ខេត្តក្រចេះ ៖ អ្នកនាំពាក្យសាលាដំបូង និងអយ្យការអមសាលាដំបូងខេត្តក្រចេះ បានប្រកាសនារាត្រីថ្ងៃទី០១ ខែវិច្ឆិកា ឆ្នាំ២០២១នេះអោយដឹងថា ចៅក្រមស៊ើបសួរ បានចាត់ការតាមនីតិវិធី និងសម្រេចឃុំខ្លួនជាបណ្តោះអាសន្នលើជនត្រូវចោទឈ្មោះ…
ខេត្តក្រចេះ ៖ អ្នកនាំពាក្យសាលាដំបូង និងអយ្យការអមសាលាដំបូងខេត្តក្រចេះ បានប្រកាសនារាត្រីថ្ងៃទី០១ ខែវិច្ឆិកា ឆ្នាំ២០២១នេះអោយដឹងថា ចៅក្រមស៊ើបសួរ បានចាត់ការតាមនីតិវិធី និងសម្រេចឃុំខ្លួនជាបណ្តោះអាសន្នលើជនត្រូវចោទឈ្មោះ ទេព ហ៊ុយ និងឈ្មោះ គឹម សុវណ្ណរិទ្ធ នៅពន្ធនាគារខេត្តក្រចេះ ដើម្បីធ្វើការស៊ើបសួរបន្ត ។
អ្នកនាំពាក្យសាលាដំបូង ក៏បានអោយដឹងថា នៅថ្ងៃទី០១ ខែវិច្ឆិកា ឆ្នាំ២០២១នេះ អយ្យការអមសាលាដំបូងខេត្តក្រចេះ ទទួលបានសំណុំរឿងព្រហ្មទណ្ឌលេខ៤៨០ ចុះថ្ងៃទី០១ ខែវិច្ឆិកា ឆ្នាំ២០២១នេះ ពីមន្ត្រីនគរបាលយុត្តិធម៌នៃកងរាជអាវុធហត្ថខេត្តក្រចេះ រួមទាំងជនសង្ស័យចំនួន២នាក់ ឈ្មោះ ទេព ហ៊ុយ និងឈ្មោះ គឹម សុវណ្ណរិទ្ធ ។
ក្រោយពីបានពិនិត្យ និងសាកសួររួច តំណាងអយ្យការបានសម្រេចបញ្ជូនសំណុំរឿងទៅចៅក្រមស៊ើបសួរ តាមដីកាសន្និដ្ឋានបញ្ជូនរឿងឲ្យស៊ើបសួរលេខ ២៨៦ អ.យ.ក/២១ ចុះថ្ងៃទី០១ ខែវិច្ឆិកា ឆ្នាំ២០២១ ដោបើកការស៊ើបសួរលើ ៖
ទី១- ឈ្មោះ ទេព ហ៊ុយ ភេទប្រុស អាយុ ៤២ឆ្នាំ ជាមេបញ្ជាការកងរាជអាវុធហត្ថក្រុងក្រចេះ ពីបទ ទារុណកម្ម និងអំពើឃោរឃៅមានស្ថានទម្ងន់ទោសទាក់ទងនឹងជនរងគ្រោះ, ហិង្សាដោយចេតនាមានស្ថានទម្ងន់ទោសទាក់ទងនឹងជនរងគ្រោះ, គំរាមកំហែងថានឹងសម្លាប់ តាមបញ្ញាត្តិមាត្រា ២១១, ២១៩, ៣៣ នៃក្រមព្រហ្មទណ្ឌ នៃព្រះរាជាណាចក្រកម្ពុជា ប្រព្រឹត្តនៅហាងយីហោ លាង ហ៊ុយ លក់រថយន្ត ម៉ូតូ និងទូរស័ព្ទដៃទំនើប ផ្លូវកណ្ដាល ភូមិត្រពាំងព្រីង សង្កាត់ក្រចេះ ក្រុងក្រចេះ ខេត្តក្រចេះ កាលពីថ្ងៃទី២៧ ខែតុលា ឆ្នាំ២០២១ និងនៅចំណុចភូមិរកាកណ្ដាល១ សង្កាត់រកាកណ្ដាល ក្រុងក្រចេះ ខេត្តក្រចេះ កាលពីថ្ងៃទី២៧-២៨ ខែតុលា ឆ្នាំ២០២១ ។
និងទី២- ឈ្មោះ គឹម សុវណ្ណរិទ្ធ ភេទប្រុស អាយុ ៤០ឆ្នាំ, ឈ្មោះ វុធ ភេទប្រុស ពីបទ ហិង្សាដោយចេតនាមានស្ថានទម្ងន់ទោសទាក់ទងនឹងជនរងគ្រោះ, តាមបញ្ញាត្តិមាត្រា ២១៩ នៃក្រមព្រហ្មទណ្ឌ នៃព្រះរាជាណាចក្រកម្ពុជា ប្រព្រឹត្តនៅចំណុចហាងយីហោ លាង ហ៊ុយ លក់រថយន្ត ម៉ូតូ និងទូរស័ព្ទដៃទំនើប ផ្លូវកណ្ដាល ភូមិត្រពាំងព្រីង សង្កាត់ក្រចេះ ក្រុងក្រចេះ ខេត្តក្រចេះ កាលពីថ្ងៃទី២៧ ខែតុលា ឆ្នាំ២០២១ ។
សូមជម្រាបដែរថា សមត្ថកិច្ចបានបញ្ជួនលោកមេបញ្ជាការក្រុងក្រចេះ និងបក្សពួករបស់ខ្លួន ទៅសាលាដំបូងខេត្តក្រចេះ ជុំវិញករណីប្រើប្រាស់ហិ.ង្សាលើកូនឈ្នួលរបស់ខ្លួន យ៉ាងឃោរ.ឃៅ ។
សូមរម្លឹកថា ចាប់ខ្លួនមេបញ្ជាការកងរាជអាវុធហត្ថ និងបក្ខពួក ក្រោយធ្វើបា.បកុមារីកូនឈ្នួល២នាក់ ៕
ចែករំលែកព័តមាននេះ