រាជធានីភ្នំពេញ ៖ ម្ចាស់រោងចក្រ សហគ្រាសផលិតចំណីអាហារនៅកម្ពុជា បាននិយាយថាជំងឺកូវីដ ១៩ បានបង្កផលប៉ះពាល់ធ្ងន់ធ្ងរដល់ចង្វាក់ផលិតកម្មចំណីអាហារក្នុងស្រុក ។ លោកស្រី កែវ មុំ ប្រធានសមាគមសហគ្រិនស្ត្រី និងជាអគ្គនាយិកាក្រុមហ៊ុនផលិតនំស្រួយលីលី បាននិយាយថានៅពេលផ្ទុះកូវីដ ១៩ សាលារៀននៅកម្ពុជាជាច្រើនបានបិទទ្វារដែលធ្វើឲ្យទីផ្សារលក់ធំរបស់ក្រុមហ៊ុនលោកស្រីរួមតូច ។ ម្យ៉ាងទៀត កូវីដ ១៩ បានធ្វើឱ្យការដឹកជញ្ជូនទៅកាន់ទីផ្សារអន្តរជាតិមានការឡើងថ្លៃ និងមិនសូវមានកប៉ាល់ចេញចូលប្រទេសកម្ពុជា ដូច្នេះការនាំចេញទៅកាន់ទីផ្សារអន្តរជាតិក៏ត្រូវបានកាត់បន្ថយមួយចំនួនផងដែរ ។
នៅក្នុងវេទិកាមគ្គុទេសក៍ស្ដារអាជីវកម្មកែច្នៃផលិតផលនៅកម្ពុជា នៅថ្ងៃទី ២៨ តុលា ២០២១ នេះប្រធានសមាគមសហគ្រិនស្ត្រីឲ្យដឹងថា «នៅក្នុងឆ្នាំ ២០២០ បញ្ហាកូវីដ ១៩ បានកើតឡើងមែន ប៉ុន្តែទីផ្សារនិងការនាំចេញ ទៅកាន់ទីផ្សារអន្តរជាតិនៅតែបន្ត តែចូលមកដល់ឆ្នាំ ២០២១ វិបត្តិនៅកម្ពុជាកាន់តែធ្ងន់ សាលារៀនបានបិទទាំងអស់ ហើយការដឹកជញ្ជូនចេញចូលក៏ឡើងថ្លៃជាមួយនឹងកង្វះកុងតឺន័រផងដែរនោះទើបធ្វើឱ្យអ្នកផលិតកាន់តែជួបបញ្ហាជាងឆ្នាំ ២០២០» ។
លោកស្រីបន្ថែមថា ទន្ទឹមនឹងបញ្ហានេះដែរ តម្លៃវត្ថុធាតុដើមដែលនាំចូលពីខាងក្រៅប្រទេសក៏ឃើញថា មានការឡើងថ្លៃ និងពេលខ្លះ មិនមានការផ្គត់ផ្គង់ពីខាងក្រៅទៅទៀត ជាក់ស្ដែងវត្ថុធាតុដើមសម្រាប់ផ្គត់ផ្គង់ដល់ខ្សែច្រវ៉ាក់ផលិតកម្មចំណីអាហារមកពីប្រទេសចិនបាន និងកំពុងឡើងថ្លៃ ហើយមានតម្រូវការខ្ពស់ និងធ្វើឱ្យអ្នកបញ្ជាទិញដណ្ដើមគ្នាកុម្មង់ទៅទៀត ។
កញ្ញា ថូង ធីតា ម្ចាស់សហគ្រាសផលិតអំបិលធម្មជាតិនៅខេត្តកំពតក៏បានឱ្យដឹងផងដែរថា នៅក្នុងដំណាក់កាលនៃការរីករាលដាលនៃជំងឺកូវីដ ១៩ តម្រូវការអំបិលនៅក្នុងប្រទេសកម្ពុជាក៏ឃើញថា មានការថមថយ តែមិនជាបញ្ហាធំសម្រាប់អាជីវកម្មនោះទេ ។ អ្វីដែលជាបញ្ហាគឺតម្រូវការសម្បកវេចខ្ចប់អំបិល ដែលត្រូវការកុម្មង់ទិញពីក្រៅប្រទេសមានការយឺតយ៉ាវ ហើយពេលខ្លះយើងបានកុម្មង់និងព្រមព្រៀងទៅហើយ តែក្រោយមកក៏មានការលុបចោលពីអ្នកផ្គត់ផ្គង់វិញដោយសារតែ បញ្ហាកូវីដ ១៩ អត់មានមធ្យោបាយដឹកជញ្ជូនជាដើម ។
ម្ចាស់សហគ្រាសផលិតអំបិលធម្មជាតិនៅខេត្តកំពតបន្តថានៅពេលខ្សែចង្វាក់ផលិតកម្មក្នុងស្រុកមួយចំនួនជួបបញ្ហា និងការផលិតធ្លាក់ចុះ បានធ្វើឱ្យតម្រូវការអំបិលដែលផ្គត់ផ្គង់ទៅកាន់សហគ្រាសទាំងនោះថមថយដែរ ដូច្នេះបើសិនជាបញ្ហាការផលិតនូវចំណីអាហារ មានបញ្ហាហើយវានឹងអូសទាញគ្នាទៅជាមួយផងដែរ ។
សហគ្រិនជាច្រើនបានរំពឹងថា ការបើកប្រទេសឡើងវិញរបស់រដ្ឋាភិបាល នឹងជំរុញឱ្យមានតម្រូវការចំណីអាហារឡើងវិញ ជាក់ស្ដែងនៅពេលរដ្ឋាភិបាលប្រកាសបើកសាលារៀនទូទាំងប្រទេស សិស្សនឹងចូលរៀន ហើយពួកគាត់នឹងមានតម្រូវការក្នុងការហូបចុកនៅក្នុងសាលា ដូច្នេះការផលិតចំណីអាហារក៏នឹងអាចកើនឡើងជាងមុនបន្តិចឡើងវិញ ៕
ចែករំលែកព័តមាននេះ