ខេត្តបាត់ដំបង ៖ ពិតជាចិត្តសឿងគ្រាន់បើមែន បុរសម្នាក់បានស្ទុះចូលទៅបើកលួចយករថយន្តគេ រួចជិះចេញយ៉ាងលឿនពីកន្លែងចត ខណៈម្ចាស់រថយន្តនោះមិនបានពន្លត់រថយន្ត រួចបើកទ្វារដើរចុះទៅរកទិញគ្រឿងត្រាក់ទ័រមិនបានប៉ុន្មានជំហ៊ានផង។
បើតាមសមត្ថកិច្ចបានប្រាប់ថា ហេតុការណ៍ដែលមិនធ្លាប់ជួប និងដ៏គួរឲ្យភ្ញាក់ផ្អើលនេះ បានកើតឡើងកាលពីវេលាម៉ោង១និង១៥នាទីរសៀលថ្ងៃទី២៦ តុលា ស្ថិតនៅចំណុចភូមិវត្តគរ សង្កាត់វត្តគរ ក្រុងបាត់ដំបង។ ជនសង្ស័យ ត្រូវបានកម្លាំងការិយាល័យព្រហ្មទណ្ឌកំរិតស្រាលនៃស្នងការខេត្ត តាមស្ទាក់ចាប់បានភ្លាមៗដែរ ក្រោយកើតហេតុប៉ុន្មាននាទីប៉ុណ្ណោះ។
ប្រធានការិយាល័យព្រហ្មទណ្ឌកំរិតស្រាល លោក ឈឿង គឹមសុង បានប្រាប់ថា ជនសង្ស័យដៃឆើតនោះឈ្មោះ ហួន សុខហេង ភេទប្រុស អាយុ២៨ឆ្នាំ មុខរបរព្រូរថយន្តដឹកទំនិញ រស់នៅភូមិជុកក្រៅ ឃុំជុក ស្រុកត្បូងឃ្មុំ ខេត្តត្បូងឃ្មុំ ។ លោកនិយាយថា ជនចិត្តស្លុយនេះ បានលួចយករថយន្តម៉ាក MITSUBISHI Triton ពណ៌.ស ស៊េរីឆ្នាំ២០០២ ពាក់ស្លាកលេខបាត់ដំបង 2A-8683 ដែលមានម្ចាស់ឈ្មោះ ហួយ គឹមហ៊ន ភេទប្រុស អាយុ២៣ឆ្នាំ នៅភូមិអូរចា សង្កាត់អូរចា ក្រុងបាត់ដំបង។
លោកគឹម សុង បានបញ្ជាក់ថា ជនដៃដល់បានចូលទៅបើកលួចយករថយន្តនោះ នៅពេលម្ចាស់បើកទ្វារចុះដើរចេញពីរថយន្តមិនបានប៉ុន្មានជំហ៊ានផង ខណៈមិនបានពន្លត់ម៉ាស៊ីនស្រាប់តែជននោះស្ទុះចូលទៅបើករត់តែម្ដង តែត្រូវកម្លាំងរបស់លោកតាមស្ទាក់ក្របួចជាប់ភ្លាមៗដែរ ។ បើតាមការរៀបរាប់របស់ម្ចាស់រថយន្តឈ្មោះ ហួយ គឹមហ៊ន ដែលនិយាយប្រាប់សមត្ថកិច្ចថា គាត់បានបើករថយន្តទៅឈប់នៅចំណុចកើតហេតុ ដើម្បីទៅរកទិញគ្រឿងបន្លាស់ត្រាក់ទ័រ តែពេលទៅដល់គាត់មិនបានពន្លត់រថយន្តទេ ដោយគិតថា ចូលទិញមិនយូរ ។
ប៉ុន្តែពេលគាត់បើកទ្វារចុះដើរចេញពីរថយន្តបានប៉ុន្មានប៉ុណ្ណោះ ស្រាប់តែជនខាងលើ មិនដឹងដើរមកពីណា បានស្ទុះចូលទៅបើករថយន្តគាត់ចេញយ៉ាងលឿនទៅបាត់ ហើយគាត់ក៏បានប្ដឹងទៅសមត្ថកិច្ចឲ្យជួយអន្តរាគមន៍ រហូតស្ទាក់ចាប់បានភ្លាមៗដែរ។ បើតាមប្រវត្តិលោកចោរចិត្តស្លុយនេះ ដោយយោងលើប្រភពនានាថា ជនឈ្មោះ ហួន សុខហេង នេះជាព្រូរថយន្តដឹកទំនិញ មកពីខេត្តកំពង់ចាម ហើយទុករថយន្តនោះនៅស្រុកសំពៅលូន។ ប៉ុន្តែគេមិនបានដឹងថា តើជនទុករថយន្តចោលនៅព្រំដែន (ច្រកភ្នំដី) រួចមកកាន់ក្រុងបាត់ដំបង ដើម្បីអ្វីទេ ស្រាប់តែសុខៗ ដើរមកលួចរថយន្តគេបែបនេះ។
ប៉ុន្តែបើតាម លោក ឈឿង គឹមសុង ប្រធានការិយាល័យព្រហ្មទណ្ឌកំរិតស្រាល បានប្រាប់ថា បើពិនិត្យជាក់ស្ដែងលើសកម្មភាពជននេះ ហាក់មានសតិមិនល្អ (ដូចបែកថ្នាំ) ហើយសួរនាំក៏មិនឆ្លើយក្បោះក្បាយដែរ តែបានសារភាពយ៉ាងខ្លីថា ខ្លួនពិតជាបានលួចរថយន្តនោះមែន ហើយក្នុងគោលដៅជិះទៅជួបប្រពន្ធ។ ប៉ុន្តែចម្លើយរបស់ជននេះបែបជាមនុស្សវង្វេងស្មារតី ។
ទោះបីជាយ៉ាងណា លោកបានបញ្ជាក់ថា ដោយយោងលើជននេះបានប្រព្រឹត្តបទល្មើស ដូច្នេះ លោកស្នងការ និងលោកព្រះរាជអាជ្ញាអមសាលាដំបូងខេត្ត បានបញ្ជាឲ្យមន្ត្រីជំនាញកសាងសំណុំរឿងដើម្បីចាត់ការតាមនីតិវិធីហើយ៕
ចែករំលែកព័តមាននេះ