តុលាការសម្រេចឃុំខ្លួន មេប៉េអឹមក្រុងក្រចេះ និងបក្ខពួក ដោយចោទប្រកាន់ ០៣បទល្មើស
ខេត្តក្រចេះ ៖ លោកវរសេនីយ៍ត្រី ទេព ហ៊ុយ មេបញ្ជាការកងរាជអាវុធហត្ថក្រុងក្រចេះ និងបក្ខពួក កាលពីល្ងាចថ្ងៃទី១ ខែវិច្ឆិកា ឆ្នាំ២០២១…
ខេត្តក្រចេះ ៖ លោកវរសេនីយ៍ត្រី ទេព ហ៊ុយ មេបញ្ជាការកងរាជអាវុធហត្ថក្រុងក្រចេះ និងបក្ខពួក កាលពីល្ងាចថ្ងៃទី១ ខែវិច្ឆិកា ឆ្នាំ២០២១ ត្រូវបានចៅក្រមស៊ើបសួរ សាលាដំបូងខេត្តក្រចេះ សម្រេចឃុំខ្លួនដាក់ពន្ធនាគារបណ្ដោះអាសន្ន ដោយចោទប្រកាន់ចំនួន៣បទល្មើស ពាក់ព័ន្ធការប្រើអំពើហិង្សាទៅលើកុមារីជាកូនឈ្នួល ចំនួន២នាក់ ។
យោងតាមសេចក្ដីប្រកាសព័ត៌មានរបស់សាលាដំបូងខេត្តក្រចេះ បានឲ្យដឹងថា លោក ទេព ហ៊ុយ ត្រូវបានតុលាការចោទប្រកាន់ចំនួន៣បទល្មើស គឺបទទារុណកម្មនិងអំពើឃោរឃៅមានស្ថានទម្ងន់ទោសទាក់ទងនឹងជនរងគ្រោះ, បទហិង្សាដោយចេតនាមានស្ថានទម្ងន់ទោសទាក់ទងនឹងជនរងគ្រោះ និងបទគំរាមកំហែងថានឹងសម្លាប់ តាមមាត្រា២១១ មាត្រា២១៩ និង មាត្រា២៣៣ នៃក្រមព្រហ្មទណ្ឌ ប្រព្រឹត្តនៅចំណុចហាងយីហោ លាង ហ៊ុយ លក់រថយន្តម៉ូតូនិងលក់ទូរស័ព្ទដៃទំនើប ផ្លូវកណ្តាលភូមិត្រពាំងព្រីង សង្កាត់ក្រចេះ ក្រុងក្រចេះ ខេត្តក្រចេះ កាលពីថ្ងៃទី២៧ ខែតុលា ឆ្នាំ២០២១ និងនៅចំណុចភូមិរកាកណ្តាល១ សង្កាត់រកាកណ្តាល ក្រុងក្រចេះ ខេត្តក្រចេះ កាលពីថ្ងៃទី២៧ និងថ្ងៃ២៨ ខែតុលា ឆ្នាំ២០២១ ។
ដោយឡែកបក្ខពួក មានឈ្មោះ គឹម សុវណ្ណរិទ្ធ និង ឈ្មោះ វុធ ត្រូវបានតុលាការចោទប្រកាន់ពីបទហិង្សាដោយចេតនាមានស្ថានទម្ងន់ទោសទាក់ទងនឹងជនរងគ្រោះ តាមមាត្រា២១៩ នៃក្រមព្រហ្មទណ្ឌ ។
សូមបញ្ជាក់ថា លោកស្រី ឈិន សុខឃឿន ម្តាយក្មេងស្រីរងគ្រោះ ថ្លែងប្រាប់ក្រុមអ្នកសារព័ត៌មាន អោយដឹងថា លោកស្រីមានការតក់ស្លុតយ៉ាងខ្លាំង នៅពេលកូនស្រី ដែលទើបមានអាយុ១២ឆ្នាំ ជាឈ្នួលបម្រើនៅផ្ទះលោក ទេព ហ៊ុយ ប្រាប់ថា លោក ទេព ហ៊ុយ បានបញ្ជាអោយកូនចៅប្រើអំពើហិង្សា យកកៅអីវាយក្បាល អោយដេកឱបផ្នូរសត្វឆ្កែ មួយយប់ និងបង្ខំអោយស៊ីអាចម៍ឆ្កែ ថែមទៀត គ្រាន់តែរឿងធ្វើឲ្យឆ្កែងាប់ ១ក្បាលប៉ុណ្ណោះ ។
លោកស្រី បន្តថា លោក ទេព ហ៊ុយ បានសុំសម្របសម្រួល ដោយយល់ព្រមបង់ប្រាក់ចំនួន ២០លានរៀល ដើម្បីបញ្ចប់រឿងនេះ ។ ក្រោយមក ហ៊ានផ្តល់អោយដល់ចំនួន ២ម៉ឺនដុល្លារ ប៉ុន្តែលោកស្រីមិនព្រមនោះទេ ដោយបានប្តឹងផ្តល់រួចរាល់អស់ហើយ ។
ដោយឡែក ក្មេងស្រីរងគ្រោះវិញ និយាយថា មូលហេតុដែលនាងបានច្រមុជសត្វឆ្កែរបស់ដល់ងាប់នោះ ដោយសារតែកូនស្រីពៅរបស់លោក ទេព ហ៊ុយ ជេរប្រមាថ នាងថា «ពូជមីឆ្កែ» ។
ទង្វើរបស់លោក ទេព ហ៊ុយ និងបក្ខពួក ត្រូវបានមហាជនចាត់ទុកថា «ជាអំពើឃោរឃៅ អសីលធម៌ និង ថោកទាបបំផុត» មិនសមធ្វើជាកងកម្លាំងបម្រើប្រជាពលរដ្ឋទៀតនោះទេ ៕
អត្ថបទពាក់ព័ន្ធ ៖ ( ចៅក្រមស៊ើបសួរ សម្រេចឃុំខ្លួនមេប៉េអឹមក្រុងក្រចេះ និងបក្ខពួក ជាបណ្តោះអាសន្ន )
(សមត្ថកិច្ចបានបញ្ជួនលោកមេបញ្ជាការក្រុងក្រចេះ និងបក្សពួករបស់ខ្លួន ទៅសាលាដំបូងខេត្តក្រចេះ ជុំវិញករណីប្រើប្រាស់ហិ.ង្សាលើកូនឈ្នួលរបស់ខ្លួន យ៉ាងឃោរ.ឃៅ )
( ចាប់ខ្លួនមេបញ្ជាការកងរាជអាវុធហត្ថ និងបក្ខពួក ក្រោយធ្វើបា.បកុមារីកូនឈ្នួល២នាក់ )
ចែករំលែកព័តមាននេះ