បរទេស ៖ តម្លៃមាសអន្តរជាតិ កាលពីថ្ងៃទី២១ តុលា ឆ្នាំ២០២៥ បានដាំក្បាលចុះ និងជាការធ្លាក់ចុះប្រចាំថ្ងៃ ឬត្រឹមតែ១ថ្ងៃទាបបំផុតក្នុងរយៈពេល៥ឆ្នាំ ចំពេលដែលតម្លៃប្រាក់ដុល្លារអាមេរិកកើនឡើង…
បរទេស ៖ តម្លៃមាសអន្តរជាតិ កាលពីថ្ងៃទី២១ តុលា ឆ្នាំ២០២៥ បានដាំក្បាលចុះ និងជាការធ្លាក់ចុះប្រចាំថ្ងៃ ឬត្រឹមតែ១ថ្ងៃទាបបំផុតក្នុងរយៈពេល៥ឆ្នាំ ចំពេលដែលតម្លៃប្រាក់ដុល្លារអាមេរិកកើនឡើង ហើយស្របពេលដែលបណ្តាវិនិយោគិនសម្រុកលក់ចេញ ដើម្បីទទួលបានប្រាក់ចំណេញ បន្ទាប់ពីការរំពឹងទុកកើនឡើងកាន់តែខ្លាំងនៃការកាត់បន្ថយអត្រាការប្រាក់របស់ធនាគារកណ្តាលអាមេរិក (Fed)។ នេះបើយោងតាមប្រភពពីទីភ្នាក់សារព័ត៌មាន Reuters បានចេញផ្សាយ។
តម្លៃមាសអន្តរជាតិ កាលពីថ្ងៃទី២១ ខែតុលា បានធ្លាក់ចុះ ៥,៥% ដល់កម្រិតទាបបំផុតក្នុង១សប្តាហ៍ មកនៅត្រឹមតែ ៤ ១១៥ដុល្លារក្នុង១អោន (៤ ៩៥២ដុល្លារក្នុង១តម្លឹង) បន្ទាប់ពីបានហក់ឡើងដល់កម្រិតខ្ពស់បំផុត ៤ ៣៨១ដុល្លារ/អោន (៥ ២៧៨ដុល្លារ/តម្លឹង) កាលពីថ្ងៃទី២០ ខែតុលា ដែលនេះជាការធ្លាក់ចុះដ៏ធំបំផុត ចាប់តាំងពីខែសីហា ឆ្នាំ២០២០។
យ៉ាងណាមិញ បើតាមប្រភពពី Reuters នៅថ្ងៃទី២២ តុលា តម្លៃមាសអន្តរជាតិបានបន្តធ្លាក់ចុះបន្ថែមទៀត មកនៅត្រឹម ៤ ១១១ដុល្លារ/អោន (៤ ៩៥៣ដុល្លារ/តម្លឹង) គិតត្រឹមម៉ោង ១០:១៥នាទីព្រឹក (ម៉ោងនៅកម្ពុជា)។
ការធ្លាក់ចុះយ៉ាងគំហុកនេះ កើតឡើងដោយថ្លឹងថ្លែងសញ្ញានៃការបន្ធូរបន្ថយភាពតានតឹងពាណិជ្ជកម្មរវាងសហរដ្ឋអាមេរិក និងប្រទេសចិន។ មួយផ្នែកទៀត ដោយសារតែបណ្តាវិនិយោគិនបានទាញយកអត្ថប្រយោជន៍ពីការកើនឡើងកំណត់ត្រាថ្មីៗរបស់ដុំមាស តាមរយៈការសម្រុកលក់ចេញ ដើម្បីទទួលបានប្រាក់ចំណេញ ខណៈពេលដែលអ្នកទាំងនោះកំពុងរង់ចាំទិន្នន័យអតិផរណារបស់អាមេរិក ដែលនឹងត្រូវចេញផ្សាយនៅចុងសប្តាហ៍នេះ។
លោក Matt Simpson អ្នកវិភាគជាន់ខ្ពស់របស់គេហទំព័រ StoneX បានលើកឡើងថា ១ការស្រុតចុះនៃភាពតានតឹងពាណិជ្ជកម្មរវាងអាមេរិក និងចិន ប្រៀបដូចជាផ្កាព្រិលដែលបណ្តាលឱ្យមានការដាំក្បាលចុះ និងការផ្លាស់ប្តូរសន្ទុះនៃការធ្វើពាណិជ្ជកម្មមាស។
ក្រឡេកទៅកាន់ប្រធានាធិបតីអាមេរិក លោក ដូណាល់ ត្រាំ (Donald Trump) ឯណោះវិញ បានថ្លែងថា លោករំពឹងថានឹងឈានដល់កិច្ចព្រមព្រៀងពាណិជ្ជកម្មដោយស្មើភាពជាមួយនឹងប្រធានាធិបតីចិន លោក ស៊ី ជិនភីង (Xi Jinping) នៅពេលមេដឹកនាំប្រទេសមហាអំណាចសេដ្ឋកិច្ចធំបំផុតរបស់ពិភពលោកអ្នកទាំងពីរនេះ ជួបគ្នានៅសប្តាហ៍ក្រោយនៅប្រទេសកូរ៉េខាងត្បូង។
តម្លៃមាសបានកើនឡើងប្រហែល ៥៦% នៅឆ្នាំនេះ ដោយឈានដល់កម្រិតខ្ពស់បំផុតគ្រប់ពេល ៤ ៣៨១ដុល្លារ/អោន (៥ ២៧៨ដុល្លារ/តម្លឹង) កាលពីថ្ងៃទី២០ ខែតុលា ឆ្នាំ២០២៥ ជំរុញដោយភាពមិនច្បាស់លាស់ភូមិសាស្ត្រនយោបាយ និងសេដ្ឋកិច្ចសកល ការកើនឡើងនៃការរំពឹងទុកជុំវិញការកាត់បន្ថយអត្រាការប្រាក់របស់ Fed និងការសម្រុកទិញមាសស្តុកទុកជាទុនបម្រុង ដោយបណ្តាធនាគារកណ្តាលទូទាំងពិភពលោក។
ឥឡូវនេះ បណ្តាវិនិយោគិនកំពុងទន្ទឹងរង់ចាំការចេញផ្សាយរបាយការណ៍សន្ទស្សន៍តម្លៃទំនិញប្រើប្រាស់ប្រចាំខែកញ្ញារបស់អាមេរិក នៅថ្ងៃទី២៤ ខែតុលា ខាងមុខនេះ សម្រាប់ចំណុចសំខាន់លើការចង្អុលបង្ហាញបន្ថែមទៀត អំពីដំណើរការកាត់អត្រាការប្រាក់របស់ Fed ខណៈរបាយការណ៍នេះ ត្រូវបានពន្យារពេលដោយសារការបិទរដ្ឋាភិបាលសហរដ្ឋអាមេរិក។ ការរំពឹងទុកដែលថា Fed នឹងទម្លាក់អត្រាការប្រាក់សំខាន់របស់ខ្លួន ២៥ពិន្ទុមូលដ្ឋាននៅសប្តាហ៍ក្រោយ និង១លើកទៀតនៅក្នុងខែធ្នូចុងឆ្នាំនេះ៕
ចែករំលែកព័តមាននេះ