បើតាមអដ្ឋកថាពោលថា បុគ្គលដែលប្រកាន់ក្នុងផ្លូវខុសរមមែងមានកំហុសធំធេងណាស់ ក្នុងនោះមានយល់ថា មាតាមិនមានគុណ បិតាមិនមានគុណជាដើម អ្នកប្រកាន់ក្នុងផ្លូវខុសបែបនេះរមែងជាអ្នកមិនដែលស្គាល់សុគតិឡើយ ។ ខាងក្រោមនេះមានការរង្គាយសេចក្តីដូចតទៅ៖
ការប្រកាន់ក្នុងផ្លូវដែលខុសមានន័យថា ទានដែលបុគ្គលបានឱ្យហើយនឹងមិនមានផល បូជាធំមិនមានផល បូជាតូចមិនមានផល ផលវិបាកនៃកម្មដែលបុគ្គលធ្វើល្អ ឬធ្វើអាក្រក់មិនមាន លោកនេះមិនមាន លោកខាងមុខមិនមាន មាតាមិនមានគុណ បិតាមិនមានគុណ ពួកសត្វដែលកើតផងនិងចុះចាប់កំណើតផងគឺមិនមាន ។ ពួកសមណៈក្នុងលោកនេះ ជាអ្នកប្រព្រឹត្តល្អ ប្រតិបត្តិល្អ ធ្វើឲ្យជាក់ច្បាស់នូវលោកនេះនិងលោកខាងមុខ ដោយប្រាជ្ញាដ៏ឧត្តមដោយខ្លួនឯងក៏មិនមាន ។
ដំណើរគឺទិដ្ឋិ ការយល់ឆ្វេងគឺទិដ្ឋិ ការជាប់ចំពាក់គឺទិដ្ឋិ ការកួចកាន់ប្រកាន់មាំ ការប្រកាន់ខ្ជាប់ ការស្ទាបអង្អែល ផ្លូវអាក្រក់ ផ្លូវខុស ភាពនៃចិត្តខុស សេចក្ដីប្រកាន់ក្នុងការស្វែងរកខុសណាដែលមានសភាពបែបនេះ លោកហៅថាជាការយល់ខុស ទុគ្គតិរបស់សត្វពួកនេះរមែងប្រព្រឹត្តទៅខាងមុខជានិច្ច ៕ សាន សារិន
ចែករំលែកព័តមាននេះ