែរ) ។ គេមិនចាំបាច់ត្រូវការពេលវេលាច្រើនដើម្បីធ្វើវានោះទេ ។ ប្រសិនជាលោកអ្នកគ្មានពេលទៅក្លឹប សកម្មភាពប្រចាំថ្ងៃក៏អាចចាត់ទុកជាការហាត់ប្រាណបានដែរ ។ លោកអ្នកអាចជំនួសការឡើងជណ្តើរយន្តដោយជណ្តើរថ្មើជើង ឬជំនួសដោយការបើកបរទៅធ្វើការដោយការដើរឬជិះកង់ទៅធ្វើការ ។
២-ប្រឆាំងនឹងជំងឺកាចសាហាវផ្សេងៗ ៖ តើលោកអ្នកភ័យខ្លាចកើតមានជំងឺបេះដូង លើសឈាម ទឹកនោមផ្អែម មហារីក ជំងឺដាច់សរសៃឈាមក្នុងខួរក្បាល ឡើងខ្លាញ់កូឡេស្តេរ៉ូល/Triglycerides…ដែរទេ ? តាមពិតទៅ ការហាត់ប្រាណទៀងទាត់មិនអាចព្យាបាលជំងឺទាំងអស់នេះទេ ប៉ុន្តែវាត្រឹមតែអាចបង្ការឬកាត់បន្ថយហានិភ័យប៉ុណ្ណោះ ។
៣-ធ្វើឱ្យល្អប្រសើរដល់សុខភាពផ្លូវចិត្ត ៖ ការហាត់ប្រាណចាប់ពី៣០នាទីឡើងទៅពិតជាជួយបំបាត់ភាពតានតឹងក្នុងចិត្តបានមួយចំណែកធំដ្បិតសកម្មភាពរាងកាយនឹងជួយលើកកម្លាំងដល់បណ្តាសារធាតុគីមីផ្សេងៗក្នុងខួរក្បាល ហើយបន្ទាប់មកធ្វើឱ្យលោកអ្នកមានអារម្មណ៍ស្រស់ស្រាយប្រកបដោយទំនុកចិត្ត ។
៤-ជួយបង្កើនថាមពលរាងកាយ ៖ ការធ្វើសកម្មភាពរាងកាយទៀងទាត់អាចជួយធ្វើឱ្យប្រសើរដល់កម្លាំងសាច់ដុំ និងជួយបង្កើនភាពអំណត់ ។
៥-ជំរុញដល់ការទទួលទានដំណេក ៖ ធ្វើសកម្មភាពរាងកាយទៀងទាត់អាចជួយឱ្យអ្នកដេកឆាប់លក់ និងបានស្កប់ស្កល់ជាងពេលមុន ។
៦-ជួយធ្វើឱ្យល្អប្រសើរដល់ជីវិតផ្លូវភេទ ៖ ការសិក្សាស្រាវជ្រាវតាមបែបវិទ្យាសាស្ត្រកន្លងមកបានបង្ហាញថា ហាត់ប្រាណទៀងទាត់ជួយដាស់ចំណង់ផ្លូវភេទស្ត្រីខណៈបុរសជួយធ្វើឱ្យល្អប្រសើរដល់ភាពងើបរឹងរបស់អង្គជាតិ។ បណ្តាបុរសដែលហាត់ប្រាណទៀងទាត់ជួបហានិភ័យងាប់លិង្គតិចបំផុតធៀបនឹងបុរសដែលមិនហាត់ប្រាណ ។
៧-ជួយបង្កើនភាពរីករាយ ៖ ហាត់ប្រាណអាចជាមធ្យោបាយមួយជួយបង្កើនភាពរីករាយដល់ជីវិតដ្បិតវាបានបង្កលក្ខណៈនៃការជួបប្រាស្រ័យស្គាល់គ្នាជាមួយមនុស្សផ្សេងទៀតក្នុងសង្គមក៏ដូចជាជួយបង្កើនទំនាក់ទំនងពីបុគ្គលម្នាក់ទៅបុគ្គលម្នាក់ឱ្យកាន់តែជិតស្និទ្ធឡើង ៕
ចែករំលែកព័តមាននេះ