រកឃើញ៨ក្រុមខ្លាំងៗ ការប្រកួតពានសម្ដេចតេជោ ហ៊ុន សែន ថ្នាក់ជាតិ
- ភ្នំពេញ
រាជធានីភ្នំពេញ ៖ ការប្រកួតបាល់ទាត់ដណ្ដើមពានរង្វាន់សម្ដេចអគ្គមហាសេនាបតីតេជោ ហ៊ុន សែន ឬពាន Hun Sen Cup លើកទី១៥…
រាជធានីភ្នំពេញ ៖ ការប្រកួតបាល់ទាត់ដណ្ដើមពានរង្វាន់សម្ដេចអគ្គមហាសេនាបតីតេជោ ហ៊ុន សែន ឬពាន Hun Sen Cup លើកទី១៥…
រាជធានីភ្នំពេញ ៖ ការប្រកួតបាល់ទាត់ដណ្ដើមពានរង្វាន់សម្ដេចអគ្គមហាសេនាបតីតេជោ ហ៊ុន សែន ឬពាន Hun Sen Cup លើកទី១៥ (ថ្នាក់ជាតិ) ឆ្នាំ២០២១ បានរកឃើញបេក្ខភាពឡើងវគ្គ ៨ក្រុមចុងក្រោយហើយ ក្រោយពីបញ្ចប់ការប្រកួតវគ្គ១៦ក្រុមចុងក្រោយ កាលពីល្ងាចថ្ងៃទី១០ ខែវិច្ឆិកា ហើយធ្វើឲ្យក្រុមចំនួនពាក់កណ្ដាលធ្លាក់ចេញ។ ក្រុមខ្លាំងៗ ដែលទទួលបានឱកាសឡើងវគ្គ៨ក្រុមនោះរួមមាន ក្រុមការពារតំណែងជើងឯកគឺវិសាខា, ក្រុមជើងឯករងឆ្នាំចាស់ណាហ្គាវើលដ៍, ក្រុមភ្នំពេញក្រោន, ក្រុមព្រះខ័នរាជស្វាយរៀង, ក្រុមបឹងកេត, ក្រុមអង្គរថាយហ្គឺរ, ក្រុមអាស៊ីអឺរ៉ុប និងក្រុមអគ្គិសនីកម្ពុជា។ ក្រុមទាំង៨នេះ ទម្រាំមានឈ្មោះបានឡើង គឺប្រឹងស្ទើរតែអស់លទ្ធភាព ដោយមិនមែនឡើងក្នុងវគ្គនេះស្រួលៗឡើយ។
ចំពោះលទ្ធផលប្រកួតវគ្គ ១៦ក្រុមចុងក្រោយចំនួន ៤គូកាលពីថ្ងៃទី០៩-វិច្ឆិកា គឺមានក្រុមវិសាខា បានយកឈ្នះខេត្តបន្ទាយមានជ័យ ៨-០ នៅកីឡដ្ឋានព្រីនស៍។ ក្រុមភ្នំពេញក្រោន យកឈ្នះខេត្ដត្បូងឃ្មុំ ៧-០ នៅកីឡដ្ឋាន Smart RSN។ ក្រុមព្រះខ័នរាជស្វាយរៀង យកឈ្នះក្រុមជើងឯកពានថ្នាក់ខេត្ត កោះកុងអេហ្វស៊ី ៦-១ នៅកីឡដ្ឋានខេត្តស្វាយរៀង ។ រីឯក្រុមណាហ្គាវើលដ៍ បានទម្លាក់ក្រុមនគរបាលជាតិ ដោយបាល់ប៉េណាល់ទីកាត់សេចក្ដី ៤-២ បន្ទាប់ពីប្រកួត ៩០នាទីស្មើគ្នា ១-១។ ដោយឡែកលទ្ធផល ៤គូផ្សេងទៀត នៅល្ងាចថ្ងៃពុធនេះ រួមមានក្រុមនាគខៀវបឹងកេត បានទម្លាក់ក្រុមសូលទីឡូអង្គរ ដោយលទ្ធផល ៤-០ នៅកីឡដ្ឋានខេមបូឌាអ៊ែរវ៉េ។ ក្រុមអង្គរថាយហ្គឺរ បានសងសឹកខេត្តព្រៃវែងបានវិញ ក្នុងលទ្ធផល ២-០ នៅកីឡដ្ឋាន SRU ខេត្តសៀមរាប។
ក្រុមអគ្គិសនីកម្ពុជា បានយកឈ្នះក្រុមម្ចាស់ផ្ទះកងយោធពលខេមរភូមិន្ទ ដោយលទ្ធផល ៤-០ នៅកីឡដ្ឋានស្ដាតចាស់ និងក្រុមអាស៊ីអឺរ៉ុប បានទម្លាក់ក្រុមម្ចាស់ផ្ទះគិរីវង់ ដោយលទ្ធផល ៣-២ នៅកីឡដ្ឋានគិរីវង់។ ចំពោះកម្មវិធីប្រកួតវគ្គ ៨ក្រុមចុងក្រោយ មានដូចជា៖ ក្រុមវិសាខា ត្រូវជួបក្រុមអាស៊ីអឺរ៉ុប ខណៈក្រុមណាហ្គាវើលដ៏ ត្រូវជួបក្រុមបឹងកេត។ ក្រុមអង្គរថាយហ្គឺរ ជួបក្រុមព្រះខ័នរាជស្វាយរៀង និងក្រុមអគ្គិសនីកម្ពុជា ជួបក្រុមភ្នំពេញក្រោន។ ការប្រកួតនេះ នឹងប្រើរូបមន្ដចាញ់ធ្លាក់ ដូចវគ្គ ១៦ក្រុមចុងក្រោយដែរ ដោយក្រុមឈ្នះ នឹងទទួលបានកៅអីវគ្គពាក់កណ្ដាលផ្ដាច់ព្រ័ត្រ ខណៈការប្រកួតគ្រោងធ្វើឡើងតែ ១ថ្ងៃប៉ុណ្ណោះ នាថ្ងៃទី១៦ ខែវិច្ឆិកា ឆ្នាំ២០២១ ខាងមុខ៕ ដោយ ៖ ផាត់ តារារដ្ឋ
ចែករំលែកព័តមាននេះ