ចាប់បានកូនក្រពើ៣ក្បាលទៀតហើយ ធ្វើឲ្យប្រជាពលរដ្ឋមានការភ័យខ្លាច
- កំពង់ឆ្នាំង
ប្រជាពលរដ្ឋនៅក្នុងភូមិកោះលត ឃុំកោះថ្កូវ ស្រុកជលគិរី បានចាប់កូនក្រពើទៀតហើយ ដែលមានចំនួន៣ក្បាល ខណៈពេលដែលពួកគាត់ដើរឆ្លុះកង្កែប
ខេត្តកំពង់ឆ្នាំង ៖ ប្រជាពលរដ្ឋនៅក្នុងភូមិកោះលត ឃុំកោះថ្កូវ ស្រុកជលគិរី បានចាប់កូនក្រពើទៀតហើយ ដែលមានចំនួន៣ក្បាល ខណៈពេលដែលពួកគាត់ដើរឆ្លុះកង្កែប កាលពីយប់ថ្ងៃទី២៧ ខែតុលា ឆ្នាំ២០២១។ ហើយករណីចាប់បានកូនក្រពើជាបន្តបន្ទាប់បែបនេះ ធ្វើឲ្យប្រជាពលរដ្ឋមានការភ័យខ្លាច ព្រោះមិនទាន់ដឹងប្រភពច្បាស់លាស់ថា តើកូនក្រពើនោះរួចពីកន្លែងចិញ្ចឹម ឬក៏អាចជាក្រពើធម្មជាតិ?
បើតាមការបញ្ជាក់របស់បុរសម្នាក់ឈ្មោះ សំណាង បានឲ្យដឹងថា នៅយប់ថ្ងៃទី២៧ ខែតុលា ពួកគាត់មានគ្នាចំនួន៣នាក់ បាននាំគ្នាឆ្លុះកង្កែប និងចាប់ត្រីនៅតាមវាលស្រែចុងភូមិ ហើយក៏បានប្រទះឃើញសត្វក្រពើចំនួន៣ក្បាលដែលកំពុងតែបណ្ដែតខ្លួនក្នុងទឹក ។ ពេលនោះពួកគាត់ក៏នាំគ្នាដេញចាប់បាន ទាំង៣ក្បាលនោះតែម្ដង។
បុរសខាងលើបានបញ្ជាក់ដែរថា នៅម្ដុំភូមិនេះ មិនមាននរណាម្នាក់ចិញ្ចឹមក្រពើនោះទេ ប៉ុន្តែមិនដឹងថា កូនក្រពើនោះមកពីណាឡើយ? ហើយកូនក្រពើទាំង៣ក្បាលនេះ គឺមានប្រវែងចាប់ពី០,៨ម៉ែត្រ ដល់១,៣ម៉ែត្រ និងមានទម្ងន់ចាប់ពី២គីឡូក្រាមដល់៤គីឡូក្រាម។
បើតាមប្រភពពីប្រជាពលរដ្ឋនៅភូមិនោះ ក៏បានលើកឡើងថា ការចាប់បានក្រពើលើកនេះ មិនមែនជាលើកទីមួយទេ គឺកន្លងទៅ ប្រជាពលរដ្ឋក៏ធ្លាប់បានចាប់កូនក្រពើជាបន្តបន្ទាប់ប្រមាណជាង១០ក្បាលមកហើយ។
ជាក់ស្ដែងនៅយប់ថ្ងៃទី២៤ ខែតុលា កន្លងមកថ្មីៗនេះ ក៏មានប្រជាពលរដ្ឋម្នាក់ឈ្មោះ ភារម្យ ក៏ចាប់បានក្រពើមួយក្បាលដែរ ទម្ងន់៣គីឡូក្រាម ។ ហើយក្រពើដែលចាប់បាននោះ ត្រូវបានពួកគាត់យកទៅធ្វើម្ហូប ដោយមិនបានប្រគល់ឲ្យទៅខាងណានោះទេ។
ដោយឡែកតាមការបញ្ជាក់របស់លោក ឃឹម ឡុង នាយផ្នែករដ្ឋបាលជលផលកំពង់ប្រាសាទ បានឲ្យដឹងថា៖ ក្នុងភូមិសាស្ត្រ ឃុំកោះថ្កូវ ស្រុកជលគីរីនេះ គ្មានអ្នកចិញ្ចឹមក្រពើទេ ។ លោកសង្ស័យថា កូនក្រពើដែលប្រជាពលរដ្ឋចាប់បាននេះ គឺជាកូនក្រពើធម្មជាតិ ដែលមកតាមទឹកទន្លេឡើង ព្រោះថា កន្លងមក ក៏មានប្រជាពលរដ្ឋខាងខ្វិតតាំងក្រសាំង ទឹកដីខេត្តកំពង់ចាម ក៏ធ្លាប់ចាប់បានកូនក្រពើ២ក្បាលដែរ ដែលទម្ងន់១ក្បាលជាង១០គីឡូក្រាម ដោយហេតុនេះហើយ លោកសូមឲ្យមានការប្រុងប្រយ័ត្ន៕
ចែករំលែកព័តមាននេះ