រាជធានីភ្នំពេញ ៖ អ្នកប្រដាល់ជើងខ្លាំងចាស់វស្សា ឡោ សំណាង មកពីក្លិបកងពលធំអន្តរាគមន៍លេខ៨ភ្នំទ្រព្យ ត្រូវបានគេរៀបចំឱ្យជួបប្រកួតជាមួយកីឡាករថៃឈ្មោះបាបៀរ ស៊ីតហ្វាម៉ៃ បន្ទាប់ពីបាត់មុខមួយរយៈធំ ខណៈសេន ប៊ុនថេន មកពីក្លិបតាព្រហ្មមានជ័យ ជួបប្រកួតជាមួយកីឡាករថៃឈ្មោះភុងដេតធ៍ ដួងឆៃផ នៅលើសង្វៀនទូរទស្សន៍ស៊ីអិនស៊ីថ្ងៃសៅរ៍ទី៩ មេសា នេះ។
ឡោ សំណាង និងសេន ប៊ុនថេន សុទ្ធតែជាកំពូលអ្នកប្រដាល់ជើងខ្លាំងស្ទើរតែគ្មានគូប្រៀបកាលពីប៉ុន្មានឆ្នាំមុន ។ សម្រាប់ការបាត់មុខពីលើសង្វៀនមួយរយៈមកនេះ មិនដឹងថា ពួកគេទាំង២នៅខ្លាំងដូចមុនឬយ៉ាងណានោះទេ។ ឡោ សំណាង ធ្លាប់ប្រកួតបាន៨៦ដង ឈ្នះ៨០ដង ចាញ់តែ៦ដងក្នុងនោះផ្ដួលគូប្រកួតឱ្យសន្លប់មិនតិចដងទេ ។ ចំណែកបាបៀរ ស៊ីតហ្វាម៉ៃ ធ្លាប់ប្រកួត៨០ដង ឈ្នះ៥៨ដង ចាញ់២០ដង ស្មើ២ដង ។ ឡោ សំណាង បើយោងលើប្រវត្តិគេមានផ្លែកែង និងជង្គង់ល្អអាចប្រើការបានយ៉ាងស្ទាត់ជំនាញ និងរហ័សរហួនទៀតផង។ ទោះបីស្នៀតម៉ាត់និងទាត់របស់គេមានប្រសិទ្ធភាពខ្ពស់ក៏ពេលមកជួបកីឡាករថៃដែលមិនធ្លាប់មកប្រកួតនៅស្រុកខ្មែរ គ្មានអ្នកណាហ៊ានទាយទុកមុនថាយ៉ាងណានោះទេ ។ ដូច្នះគូនេះមានតែរង់ចាំមើលការប្រកួតនៅលើសង្វៀនជាក់ស្ដែងប៉ុណ្ណោះទើបដឹង។
សេន ប៊ុនថេន គឺជាកំពូលអ្នកលេងស្នៀតជើងយ៉ាងសាហាវម្នាក់ដែលពិបាករកគូប្រកួតបំផុត ។ ទោះបីបាត់មុខពីលើសង្វៀនមួយរយៈ មែនក៏សេន ប៊ុនថេន នៅតែជាអ្នកប្រដាល់ដែលគួរឱ្យទុកចិត្ត ដោយសារបទពិសោធន៍ប្រកួតនៅលើសង្វៀនរបស់គេមានច្រើនមិនតិចដងទេ។ សេន ប៊ុនថេន ធ្លាប់ប្រកួត៩៩ដង ឈ្នះ៨៧ដង ចាញ់៨ដង ស្មើ៤ដង និងធ្លាប់ផ្ដួលគូប្រកួតឱ្យសន្លប់២២ដង ។ ចំណែកកីឡាករថៃធ្លាប់ប្រកួតបាន៥០ដង ឈ្នះ៤០ដង ចាញ់៨ដង និងស្មើ២ដង ។ ដូច្នេះបើប្រៀបធៀបប្រវត្តិប្រកួតរវាងពួកគេទាំង២ កីឡាករថៃរូបនេះប្រហែលជាមិនអាចទៅរួចជាមួយកីឡាករកម្ពុជាយើងឡើយ ។
ចំណែកគូប្រកួតមិត្តភាពធម្មតាវិញមាន ផន ផល្លា មកពីក្លិបតាព្រហ្មមានជ័យ ប្រកួតជាមួយទេស ឧត្តម មកពីក្លិបកងពលតូចលេខ៧០ និងហែល វ៉ា មកពីក្លិបឃ្លាំងមឿងកីឡា ប្រកួតជាមួយផាន់ សារុន មកពិក្លិបគជសារកីឡា ៕
ចែករំលែកព័តមាននេះ