សម្លៀក​បំពាក់​ដែល​យើង​ប្រើ​ដើម្បី​ហាត់ប្រាណ ជាទូទៅមានក្លិនមិនល្អក្រោយពីប្រើប្រាស់រួច។ វាទាមទារការថែទាំពិសេសខុសពីសម្លៀកបំពាក់យើងធម្មតា ព្រោះថាវាផ្សំឡើងពីសាច់ក្រណាត់ខុសគ្នា និង ងាយមានបាក់តេរី អំបិល ជាតិ​ខ្លាញ់ ស្នាមប្រឡាក់ និង​កោសិកា​ស្បែក​ងាប់​ដែល​ជាប់​នឹង​សម្លៀកបំពាក់​ទាំងនេះ។ ថ្ងៃនេះ អ្នកនឹងបានស្គាល់ពីវិធីថែទាំសម្លៀកបំពាក់ហាត់ប្រាណរបស់អ្នកកុំឱ្យមានក្លិនមិនល្អ និង មិនខូចសាច់ក្រណាត់។

១. ដាក់បោកភ្លាមៗក្រោយពីពាក់រួច

អ្នកខ្លះចូលចិត្តពាក់ខោអាវហាត់កីឡា២ដង ដោយមិនដាក់បោក ប្រសិនបើពួកគេមិនបានបែកញើសជោគអាវនោះទេ។ នេះគឺជាការយល់ខុសទាំងស្រុង។ មិនថាអ្នកបានបែកញើសជោគឬអត់ សូមកុំស្លៀកសម្លៀកបំពាក់ហាត់ប្រាណនោះម្តងទៀត។ ម្យ៉ាងវិញទៀត កុំទុកវានៅក្នុងកន្ត្រកសំលៀកបំពាក់កខ្វក់អស់ជាច្រើនសប្តាហ៍ មុនពេលយកទៅបោក។ ប្រសិនបើ​អ្នក​មិន​អាច​បោកគក់​វា​ភ្លាមៗ​ទេ ចូរ​ទុក​វា​ចោល​ក្នុង​កន្លែងចំហំ ជាជាង​ទុក​វា​ក្នុង​ធុង​ខោអាវ​កខ្វក់​។

២. ត្រាំមុនពេលលាងសម្អាត

ដើម្បីអាចយកស្នាមកខ្វក់និងជាតិញើសចេញពីសម្លៀកបំពាក់នោះបានល្អ អ្នកត្រូវតែត្រាំវាចោលក្នុងទឹកខ្មេះរយៈពេល៣០នាទី មុនពេលបោក។ នេះក៏ព្រោះតែវាអាចជម្រះជាតិកខ្វក់បានច្រើនជាងការបោកគក់ធម្មតា។

៣. ដាក់ផ្នែកខាងក្នុងចេញមកខាងក្រៅ

ភាពកខ្វក់ និងបាក់តេរីភាគច្រើនស្ថិតនៅផ្នែកខាងក្នុងនៃសម្លៀកបំពាក់របស់អ្នក មិនមែននៅខាងក្រៅទេ។ ដូច្នេះ​បើ​អ្នក​ចង់​បោក​ខោអាវ​ឱ្យបាន​ត្រឹម​ត្រូវ ត្រូវ​បោក​ខោអាវ​ពី​ក្នុង​មក​ក្រៅ។

៥. ហាលវាឱ្យស្ងួតក្រោមពន្លឺថ្ងៃ

ប្រសិនបើអ្នកមានម៉ាស៊ីនបោកគក់ អ្នកប្រហែលជាត្រូវចូលចិត្តសម្ងួតវាដោយប្រើម៉ាស៊ីន។ ប៉ុន្តែវិធីល្អបំផុតដើម្បីសម្ងួតខោអាវហាត់ប្រាណ គឺត្រូវហាលវាចោលក្រោមពន្លឺថ្ងៃ។ នេះក៏ព្រោះតែ ម៉ាស៊ីនសម្ងួតអាចធ្វើឱ្យខូចក្រណាត់ប្រភេទសំយោគ រួញនិងខូចទ្រង់ទ្រាយ។ ម្យ៉ាងវិញទៀត ការហាលក្រោមពន្លឺព្រះអាទិត្យ ​ក៏​ជួយ​សម្លាប់​បាក់តេរី​ក្នុង​សម្លៀក​បំពាក់​ដែរ៕