កម្ពុជា កំពុងរៀបចំគោលនយោបាយ និងគាំទ្រការប្រើប្រាស់រថយន្តដើរដោយថាមពលអគ្គិសនី
- ភ្នំពេញ
រាជធានីភ្នំពេញ៖ រដ្ឋមន្ត្រីក្រសួងសាធារណការ និងដឹកជញ្ជូន លោក ស៊ុន ចាន់ថុល បានគូសបញ្ជាក់ថា កម្ពុជា កំពុងត្រៀមគោលនយោបាយ និងការគាំទ្រ…
រាជធានីភ្នំពេញ៖ រដ្ឋមន្ត្រីក្រសួងសាធារណការ និងដឹកជញ្ជូន លោក ស៊ុន ចាន់ថុល បានគូសបញ្ជាក់ថា កម្ពុជា កំពុងត្រៀមគោលនយោបាយ និងការគាំទ្រ…
រាជធានីភ្នំពេញ៖ រដ្ឋមន្ត្រីក្រសួងសាធារណការ និងដឹកជញ្ជូន លោក ស៊ុន ចាន់ថុល បានគូសបញ្ជាក់ថា កម្ពុជា កំពុងត្រៀមគោលនយោបាយ និងការគាំទ្រ សម្រាប់រថយន្តដើរដោយថាមពលអគ្គិសនី (EVs) នៅក្នុងប្រទេស។
ក្រសួងសាធារណការ និងដឹកជញ្ជូន បានប្រកាសថា នៅក្នុងកម្មវិធីក្រោម ប្រធានបទ៖ “អគ្គិសនីភាវូបនីយកម្មនៃយានយន្តដើម្បីអនាគតបៃតងសម្រាប់កម្ពុជា” នាព្រឹកថ្ងៃទី៤វិច្ឆិកា លោកទេសរដ្ឋមន្ត្រី ស៊ុនចាន់ថុល បានមានប្រសាសន៍ថា «ថ្ងៃនេះ ខ្ញុំបានធ្វើដំណើរតាមរថយន្ត ដើរដោយថាមពលអគ្គិសនី I-Pace electric Jaguar មកចូលរួមកិច្ចពិភាក្សាថ្ងៃនេះ។ ជាបទពិសោធន៍ដ៏អស្ចារ្យមួយរបស់ខ្ញុំ វាដូចជាការធ្វើដំណើរតាមរថយន្តម៉ាស៊ីនសាំងធម្មតាដូច្នោះដែរ ជារថយន្តអនាគត ទំនើប ស្ងាត់ ប្រសិទ្ធភាព និងអាចធ្វើដំណើរបានដោយរលូននៅលើផ្លូវ»។
លោកទេសរដ្ឋមន្ត្រី ស៊ុន ចាន់ថុល ក៏បានគូសបញ្ជាក់ថា រថយន្តដើរដោយថាមពលអគ្គិសនី ដើរតួនាទីយ៉ាងសំខាន់ ក្នុងការរួមចំណែកដល់ការកាត់បន្ថយការបញ្ចេញឧស្ម័នកាបូន ទៅក្នុងបរិយាកាស ធ្វើឱ្យប៉ះពាល់ដល់បរិស្ថាន និងបានសម្តែងនូវសេចក្តីសោមនស្សរីករាយ ដែលបានចូលរួមក្នុងការជជែកពិភាក្សាអំពីរថយន្តដើរដោយថាមពលអគ្គិសនី ដើម្បីផ្ដល់ព័ត៌មានជូនដល់ប្រជាពលរដ្ឋកម្ពុជាថា រថយន្តប្រភេទនេះ មានលក់នៅកម្ពុជា សម្រាប់ជាមធ្យោបាយធ្វើដំណើរ សម្រាប់ពលរដ្ឋកម្ពុជាហើយ។
បន្ថែមពីលើនេះ លោកទេសរដ្ឋមន្ត្រី ស៊ុន ចាន់ថុល ក៏បានគូសបញ្ជាក់ថា ក្រសួង កំពុងរៀបចំគោលនយោបាយ និងការគាំទ្រ សម្រាប់រថយន្តដើរដោយថាមពលអគ្គិសនី(EVs)។ យើងត្រូវធានាឱ្យមានហេដ្ឋារចនាសម្ព័ន្ធទាំងមូល សម្រាប់ EVs នៅកម្ពុជា ក្នុងនោះ រួមមាន៖ ស្ថានីយសាកអាគុយ កន្លែងផ្តល់សេវា គ្រឿងបន្លាស់ បុគ្គលិកទទួលការបណ្តុះបណ្តាល និងកន្លែងបោះចោលអាគុយ និងធានាថា EVs ដែលនាំចូលមកកម្ពុជាមានគុណភាពល្អ។
បន្ថែមពីលើនេះ លោកទេសរដ្ឋមន្ត្រី បានឱ្យដឹងថា ក្រសួងសាធារណការ និងដឹកជញ្ជូន បាន និងកំពុងធ្វើការជាមួយក្រសួងពាក់ព័ន្ធ និងភាគីពាក់ព័ន្ធផ្សេងទៀត ដើម្បីរៀបចំសេចក្តីព្រាងគោលនយោបាយជាតិ ស្តីពី ការអភិវឌ្ឍន៍វិស័យដឹកជញ្ជូន២០២២-២០៣១ ហើយសេចក្តីព្រាងគោលនយោបាយជាតិនេះ ត្រូវបានឯកភាពជាគោលការណ៍ដោយភាគីពាក់ព័ន្ធទាំងអស់ រួមមាន៖ ក្រសួងសាធារណការ និងដឹកជញ្ជូន ក្រសួងសេដ្ឋកិច្ច និងហិរញ្ញវត្ថុ ក្រសួងពាណិជ្ជកម្ម ក្រសួងមហាផ្ទៃ ក្រសួងវិទ្យាសាស្ត្រឧស្សាហកម្ម បច្ចេកវិទ្យា និងនវានុវត្តន៍ ក្រសួងរ៉ែ និងថាមពល និងក្រសួង-ស្ថាប័ន ពាក់ព័ន្ធមួយចំនួនផ្សេងទៀតផងដែរ។
ជាមួយគ្នានោះផងដែរ លោក Paplo kang ឯកអគ្គរដ្ឋទូតអូស្ត្រាលី បានបញ្ជាក់ថា រដ្ឋាភិបាលអូស្ត្រាលី បាន និងកំពុងផ្តល់គាំទ្រដល់យុទ្ធសាស្ត្រអភិវឌ្ឍន៍ថាមពលកកើតឡើងវិញយ៉ាងសកម្ម ដែលជាផ្នែកមួយនៃផែនការអភិវឌ្ឍន៍ថាមពលសម្រាប់កម្ពុជា ដោយសហការជាមួយវិស័យឯកជន ហើយតាមការសិក្សាបឋមបានបង្ហាញឱ្យឃើញថា ប្រទេសកម្ពុជា មានថាមពលពន្លឺព្រះអាទិត្យ និងខ្យល់យ៉ាងច្រើន ដែលជាប្រភពថាមពលកកើតឡើងវិញ ប្រកបដោយសក្កានុពល និងអាចធានាដល់ប្រសិទ្ធភាពនៃការចំណាយផងដែរ។
ដោយឡែក លោកស្រី Tina Redshaw ឯកអគ្គរាជទូតចក្រភពអង់គ្លេស ប្រចាំកម្ពុជា បានសម្តែងនូវមោទកភាព ដែលលោកស្រី បានទទួលរថយន្ត ដែលដើរដោយថាមពលកកើតឡើងវិញ ធ្វើឱ្យមានការចាប់អារម្មណ៍ដល់បណ្ដាថ្នាក់ ដឹកនាំសំខាន់ៗ ក៏ដូចជា សាធារណៈជនទូទៅ និងបានបញ្ជាក់ថា ការប្រើប្រាស់រថយន្តដើរដោយថាមពលកកើតឡើងវិញនេះ ជួយដល់ការកាត់បន្ថយនូវការបញ្ចេញឧស្ម័នកាបូន ទៅក្នុងបរិយាកាស ជួយឱ្យបរិស្ថានស្អាត បៃតង និងប្រកបដោយបច្ចេកវិទ្យាទំនើបផងដែរ ហើយប្រសិនបើយើងចង់ដោះស្រាយការប្រែប្រួលអាកាសធាតុ និងធានាបាននូវស្ថិរភាពអាកាសធាតុ សម្រាប់មនុស្សជំនាន់ក្រោយ យើងចាំបាច់ត្រូវដោះស្រាយការបំភាយឧស្ម័នកាបូនចេញពីការដឹកជញ្ជូន។
ជាមួយគ្នានោះ លោក កែវ រតនៈ អគ្គនាយកអគ្គិសនីកម្ពុជា បានសម្តែងសុទិដ្ឋិនិយម ចំពោះការរួមសហការគ្នារវាងការផ្គត់ផ្គង់អគ្គិសនី និងបណ្តាញអគ្គិសនីនាពេលអនាគត។
លោកបានបន្ថែមថា ជាមួយនឹងគោលនយោបាយវៃឆ្លាត និងការប្ដេជ្ញាខ្ពស់របស់រាជរដ្ឋាភិបាលកម្ពុជា បច្ចុប្បន្ន កម្ពុជា មានថាមពលកកើតឡើងវិញ នៅក្នុងបណ្ដាញចែកចាយអគ្គិសនីកម្ពុជា ចំនួន៩% និងក្នុងពេលខាងមុខ នឹងឡើងដល់ ១០% ខណៈការផ្គត់ផ្គង់អគ្គិសនីដើរដោយថាមពលកកើតឡើងវិញ ក្នុងកម្រិតពិភពលោក គិតជាមធ្យមមានប្រហែលពី៤% ទៅ ៥% ដូច្នេះយើងឋិតក្នុងស្ថានភាពល្អ។ គួរកត់សម្គាល់ថា រថយន្តដើរដោយថាមពលអគ្គិសនី ជួយឱ្យបរិស្ថានស្អាត មានប្រសិទ្ធភាពជាងរថយន្តប្រើសាំង និងអាចជួយកាត់បន្ថយការបំពុលខ្យល់ក្នុងទីក្រុងនានា៕
ចែករំលែកព័តមាននេះ