- បន្ទាយមានជ័យ
ខេត្តបន្ទាយមានជ័យ៖ ករណីពុលអាល់កុល លាយភេសជ្ជៈ នៅក្នុងមណ្ឌលចត្តាឡីស័កកូវីដ១៩ កូបធំ ស្ថិតក្នុងភូមិកូបធំ សង្កាត់និមិត្ត ក្រុងប៉ោយប៉ែត ខេត្តបន្ទាយមានជ័យ កាលពីថ្ងៃទី៩…
ខេត្តបន្ទាយមានជ័យ៖ ករណីពុលអាល់កុល លាយភេសជ្ជៈ នៅក្នុងមណ្ឌលចត្តាឡីស័កកូវីដ១៩ កូបធំ ស្ថិតក្នុងភូមិកូបធំ សង្កាត់និមិត្ត ក្រុងប៉ោយប៉ែត ខេត្តបន្ទាយមានជ័យ កាលពីថ្ងៃទី៩…
ខេត្តបន្ទាយមានជ័យ៖ ករណីពុលអាល់កុល លាយភេសជ្ជៈ នៅក្នុងមណ្ឌលចត្តាឡីស័កកូវីដ១៩ កូបធំ ស្ថិតក្នុងភូមិកូបធំ សង្កាត់និមិត្ត ក្រុងប៉ោយប៉ែត ខេត្តបន្ទាយមានជ័យ កាលពីថ្ងៃទី៩ និងថ្ងៃទី១០ ខែវិច្ឆិកា ឆ្នាំ២០២១ មានអ្នកឈឺសរុប ២១នាក់ ( ស្ត្រី ២នាក់ )។ ក្នុងនោះ ៧នាក់ ( ស្ត្រីម្នាក់ ) បានស្លាប់។ ករណីនេះ អាចមកពីអាល់កុលក្លែងក្លាយ ហើយអ្នករងគ្រោះ ជាអ្នកញៀនស្រា ឃ្លានផឹកខ្លាំងពេក រហូតបែកគំនិត ច្នៃអាល់កុល ចេញជាស្រាដូច្នេះ។
ក្រសួងសុខាភិបាល ប្រកាសថា នៅថ្ងៃទី៩ និងថ្ងៃទី១០ ខែវិច្ឆិកា ឆ្នាំ២០២១ ជនរងគ្រោះ មួយចំនួន បានយកអាល់កុល មកលាយជាមួយទឹក ខ្លះយកមកលាយជាមួយទឹកក្រូចកូកាកូឡា និងមួយចំនួនទៀត លាយជាមួយទឹកអូអ៊ីឈិក នាំគ្នាពិសា រហូតដល់រសៀលថ្ងៃទី១១ ខែវិច្ឆិកា ប្រហែលម៉ោង ២កន្លះ មានជនរងគ្រោះមួយចំនួន ចាប់ផ្តើមមានរោគសញ្ញា ដូចជា ឈឺក្បាល វិលមុខ ក្អួត និងថប់ដង្ហើម។ អ្នកជំងឺ ត្រូវបានបញ្ជូនទៅសង្គ្រោះបន្ទាន់នៅមន្ទីរពេទ្យ ហើយក៏មានអ្នកស្លាប់ជាបន្តបន្ទាប់។ អ្នកពុលអាល់កុល លាយភេសជ្ជៈ ដើម្បីផឹកជំនួសស្រានោះ គឺជាពលករខ្មែរ ទើបត្រឡប់មកពីប្រទេសថៃ ហើយត្រូវធ្វើចត្តាឡីស័ក នៅព្រំដែននោះ។
ក្រោយមក មន្ត្រីជំនាញ បានចុះដកហូតអាល់កុលក្លែងក្លាយ ឬមេតាណុល ជាង ១០០លីត្រ ក្រោយពេលដែលពលករធ្វើចត្តាឡីស័ក បានយកអាល់កុលក្លែងក្លាយ ទៅលាយជាមួយភេសជ្ជៈផឹក ហើយក៏ពុលស្លាប់អស់ចំនួន ៧នាក់។ ការចុះទៅពិនិត្យ និងដកហូតអាល់ក្លែងក្លាយទាំងនេះ បានធ្វើឡើង នៅថ្ងៃទី១៣ ខែវិច្ឆិកា ឆ្នាំ២០២១ នៅភូមិកូនដំរី និងភូមិកូបធំ សង្កាត់និមិត្ត ក្រុងប៉ោយប៉ែត។
មន្ត្រីជំនាញ សហការជាមួយមន្ត្រីសុខាភិបាល ចុះពិនិត្យ ក៏រកឃើញថា ពលករ ដែលពុលទាំងនោះ គឺមកពីយកអាល់កុលប្រភេទមេតាណុល ឬអាល់កុលក្លែងក្លាយ លាយជាមួយភេសជ្ជៈ មានស្ទីង តែអូអ៊ីឈី ទឹកក្រូចដបពណ៌ក្រហម និងទឹកបរិសុទ្ធ លាយធ្វើស្រាផឹក ក៏បណ្តាលឱ្យពុលស្លាប់ និងខ្លះចូលមន្ទីរពេទ្យព្យាបាលជាបន្ទាន់។
សំណាក និងវត្ថុតាង ដែលនៅសេសសល់ ក៏ត្រូវបានមន្ត្រីជំនាញ ផ្ញើមកវិភាគ នៅរាជធានីភ្នំពេញ ដើម្បីដឹងពីមូលហេតុច្បាស់លាស់ ដែលក្រសួងសុខាភិបាល រហូតដល់ថ្ងៃទី១២វិច្ឆិកា នៅរង់ចាំលទ្ធផលវិភាគពីមជ្ឈមណ្ឌលជាតិមន្ទីរពិសោធន៍សុខាភិបាល។
ករណីឈឺ និងស្លាប់ ដោយសារតែពុលស្រា តែងតែកើតឡើងជារៀងរាល់ឆ្នាំ ជាពិសេសចាប់ពីខែវិច្ឆិកា ដល់ខែមករា តែងតែកើតឡើង នៅតាមសហគមន៍នៃបណ្តាខេត្តមួយចំនួន។ ចំពោះបញ្ហានេះ ក្រសួងសុខាភិបាល បាប្រកាសក្រើនរំលឹកហើយរំលឹកទៀត និងអំពាវនាវ ដោយទទូចដល់បងប្អូនប្រជាពលរដ្ឋ និងអ្នកពាក់ព័ន្ធ ត្រូវអនុវត្ត ដូចខាងក្រោម៖ ១-កុំយកអាល់កុល មកលាយជាមួយទឹក ឬភេសជ្ជនានា មកពិសា ពីព្រោះអាល់កុល ត្រូវបានធ្វើឡើងសម្រាប់ជាសារធាតុសម្លាប់មេរោគ ដើម្បីបង្ការកុំឲ្យកើតជំងឺឆ្លងនានា ដូចជា អាល់កុល សម្រាប់លាងដៃ ជាដើម។ ២-កុំពិសាស្រា ដែលបិទ ឬលាយគ្មានបច្ចេកទេសត្រឹមត្រូវ និងគ្មានការត្រួតពិនិត្យ។ ៣-ចំពោះអ្នកប្រកបអាជីវកម្ម ហាមដាច់ខាត កុំយកសារធាតុមេតាណុល មកលាយធ្វើស្រាស ដែលបង្កឲ្យពុល និងស្លាប់បាត់បង់ជីវិត។ ៤-អាជ្ញាធរ ខេត្ត ស្រុក ក្រុង ខណ្ឌ រដ្ឋបាលឃុំ/សង្កាត់ ត្រូវចាត់តាំងកម្លាំងគ្រប់គ្រង ឃ្លាំមើល និងទប់ស្កាត់ការលក់ស្រាបិទ ឬលាយគ្មានបច្ចេកទេសត្រឹមត្រូវ និងណែនាំប្រជាពលរដ្ឋ ជៀសវាងយកសារធាតុ មេតាណុល លាយធ្វើស្រាស ដែលបង្កឲ្យពុល និងស្លាប់បាត់បង់ជីវិត។
ជាមួយគ្នានោះ ប្រសិនបើបងប្អូនប្រជាពលរដ្ឋ មានបញ្ហាសុខភាព ឬមានរោគសញ្ញានៃការពុលស្រា ដូចជា ឈឺក្បាល ក្អួត ឈឺពោះ វិលមុខ ស្រវាំងភ្នែក សន្លប់ ប្រកាច់ ពិបាកដកដង្ហើម ឬសង្ស័យថា មានពុលស្រា ឬការឆ្លងជំងឺដទៃទៀត សូមប្រញាប់ទៅស្វែងរកការពិនិត្យពិគ្រោះនៅមន្ទីរពេទ្យរដ្ឋ ដែលនៅជិតផ្ទះរបស់លោកអ្នក ឬទំនាក់ទំនងតាមលេខទូរស័ព្ទ ១១៥ ដោយឥតគិតថ្លៃ ឬទំនាក់ទំនងក្រសួងសុខាភិបាល តាមលេខទូរស័ព្ទ៖ 012 488 981 ឬ 012 836 868។
ដោយឡែក មន្ត្រីជំនាញ ក៏គួរតែចុះពិនិត្យអាល់កុលក្លែងក្លាយ និងទំនិញហួសកាលបរិច្ឆេទ ដែលខូចគុណភាពនេះ ត្រូវធ្វើជាប្រចាំ បើមិនបានរៀងរាល់ថ្ងៃ ក៏សូមឲ្យរៀងរាល់សប្តាហ៍ ឬយ៉ាងហោចណាស់ ក៏១ខែធ្វើម្តង នៅគ្រប់ឃុំសង្កាត់ ស្រុកក្រុងខណ្ឌ និងរាជធានីខេត្ត។ មន្ត្រីជំនាញ ក៏ត្រូវណែនាំដល់អ្នកលក់ទំនិញគ្រប់ប្រភេទ ត្រូវឈប់លក់អាល់កុលក្លែងក្លាយ និងទំនិញហួសកាលបរិច្ឆេទ ដែលខូចគុណភាព។ ក្នុងនោះ មន្ត្រីជំនាញ ក៏ត្រូវតែត្រួតពិនិត្យលើអាល់កុល និងទំនិញទាំងនោះ ព្រោះជាទូទៅ អ្នកលក់ និងអ្នកទិញ មិនដឹងថា មួយណាជាអាល់កុលពិត និងមួយណា ជាអាល់ក្លែងក្លាយ ដែលមានជាតិមេតាណុល បណ្តាលឲ្យគ្រោះថ្នាក់ឡើយ។
នៅមណ្ឌលចត្តាឡីស័ក សម្រាប់អ្នកសង្ស័យប៉ះពាល់នឹងអ្នកជំងឺកូវីដ១៩ កន្លងមក បានអនុវត្តយ៉ាងល្អ ដោយហាមមិនឲ្យមានយកគ្រឿងស្រវឹង ស្រា ឬស្រាបៀរ ចូលផឹកស៊ីឡើយ។ ប៉ុន្តែតាមមណ្ឌលចត្តាឡីស័កទាំងអស់ នៅពេលនេះ ក៏ត្រូវតែបង្កើនការត្រួតពិនិត្យ ពិសេសលើការប្រើប្រាស់អាល់កុល។ អាល់កុល ត្រូវតែមិនមែនក្លែងក្លាយ ហើយក៏មិនត្រូវទុកអាល់កុលចោល រហូតដល់អ្នកស្នាក់នៅមណ្ឌលចត្តាឡីស័ក យកទៅលាយជាមួយទឹក និងភេសជ្ជៈ ផឹកជំនួសស្រា នាំឲ្យពុលដូច្នេះ។ បើប្រហែសដូច្នេះ ទៅថ្ងៃក្រោយ តើអាចនឹងមានអ្នកប្រព្រឹត្តបទល្មើសផ្សេងទៀតទេ? ហើយបើអាច ក៏ត្រូវដាក់កាំម៉ារ៉ាសុវត្ថិភាព និងត្រូវបង្កើនការពង្រឹងសន្តិសុខ និងថែមកម្លាំងការពារ។
ចំណែកអ្នកចូលចិត្តផឹកស្រា ដែលសូម្បីតែទៅកន្លែងហាមឃាត់ហើយ ក៏នៅឆ្លៀតរកនឹកឃើញវិធីផលិតស្រាផឹកបានទៀតនោះ ត្រូវតែចេះអត់ធ្មត់។ មិនយូរទេ ធ្វើចត្តាឡីស័ក ១៤ថ្ងៃ ចាំចេញមកវិញ ផឹកស្រាដល់មុជក៏បាន។ តែក៏ចូរកុំភ្លេចថា ផឹកស្រា នាំមកនូវវិនាស ៦ប្រការ តាមធម៌ព្រះពុទ្ធ៖ ១-វិនាសទ្រព្យ ២-បង្កជម្លោះ ៣-កើតរោគក្នុងខ្លួន ៤-ខូចឈ្មោះ ៥-បង្ហាញកេរ្តិ៍ខ្មាស់ទាំងរស់ និង៦-បាត់បង់បញ្ញា។ ក្នុងពេលឥឡូវ ផឹកស្រា ហើយស្រវឹង បើកបរខុសច្បាប់ និងអាចបង្កគ្រោះថ្នាក់ រហូតដល់ស្លាប់ខ្លួនឯង និងបង្កគ្រោះថ្នាក់ដល់អ្នកដទៃថែមទៀត។
សរុបមក ករណីពុលស្រា និងពុលអាល់កុលលាយភេសជ្ជៈ ធ្វើជាស្រានេះ មិនគួរកើតឡើងក្នុងសង្គមខ្មែរយើងទៀតនោះទេ។ ជារឿងដដែលៗ ហើយបានសម្លាប់ជីវិតប្រជាជនយើង មិនតិចនាក់ឡើយ។ ក្នុងពេលនេះ ម្នាក់ៗ ខ្លាចឈឺ និងខ្លាចស្លាប់ដោយកូវីដ តែបែរជាមកឈឺ និងស្លាប់ដោយសារតែពុលស្រា ឬពុលអាល់កុលលាយភេសជ្ជៈ លាយទឹកផឹកដូច្នេះ គឺពិតជាគួរឲ្យហួសចិត្ត រកពាក្យអ្វីនិយាយមិនចេញឡើយ។ សូមកុំឲ្យដូចពាក្យគេថា ទាល់តែស្លាប់ដូច្នេះ ទើបរាង៕
ចែករំលែកព័តមាននេះ