ខេត្តបន្ទាយមានជ័យ ៖ តាមព័ត៌មានបឋមឱ្យដឹងថា ពលករខ្មែរដែលកំពុងធ្វើចត្តាឡីស័កនៅមណ្ឌលកូបធំ យកអាល់កុលលាងដៃទៅលាយជាមួយភេសជ្ជៈមកផឹកបណ្តាលឱ្យពុលនោះ គឺអ្នកស្លា.ប់បានកើនឡើងដល់ចំនួន៧នាក់ហើយ (ស្រី១នាក់) គិតត្រឹមព្រឹកថ្ងៃទី១២ វិច្ឆិកា នេះ ស្ថិតក្នុងក្រុងប៉ោយប៉ែត ខេត្តបន្ទយមានជ័យ ។ នេះបើយោងតាមលោកវេជ្ជបណ្ឌិត ឡេ ចាន់សង្វាត ប្រធានមន្ទីរសុខាភិបាលខេត្តបន្ទាយមានជ័យ ។
លោកវេជ្ជបណ្ឌិត ឡេ ចាន់សង្វាត បានឱ្យដឹងទៀតថា កាលពីវេលាម៉ោង២រសៀលថ្ងៃទី១១ ខែវិច្ឆិកា នៅមណ្ឌលចត្តាឡីស័កកូបធំ ស្ថិតភូមិកូបធំ សង្កាត់និមិត្ត ក្រុងប៉ោយប៉ែត មានករណីពលករខ្មែរដែលត្រឡប់ពីប្រទេសថៃដែលកំពុងធ្វើចត្តាឡីស័កមានអាការៈក្អួតចង្អោរ ចំនួន២១នាក់ (ស្រី២នាក់) បន្ទាប់ពីពួកគាត់នាំគ្នាយកអាកុលលាងដៃលាយជាមួយភេសជ្ជៈស្ទីង និងតែអូអ៊ីឈិ និងទឹកក្រូច ទឹកបរិសុទ្ធ យកទៅផឹកជំនួសស្រា បណ្តាលឱ្យពុល ហើយការផឹកនោះទៀតសោតគឺផឹកលក្ខណៈច្រើនក្រុម ដោយក្នុង១ក្រុមមាន៤ ទៅ៥នាក់ ។
លោកវេជ្ជបណ្ឌិត បានបញ្ជាក់ថា ក្រោយទទួលបានដំណឹងភ្លាមៗ ក្រុមគ្រូពេទ្យប្រចាំការក្នុងមណ្ឌលបានយករថយន្តសង្គ្រោះដឹកជនរងគ្រោះ ទៅកាន់មន្ទីពេទ្យបង្អែកក្រុងប៉ោយប៉ែត សរុបចំនួន២១នាក់ (ស្រី២នាក់) ។ តែអ្វីដែលគួរឱ្យសោកស្តាយបំផុតនោះ គឺការពុលនេះ បានបណ្តាលឱ្យស្លា.ប់១ នាក់ភ្លាម និងបញ្ជូនទៅមន្ទីពេទ្យមិត្តភាពកម្ពុជា.ជប៉ុនមង្គលបូរី ក៏បណ្តាលឱ្យស្លា.ប់៤នាក់បន្ថែមទៀត (ស្រី១នាក់) និងខ្លះទៀតដោយស្ថានភាពធ្ងន់ត្រូវបានបញ្ជូនទៅមន្ទីពេទ្យខេត្តសៀមរាប។
លោកវេជ្ជបណ្ឌិត បានបន្តថា លុះនៅព្រឹកថ្ងៃទី១២ វិច្ឆិកានេះ ក៏មានពលករ ស្លា.ប់ ២នាក់បន្ថែមទៀត ខណៈអ្នកមានស្ថានភាពធ្ងន់ធ្ងរនៅមានចំនួន១៤នាក់ ដែលកំពុងសង្គ្រោះនៅមន្ទីពេទ្យបង្អែក ក្រុងប៉ោយប៉ែត ។ លោកវេជ្ជបណ្ឌិត ឡេ ចាន់សង្វាត បានបញ្ជាក់ទៀតថា ពលករខ្មែរដែលពុលអាកុលសរុបចំនួន ២១ (ស្រី២នាក់) បានស្លា.ប់ចំនួន៧នាក់ (ស្រី១នាក់) ។
ជុំវិញករណីរន្ធ.ត់ខាងលើនេះ លោកហឿន វីរៈ អភិបាលរងក្រុងប៉ោយប៉ែត បានប្រាប់តាមទូរស័ព្ទថា មានពលករចំនួន២២នាក់ដែលបញ្ជូនពីថៃធ្វើចត្តាឡីស័ក នៅមណ្ឌលចត្តាឡីស័កខាងលើ មានអការៈមិនស្រួលខ្លួន ក្រោយពីពួកគេយកអាល់កុលលាយទឹក,ភេសជ្ជៈទឹកក្រូច និងស្ទីង ផឹក។
ប្រភពចុងក្រោយថា អ្នកស្លា.ប់ត្រូវបានស្គាល់អត្តសញ្ញាណ៣នាក់ រួមមាន១-ឈ្មោះភាព សិទ្ធ ភេទប្រុស អាយុ២៧ឆ្នាំ មានទីលំនៅស្រុកអង្គរជុំ ខេត្តសៀមរាប, ២-ឈ្មោះលីដា ភេទស្រី អាយុ៣៥ឆ្នាំ មានទីលំនៅភូមិទំនប់ក៥សង្កាត់ និងក្រុងប៉ោយប៉ែតនិង៣-ឈ្មោះសុខ ហេង ភេទប្រុស អាយុ២២ឆ្នាំ មានទីលំនៅស្រុកមេមុត ខេត្តត្បូងឃ្មុំ។
ព័ត៌មានបន្ថែមកោះសន្តិភាពនឹងមានផ្សាយជូនបន្ត ។
អត្ថបទសរសេរ ដោយ
អត្ថបទសរសេរ ដោយ
ចែករំលែកព័តមាននេះ