សេវាកម្មវិធីបុណ្យ និងមង្គលការ ត្រៀមចេញរកលុយឡើងវិញ
- ភ្នំពេញ
រាជធានីភ្នំពេញ ៖ អ្នកសម្អាងការ ចុងភៅ សេវាកម្មបម្រើភ្ញៀវ ការរៀបចំរោង នៅក្នុងកម្មវិធី បុណ្យ និងមង្គលការជាច្រើន ទាំងនៅភ្នំពេញ…
រាជធានីភ្នំពេញ ៖ អ្នកសម្អាងការ ចុងភៅ សេវាកម្មបម្រើភ្ញៀវ ការរៀបចំរោង នៅក្នុងកម្មវិធី បុណ្យ និងមង្គលការជាច្រើន ទាំងនៅភ្នំពេញ និងតាមខេត្តបានអះអាងពីការត្រៀមចេញរក លុយឡើងវិញក្រោយពីផ្អាកសកម្មភាពមិនមានចំណូលប្រមាណពីរឆ្នាំដោយសារកូវីដ ១៩ នោះ ។
លោក ញឹម សំរីប អ្នកផ្គត់ផ្គង់សេវាកម្មរោង និងម្ហូបអាហារនៅក្នុងពិធីមង្គលការ និង ពិធីផ្សេងៗទៀត នៅក្នុងខេត្តកំពតបាន ឱ្យដឹងថា ក្រោយពេលរដ្ឋាភិបាលប្រកាសបើកប្រទេស និងអនុញ្ញាតឱ្យរៀបចំពិធីមង្គលការឡើងវិញមកនោះ មានអ្នកមកកក់រោង កក់តុ និងសេវាកម្ម ម្ហូបអាហារជាបណ្ដើរៗពីលោកហើយ ដែលជាសញ្ញាល្អសម្រាប់អាជីវកម្មមួយនេះ។ លោកថា នៅពេលអាជីវកម្មយើងដំណើរការឡើងវិញ វាក៏បានផ្ដល់អត្ថប្រយោជន៍ជា ច្រើន ដូចជាផ្ដល់ប្រាក់កម្រៃដល់កម្មករ អ្នករត់តុ អ្នកលាងចាន ចុងភៅ និងអ្នកលក់បន្លែបង្កា ផ្សេងៗជាដើម ។
ជាមួយក្តីរីករាយលោក សំរីប រំឭកថា អាជីវកម្មជួលរោង តុ និងផ្គត់ផ្គង់ម្ហូបអាហារតាម ពិធីផ្សេងៗ បានផ្អាកសកម្មភាពតែម្តង ប្រមាណជាជិត ២ ឆ្នាំមកហើយ ។ លោកថា សមាជិក របស់លោកបានប្តូរទៅធ្វើអាជីវកម្មផ្សេងដើម្បីរកចំណូល ប៉ុន្តែពេលនេះពួកគាត់បានជួបជុំគ្នា ធ្វើការរកស៊ីឡើងវិញហើយ ។
លោក សុខ សារី ម្ចាស់សម្អាងការមួយកន្លែង ដែលមិនឱ្យបញ្ចេញឈ្មោះ ថា នៅពេល នេះមានពលរដ្ឋខ្លះបានផ្តើមរៀបចំពិធីភ្ជាប់ពាក្យកូនកំលោះក្រមុំរបស់ខ្លួនជាបន្តបន្ទាប់តែលក្ខណៈទ្រង់ទ្រាយតូចខ្លះធំខ្លះ ។ លោកកត់សម្គាល់ថា ចាប់ពីពេលរដ្ឋាភិបាលប្រកាសបើកប្រ ទេស និងអនុញ្ញាតឱ្យរៀបចំពិធីមង្គលការ អ្នកដែលមានគម្រោងថា នឹងភ្ជាប់ពាក្យ និងរៀបចំ មង្គលការតែម្ដងនោះបានរៀបចំកម្មវិធីរបស់ខ្លួនតាមការកំណត់របស់រដ្ឋ ។
«បងប្អូនប្រជាពលរដ្ឋយើងបានរៀបចំកម្មវិធីមង្គលការ និងបានមកកក់សេវាកម្មកន្លែងខ្ញុំជា ហូរហែ ពីសេសនៅចុងឆ្នាំនេះ និងដើមឆ្នាំក្រោយ ។ កាលពីអំឡុងកូវីដ ១៩ រាលដាល អាជីវ កម្មរបស់ពួកយើងអត់មានសកម្មភាពនោះទេ ហើយអីវ៉ាន់ក៏នៅរៀបយ៉ាងស្អាតនៅក្នុងទូរ ដោយសារតែគ្មាននរណារៀបចំពិធីអ្វីឡើយ ។ ពេលនេះយើងបានរើវាចេញពីទូរមកបម្រើ សេវាកម្មជួនពលរដ្ឋឡើងវិញ ។ យើងអាចរកចំណូលឡើងវិញហើយ» ។
លោក សុខហេង ជាអ្នកផ្គត់ផ្គង់សេវាកម្មថតរូប Pre-Wedding បានឱ្យដឹងផងដែរថា បន្ទាប់ពីរដ្ឋាភិបាលប្រកាសឱ្យរៀបការ ក៏មានអ្នកទាក់ទងលោកដើម្បីត្រៀមរៀបចំថត Pre-Wedding និងថតក្នុងថ្ងៃមង្គលរបស់ពួកគេជាបន្តបន្ទាប់ផងដែរ ។ ទោះ យ៉ាងណាមានអ្នករកទទួលទានខាងអាជីវកម្មនេះមួយចំនួននិយាយថា ដោយ សារតែការកំណត់អ្នកចូលរួមក្នុងពិធីមង្គលការត្រឹម ២០០ នាក់ បានធ្វើឲ្យពលរដ្ឋខ្លះនៅតែ មិនទាន់សម្រេចចិត្តរៀបចំពិធីការកូនចៅរបស់ខ្លួននោះទេ ដូច្នេះអាជីវកម្មសម្អាងការកម្រិត ខ្ពស់ ថ្លៃ មិនខុសពីសេវាកម្មនានា ដែលមានស្តង់ដារខ្ពស់នោះនៅមិនទាន់ទទួលបានការ កក់ទុកសម្រាប់ពិធីមង្គលការនៅឡើយទេ ។
រដ្ឋាភិបាលបានអនុញ្ញាតឱ្យរៀបចំ ពិធីមង្គលការឡើងវិញ នៅពេលពលរដ្ឋបានចាក់ វ៉ាក់សាំងលើសពី ១០ លាននាក់ ដោយកំណត់ចំនួនភ្ញៀវចូលរួមត្រឹម ២០០ នាក់ប៉ុណ្ណោះ ឬស្មើ ២០ តុប៉ុណ្ណោះ ។ តាមសង្កេតពិធីមង្គលការមួយនៅភ្នំពេញ តែងតែរៀបចំទទួលភ្ញៀវ មិនក្រោម ១០០ តុនោះទេ ៕
ចែករំលែកព័តមាននេះ