ភ្នំពេញ៖ គណៈកម្មាធិការជាតិសុវត្ថិភាពចរាចរណ៍ផ្លូវគោក បានចេញសេចក្តីអំពាវនាវ ១០ចំណុច ដើម្បីបង្ការ ទប់ស្កាត់គ្រោះថ្នាក់ចរាចរណ៍ផ្លូវគោក ក្នុងឱកាសព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក…
ភ្នំពេញ៖ គណៈកម្មាធិការជាតិសុវត្ថិភាពចរាចរណ៍ផ្លូវគោក បានចេញសេចក្តីអំពាវនាវ ១០ចំណុច ដើម្បីបង្ការ ទប់ស្កាត់គ្រោះថ្នាក់ចរាចរណ៍ផ្លូវគោក ក្នុងឱកាសព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក នៅថ្ងៃទី១៨-២០ ខែវិច្ឆិកា ឆ្នាំ២០២១។
សេចក្តីអំពាវនាវ លើកឡើងថា ក្នុងឱកាស ដែលរាជរដ្ឋាភិបាល បានប្រកាសបើកដំណើរការគ្រប់វិស័យនៅទូទាំងប្រទេសឡើងវិញ បន្ទាប់ពីបានធូរស្រាលក្នុងការប្រយុទ្ធប្រឆាំងនឹងការឆ្លងជំងឺកូវីដ១៩ កន្លងមក និងបានអនុញ្ញាតឲ្យមានការឈប់សម្រាក និងលើកទឹកចិត្តឲ្យមានការដើរកំសាន្ត ក្នុងឱកាសព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក ដែលនឹងប្រព្រឹត្តទៅ ចាប់ពីថ្ងៃទី១៨ ដល់ថ្ងៃទី២០ ខែវិច្ឆិកា ឆ្នាំ២០២១ ខាងមុខនេះ គណៈកម្មាធិការជាតិសុវត្ថិភាពចរាចរណ៍ផ្លូវគោក សូមអំពាវនាវដល់សាធារណជន ជាអ្នកប្រើប្រាស់ផ្លូវទាំងអស់ បន្ថែមពីលើការអនុវត្តវិធានការ «៣ការពារ និង៣កុំ» ព្រមជាមួយនឹងវិធានការសុខាភិបាលផ្សេងទៀត សំដៅបង្ការ និងទប់ស្កាត់ការរាតត្បាតនៃការឆ្លងជំងឺកូវីដ១៩ សូមមេតាខិតខំយកចិត្តទុកដាក់ ដើម្បីបង្ការ និងទប់ស្កាត់គ្រោះថ្នាក់ចរាចរណ៍ផ្លូវគោក ដូចខាងក្រោម៖
១-មិនត្រូវបើកបរលើសល្បឿនកំណត់ជាដាច់ខាត
២-មិនត្រូវបើកបរក្រោមឥទ្ធិពលនៃគ្រឿងស្រវឹងជាដាច់ខាត
៣-មិនត្រូវបត់ ឬវ៉ាជែងក្នុងភាពប្រថុយប្រថាន ឬប្រើទូរសព្ទដោយគ្មានឧបករណ៍សំឡេងភ្ជាប់ទំនាក់ទំនង
៤-ត្រូវគោរពសិទ្ធិអាទិភាព គោរពសញ្ញាចរាចរណ៍ និងប្រកាន់ស្តាំជានិច្ច
៥-មិនត្រូវបើកបរក្នុងស្ថានភាពងងុយដេកជាដាច់ខាត
៦-ត្រូវពាក់មួកសុវត្ថិភាពជានិច្ច ក្នុងពេលធ្វើដំណើរតាមទោចក្រយានយន្ត
៧-ត្រូវពាក់ខ្សែក្រវាត់សុវត្ថិភាពជានិច្ច ក្នុងពេលធ្វើដំណើរតាមរថយន្ត
៨-ត្រូវត្រួតពិនិត្យលក្ខណៈបច្ចេកទេសយានយន្តជានិច្ច ពិសេសត្រួតពិនិត្យកង់ ចង្កូត ហ្វ្រាំង ភ្លើងបំភ្លឺ។ល។
៩-មិនត្រូវផ្ទុកអ្នកដំណើរ ឬទំនិញលើសច្បាប់កំណត់។ ចំពោះរថយន្តដឹកអ្នកដំណើរ ឬដឹកកម្មករ មិនត្រូវផ្ទុកអ្នកដំណើរ ឬកម្មករលើដំបូល និងសូមកុំដំឡើងថ្លៃធ្វើដំណើរក្នុងឱកាសនេះ។
១០-ត្រូវបើកបរក្នុងស្ថាមរតីប្រុងប្រយ័ត្នជានិច្ច ប្រកបដោយសីលធម៌យោគយល់អធ្យាស្រ័យ។
គណៈកម្មាធិការជាតិសុវត្ថិភាពចរាចរណ៍ផ្លូវគោក ដែលមានសម្តេចក្រឡាហោម ស ខេង ជាប្រធាន បានលើកឡើងថា ក្នុងរយៈពេល ៩ខែដើមឆ្នាំ២០២១នេះ អាស្រ័យដោយប្រទេសជាតិ មានសន្តិភាព ជាមួយនឹងការខិតខំប្រឹងប្រែងយ៉ាងសកម្ម ក្នុងការរក្សាសណ្តាប់ធ្នាប់សុវត្ថិភាពចរាចរណ៍របស់សមត្ថកិច្ចគ្រប់ថ្នាក់ និងប្រជាពលរដ្ឋ បានចូលរួមគោរពច្បាប់ ស្តីពី ចរាចរណ៍ផ្លូវគោក បានធ្វើឲ្យចំនួនគ្រោះថ្នាក់ ចំនួនអ្នកស្លាប់ និងរងរបួសក្នុងគ្រោះថ្នាក់ចរាចរណ៍ មានការថយចុះ បើប្រៀបធៀបរយៈពេលដូចគ្នា ឆ្នាំ២០២០ គឺគ្រោះថ្នាក់ថយចំនួន ២២% ស្លាប់ថយ ចំនួន ១៦% និងរបួសថយ ២៩% ភាគច្រើន ជនរងគ្រោះ ចំនួន ៧១% ជាអ្នកជិះទោចក្រយានយន្ត ( ម៉ូតូ ) មិនពាក់មួកសុវត្ថិភាព។
សូមរម្លឹកថា នៅឆ្នាំនេះ ទោះបីជារាជរដ្ឋាភិបាល មិនរៀបចំពិធីបុណ្យអុំទូក នៅមុខព្រះបរមរាជវាំង តែបានអនុញ្ញាតឲ្យឈប់សម្រាក ៣ថ្ងៃ គឺនៅថ្ងៃទី១៨-២០ ខែវិច្ឆិកា ឆ្នាំ២០២១ ក្នុងពេលបើកប្រទេសឡើងវិញ លើគ្រប់វិស័យចាប់តាំងពីថ្ងៃទី១ ខែវិច្ឆិកា ឆ្នាំ២០២១៕
ចែករំលែកព័តមាននេះ