ប្រទេសវៀតណាម ៖ សារាចរកំណត់លើឥណទានសម្រាប់ការធ្វើពាណិជ្ជកម្មភាគហ៊ុននឹងធ្វើឲ្យទីផ្សារក្នុងស្រុកមានស្ថិរភាព ។ នេះបើតាមប្រសាសន៍របស់លោក ដូ បាវង៉ុក អ្នកជំនាញភាគហ៊ុនជាន់ខ្ពស់មកពីក្រុមហ៊ុនមូលបត្រ MBS ។
លោក ដូ បាវង៉ុក ឱ្យដឹងថា ៖ « សារាចរលេខ 07/2016/ TT-BTC បានចូលជាធរមាននៅថ្ងៃទី១៥ មីនានេះ ។ សារាចរនេះ នឹងបញ្ឈប់ក្រុមហ៊ុនមូលបត្រ និងវិនិយោគិនទាំងឡាយពីការប្រើប្រាស់ឥណទានភាគីទី៣រវាងពួកគេ និងបណ្តាធនាគារ ដើម្បីកំណត់ហានិភ័យលើវិស័យវិនិយោគ » ។
ការផ្តល់កម្ចីជាមូលដ្ឋាន គឺជាឥណទានរវាងក្រុមហ៊ុនមូលបត្រនិងវិនិយោគិន ដែលអនុញ្ញាតដោយគណៈកម្មការមូលបត្ររបស់រដ្ឋ និងទីផ្សារហ៊ុន ពោលគឺមាន៨០% នៃការផ្តល់ប្រាក់កម្ចីសរុប ខណៈដែលប្រាក់កម្ចីរង គឺជាកម្ចីនៅក្រោមក្រុមហ៊ុនមូលបត្រ ដែលបានប្រើប្រាស់ប្រាក់របស់វិនិយោគិនធ្វើជាប្រាក់បញ្ញើក្នុងការទាញយកឥណទានពីធនាគារ ។
គួរបញ្ជាក់ថា ការផ្តល់កម្ចីជាមូលដ្ឋាន គឺត្រូវបានដោះស្រាយដោយក្រុមហ៊ុនមូលបត្រធំៗ ជាមួយនឹងដើមទុន ភាគហ៊ុន និងមូលបត្របំណុល ក្នុងការទាញយកសារប្រយោជន៍នៃការប្រើប្រាស់កម្ចីទ្រង់ទ្រាយធំ ។ ចំណែកក្រុមហ៊ុនមូលបត្រតូចៗ មានសក្តានុពលទាបជាងក្នុងការទាក់ទាញវិនិយោគិនបន្ថែម ។ រីឯក្រុមហ៊ុនមូលបត្រមួយចំនួនទៀតបានអនុញ្ញាតឲ្យវិនិយោគិនរបស់ខ្លួនប្រើប្រាស់ការធ្វើពាណិជ្ជកម្មជាមួយនឹងស្តុក ដោយមិនរាប់បញ្ចូលទាំងការអនុញ្ញាត និងផ្តល់ប្រាក់កម្ចីច្រើនជាង៥០%ឡើយ។
លោក ដូ បាវង៉ុក បន្ថែមថា ៖ « តាមសារាចរនេះ ឈ្មួញកណ្តាលត្រូវតែដកវត្ថុបញ្ចាំរបស់ពួកគេពីធនាគារ ខណៈវិនិយោគិនត្រូវបិទគណនីរបស់ពួកគេ និងមិនទទួលប្រាក់បន្ថែមពីធនាគារទៀតឡើយ ។ ករណីនេះ វិនិយោគិនមួយចំនួនត្រូវតែលក់ភាគហ៊ុនបញ្ចាំរបស់ពួកគេ ដើម្បីបំពេញកាតព្វកិច្ចរបស់ខ្លួនជាមួយធនាគារ ។ ការធ្វើបែបនេះ អាចកំណត់នូវលំហូរសាច់ប្រាក់ចូលទីផ្សារ ខណៈវាអាចជួយបង្កើនការផ្គត់ផ្គង់ភាគហ៊ុន និងផ្តល់នូវកាលានុវត្តភាពបន្ថែមដល់វិនិយោគិនដទៃទៀត » ។
សារាចរនេះ ត្រូវបានគេរំពឹងថា នឹងធ្វើឲ្យវិនិយោគិនក្នុងស្រុកអាចត្រឡប់ទៅរកកម្ចីមូលដ្ឋាន ដើម្បីបង្កើនទីផ្សារភាគហ៊ុនក្នុងស្រុក ៕
ចែករំលែកព័តមាននេះ