អ្នកនាំពាក្យគណបក្សសង្គ្រោះជាតិ លោក អេង ឆៃអ៊ាង បានមានប្រសាសន៍ប៉ុន្មាននាទីមុននេះថា មេធាវីគណបក្សសង្គ្រោះជាតិ កំពុងរៀបចំឯកសារដើម្បីប្តឹង លោក ស្រី ចំរើន ដែលយកទង់ អាវ
រាជធានីភ្នំពេញ ៖ អ្នកនាំពាក្យគណបក្សសង្គ្រោះជាតិ លោក អេង ឆៃអ៊ាង បានមានប្រសាសន៍ប៉ុន្មាននាទីមុននេះថា មេធាវីគណបក្សសង្គ្រោះជាតិ កំពុងរៀបចំឯកសារដើម្បីប្តឹង លោក ស្រី ចំរើន ដែលយកទង់ អាវ និងមួកមានសញ្ញាសម្គាល់របស់គណបក្សសង្គ្រោះជាតិ ទធ្វើសកម្មភាពអនាធិបតេយ្យគ្មានការអនុញ្ញាត ។
ការលើកឡើងរបស់មន្ត្រីជាន់ខ្ពស់គណបក្សសង្គ្រោះជាតិនៅវិមានរដ្ឋសភា នាព្រឹកថ្ងៃទី៣០ មីនានេះ បានធ្វើឡើងបន្ទាប់ពីក្រុមយុវជននិងនិស្សិតដែលទាមទាររកការពិតពីខ្សែអាត់សំឡេងឆ្លើយឆ្លងរវាងលោក កឹម សុខានិងនារីម្នាក់ ដឹកនាំដោយលោក ស្រី ចំរើន កាលពីរសៀលថ្ងៃទី២៩មីនាម្សិលមិញ បានហែក្បួនដាក់ញ្ញត្តិនៅការិយាល័យឧត្តមស្នងការសហប្រជាជាតិទទួលបន្ទុកសិទ្ឋិមនុស្សប្រចាំកម្ពុជា ទីស្នាក់គណបក្សសង្គ្រោះជាតិ និងទៅផ្ទះលោក កឹម សុខា ដើម្បីសុំអន្តរាគមន៍ទាមទារឲ្យមេបក្សប្រឆាំងរូបនេះឆ្លើយទាក់ទងទៅនឹងខ្សែអាត់សំឡេងឆ្លើយឆ្លង ដែលក្រុមយុវជននេះជឿថាជាសំឡេងឆ្លើយឆ្លងរវាងលោក កឹម សុខា និង ស្រីស្នេហ៍ ហើយការហែក្បួននោះគេឃើញមានទង់ អាវ និងមួកជាសញ្ញាសម្គាល់របស់គណបក្សសង្គ្រោះជាតិ ។
ជាមួយគ្នានោះដែរ ភ្លាមៗបន្ទាប់ពីក្រុមយុវជននិងនិស្សិតខាងលើហែក្បួនដាក់ញ្ញត្តិចប់ គណបក្សសង្គ្រោះជាតិបានចេញសេចក្តីថ្លែងការណ៍ថ្កោលទោស និងថាសកម្មភាពដែលដឹកនាំដោយលោកស្រី ចំរើន ជាអំពើក្លែងបន្លំដោយចេតនាក្នុងបំណងបង្កាច់បង្ខូចកិត្តិយសគណបក្ស និងសមាជិកគណបក្សសង្គ្រោះជាតិ ហើយក៍ជាការរំលោភច្បាប់ស្តីពីកម្មសិទ្ឋិបញ្ញានិងក្រមព្រហ្មទណ្ឌ និងបានប្រកាសរៀបចំសំណុំឯកសារប្តឹងទៅតុលាការនោះថែមទៀត ៕
ចែករំលែកព័តមាននេះ