ប្រទេសមីយ៉ាន់ម៉ា ៖ គណៈកម្មការវិនិយោគមីយ៉ាន់ម៉ា ហៅកាត់ថា MIC បានលុបចោលនូវបញ្ជីឈ្មោះសហគ្រាសសម្រាប់ការវិនិយោគបរទេស ដែលតម្រូវឱ្យចូលរួមជាមួយក្រុមហ៊ុនក្នុងស្រុក ដោយបើកចំហទ្វារក្នុងការផលិតកៅស៊ូ និងគ្រាប់ពូជ ។
គណៈកម្មការវិនិយោគមីយ៉ាន់ម៉ា MIC បានបញ្ជាក់កាលពីថ្ងៃទី២៤ មីនាថា ការផលិត និងចែកចាយគ្រាប់ពូជកៅស៊ូកូនកាត់ និងការផលិតគ្រាប់ពូជកៅស៊ូក្នុងស្រុក ក៏ដូចជាផលិតផលកៅស៊ូ គឺមិនតម្រូវឲ្យក្រុមហ៊ុនវិនិយោគបរទេសមានដៃគូជាមួយក្រុមហ៊ុនក្នុងស្រុកទៀតឡើយ ។
ការបញ្ជាក់នេះ គឺយោងតាមការធ្វើកំណែទម្រង់តាមប្រកាសលេខ 26/2016 នៃបញ្ជីសកម្មភាពសេដ្ឋកិច្ច ដែលតម្រូវឲ្យមានការច្របាច់បញ្ចូលគ្នារវាងក្រុមហ៊ុនបរទេស និងក្រុមហ៊ុនក្នុងស្រុក ដោយស្ថិតនៅក្រោមច្បាប់វិនិយោគបរទេស ។
យោងតាមមន្ត្រីមួយរូបមកពីគណៈកម្មការវិនិយោគមីយ៉ាន់ម៉ា បានប្រាប់មីយ៉ាន់ម៉ាថែមស៍ កាលពីថ្ងៃអង្គារថា ៖ « គណៈកម្មការវិនិយោគមីយ៉ាន់ម៉ាចង់បន្ធូរបន្ថយដល់បណ្តាក្រុមហ៊ុនបរទេស ដើម្បីទាញយកផលប្រយោជន៍នៃស្ថានភាពសេដ្ឋកិច្ចក្នុងប្រទេស ។ ការលុបចោលសកម្មភាពរួមបញ្ចូលគ្នានេះ គឺពឹងផ្អែកលើតម្រូវការរបស់ជាតិ និងដោយសារមានការស្នើសុំពីសំណាក់វិនិយោគិនបរទេស ។ ម្យ៉ាងទៀត ការធ្វើកំណែទម្រង់នេះ ក៏មានគោលបំណងកំណត់នូវទីតាំងសហគ្រាសផងដែរ ដែលមិនត្រឹមតែសកម្មភាពសេដ្ឋកិច្ចប៉ុណ្ណោះទេ » ។
គួរបញ្ជាក់ថា ការហាមឃាត់សកម្មភាពរបស់ក្រុមហ៊ុនបរទេសរួមមាន ការផលិតអាវុធ និងគ្រឿងផ្ទុះ ការរុករកនិងកែច្នៃត្បូង ក៏ដូចជាការចុះផ្សាយភាសាជនជាតិភាគតិចផងដែរ ៕
ចែករំលែកព័តមាននេះ