រាជធានីភ្នំពេញ ៖ ក្រោយបញ្ចប់ការស៊ើបសួរអស់រយៈពេល៣ទៅ៤ថ្ងៃ លោក កី ម៉ានេរ៉ា ចៅក្រមសាលាដំបូងរាជធានីភ្នំពេញ កាលពីល្ងាចថ្ងៃទី២៦ ខែតុលា ឆ្នាំ២០ ២១ បានសម្រេចចេញដីកាឃុំខ្លួនស្ត្រីជនជាតិចិនចំនួន៣នាក់ដាក់ពន្ធនាគារជាបណ្តោះអាសន្ន ពាក់ព័ន្ធករណី «នាំយកចេញដោយមិនស្របច្បាប់សម្រាប់នាំឆ្លងដែន» (ការនាំទា.រកឆ្លងដែនខុសច្បាប់) ពីកម្ពុជាទៅចិន ។ បានជាចៅក្រមស៊ើបសួរសម្រេចឃុំខ្លួនស្ត្រីជនជាតិចិនទាំង៣នាក់នោះ គឺបន្ទាប់ពីលោក សឿ ឡងឌី ព្រះរាជអាជ្ញារងតំណាងអយ្យការអមសាលាដំបូង បានសម្រេចធ្វើការចោទប្រកាន់ជនជាប់សង្ស័យជាផ្លូវការ ។
សូមបញ្ជាក់ថា កាលពីរសៀលថ្ងៃទី២៣ ខែតុលា ឆ្នាំ២០២១ នេះ កម្លាំងសមត្ថកិច្ចនគរបាលនាយកដ្ឋានប្រឆាំងការជួញដូរមនុស្ស និងការពារអនីតិជនក្រសួងមហាផ្ទៃ បានបញ្ជូនខ្លួនស្ត្រីជនជាតិចិនចំនួន៣នាក់ទៅកាន់សាលាដំបូងរាជធានីភ្នំពេញ ពាក់ព័ន្ធករណី «នាំទា.រកបម្រុងជិះយន្តហោះឆ្លងដែនដោយខុសច្បាប់» ។
ជនសង្ស័យជាជនជាតិចិនទាំង៣នាក់នោះ មាន ៖ ១- ឈ្មោះ LI BINGRONG ភេទស្រី អាយុ៣៩ឆ្នាំ ២- ឈ្មោះ WEI QIUCHAN ភេទស្រី អាយុ៥២ឆ្នាំ និង៣- ឈ្មោះ ZHANG QIAN ភេទស្រី អាយុ២៥ឆ្នាំ។
ទាក់ទិននឹងការចាប់ខ្លួនស្ត្រីជនជាតិចិន៣នាក់ បញ្ជូនទៅកាន់សាលាដំបូងរាជធានីភ្នំពេញនោះ ត្រូវបានប្រភពព័ត៌មានបង្ហើបឲ្យដឹងថា កាលពីព្រឹកថ្ងៃទី២០ ខែតុលា ឆ្នាំ២០២១ កម្លាំងសមត្ថកិច្ចនគរបាលអន្តោប្រវេសន៍ ប្រចាំច្រកទ្វារអាកាសយានដ្ឋានអន្តរជាតិភ្នំពេញ បានធ្វើការឃាត់ខ្លួនជនសង្ស័យទាំង៣នាក់ ក្នុងករណីប្រព្រឹត្តបទល្មើសជាក់ស្តែង ដែលកំពុងបីទា.រកអាយុមិនលើសពី១ឆ្នាំ ម្នាក់មួយៗបម្រុងជិះយន្តហោះឆ្លងដែនទៅកាន់ប្រទេសចិន ។
ក្រោយឃាត់ខ្លួនស្ត្រីចិនទាំង៣នាក់នោះ សមត្ថកិច្ចនគរបាលប្រចាំច្រកទ្វារព្រលានយន្តហោះអន្តរជាតិភ្នំពេញ បានសហការប្រគល់ជនសង្ស័យ និងទារកទាំង៣នាក់ ឲ្យទៅសមត្ថកិច្ចជំនាញ នៃនាយកដ្ឋានប្រឆាំងការជួញដូរមនុស្ស និងការពារអនីតិជន ដើម្បីបន្តនីតិវិធី ។ ដូច្នោះហើយ ទើបជនសង្ស័យត្រូវបានសមត្ថកិច្ចការិយាល័យប្រឆាំងការជួញដូរមនុស្សឆ្លងដែន កសាងសំណុំរឿងបញ្ជូនទៅកាន់សាលាដំបូងរាជធានីភ្នំពេញ ។ ចំណែកទា.រកប្រុស-ស្រីទាំង៣នាក់នោះមានអាយុមិនលើសពី១ឆ្នាំ ត្រូវបានសមត្ថកិច្ចនគរបាលនាយកដ្ឋានប្រឆាំងការជួញដូរមនុស្ស និងការពារអនីតិជន ប្រគល់ឲ្យទៅក្រសួងសង្គមកិច្ចយកទៅចិញ្ចឹមបីបាច់ថែទាំជាបណ្តោះអាសន្ន ដោយរង់ចាំសាលក្រមរបស់តុលាការសម្រេច។
សំណុំរឿងស្ត្រីចិនទាំង៣នាក់នេះ បានស្ថិតនៅដៃលោក សឿ ឡង់ឌី ព្រះរាជអាជ្ញារង (ប្រចាំការ) នៃអយ្យការសាលាដំបូងរាជធានីភ្នំពេញ បើកការស៊ើបសួរ ដែលការសាកសួរនោះ នៅមិនទាន់បានបញ្ចប់ទេ ដោយពេលវេលាល្ងាចផុតម៉ោងរដ្ឋបាល ដែលមន្ត្រីរាជការត្រូវសម្រាក ទើបតំណាងអយ្យការបានផ្ញើជនសង្ស័យឲ្យទៅសមត្ថកិច្ចគ្រប់គ្រងវិញ និងតម្រូវឲ្យនាំមកសាកសួរបន្តនៅព្រឹកថ្ងៃទី២៤ ខែតុលា បន្តទៀត ។
បន្ទាប់មកតំណាងអយ្យការ បានធ្វើការចោទប្រកាន់ជនសង្ស័យជាផ្លូវការ និងចាត់បញ្ជូនទៅខាងចៅក្រមស៊ើបសួរ ដើម្បីសម្រេចឃុំខ្លួនស្ត្រីជនជាតិចិនទាំង៣នាក់នោះ ដាក់ពន្ធនាគារជាបណ្តោះអាសន្ន ៕
ចែករំលែកព័តមាននេះ