ក្រោមគ្រោងការណ៍នៃកិច្ចសហប្រតិបត្តិការសេដ្ឋកិច្ចរបស់ជប៉ុន ជំនួយឧបត្ថម្ភឥតសំណងសម្រាប់គម្រោងទ្រង់ទ្រាយតូចសន្តិសុខមនុស្សជាតិ (ជំនួយគូសាណូណិ) រដ្ឋាភិបាលជប៉ុន បានផ្តល់ថវិកាសរុបចំនួន ១៧៧,៨២១ ដុល្លារអាមេរិក ដល់មន្ទីរសាធារណការ និងដឹកជញ្ជូនខេត្តឧត្តរមានជ័យ និងមន្ទីរសាធារណការ និងដឹកជញ្ជូនខេត្តព្រះវិហារ។ កិច្ចសន្យាផ្តល់ជំនួយ ត្រូវបានចុះហត្ថលេខា
ក្រោមគ្រោងការណ៍នៃកិច្ចសហប្រតិបត្តិការសេដ្ឋកិច្ចរបស់ជប៉ុន ជំនួយឧបត្ថម្ភឥតសំណងសម្រាប់គម្រោងទ្រង់ទ្រាយតូចសន្តិសុខមនុស្សជាតិ (ជំនួយគូសាណូណិ) រដ្ឋាភិបាលជប៉ុន បានផ្តល់ថវិកាសរុបចំនួន ១៧៧,៨២១ ដុល្លារអាមេរិក ដល់មន្ទីរសាធារណការ និងដឹកជញ្ជូនខេត្តឧត្តរមានជ័យ និងមន្ទីរសាធារណការ និងដឹកជញ្ជូនខេត្តព្រះវិហារ។ កិច្ចសន្យាផ្តល់ជំនួយ ត្រូវបានចុះហត្ថលេខានៅថ្ងៃនេះ ដោយឯកឧត្តម គូម៉ាម៉ារ៉ូ យូជិ ឯកអគ្គរាជទូតជប៉ុនប្រចាំព្រះរាជាណាចក្រកម្ពុជា និងអ្នកតំណាងស្ថាប័នទទួលជំនួយទាំងពីរសម្រាប់គម្រោងដូចតទៅ៖
១-គម្រោងសាងសង់ស្ពានដងទង់ ក្នុងស្រុកសំរោង ខេត្តឧត្តរមានជ័យ (ថវិកាចំនួន៩០,៣៥០ ដុល្លារអាមេរិក) អង្គភាពទទួលជំនួយ៖ មន្ទីរសាធារណការ និងដឹកជញ្ជូនខេត្តឧត្តរមានជ័យ ។
គម្រោងទីមួយនេះ នឹងធ្វើការសាងសង់ស្ពានបេតុងមួយ នៅក្នុងស្រុកសំរោង ខេត្តឧត្តរមានជ័យ។ គម្រោងនេះ ត្រូវបានរំពឹងថា នឹងផ្តល់អត្ថប្រយោជន៍យ៉ាងធំធេងដល់ប្រជាពលរដ្ឋប្រមាណជា ៣,៤០០នាក់ នៅក្នុងតំបន់។ ស្ពានបេតុងថ្មីនេះ ក៏ត្រូវបានរំពឹងផងដែរថា នឹងផ្តល់ភាពងាយស្រួលកាន់តែប្រសើរដល់ប្រជាពលរដ្ឋ ក្នុងការធ្វើដំណើរទៅកាន់សាលារៀន មន្ទីរពេទ្យ និងផ្សារ ព្រមទាំងជួយសម្រួលក្នុងការដឹកជញ្ជូនផលិតផលកសិកម្មនានាជាដើម។
២-គម្រោងកែលម្អផ្លូវ ក្នុងឃុំឆែបពីរ ស្រុកឆែប ខេត្តព្រះវិហារ (ថវិកាចំនួន ៨៧,៤៧១ ដុល្លារអាមេរិក) អង្គភាពទទួលជំនួយ៖ មន្ទីរសាធារណការ និងដឹកជញ្ជូនខេត្តព្រះវិហារ ។
គម្រោងទីពីរនេះ នឹងធ្វើការសាងសង់ផ្លូវគ្រួសក្រហមមួយខ្សែប្រវែង ៤,០០០ម៉ែត្រ និងលូចំនួន៦ ក្នុងឃុំឆែបពីរ ស្រុកឆែប ខេត្តព្រះវិហារ។ គម្រោងនេះ ត្រូវបានរំពឹងថា នឹងផ្តល់អត្ថប្រយោជន៍ជូនដល់ប្រជាពលរដ្ឋប្រមាណជា ៣,២០០នាក់ នៅក្នុងតំបន់។ ផ្លូវក្រួសក្រហមថ្មីនេះ ក៏ត្រូវបានរំពឹងផងដែរថា នឹងផ្តល់ភាពងាយស្រួលជាងមុនដល់ប្រជាពលរដ្ឋ ក្នុងការធ្វើដំណើរពីភូមិមួយទៅភូមិមួយ ដែលស្ថិតនៅក្នុងឃុំគោលដៅ និងពីភូមិគោលដៅនានាទៅកាន់ផ្លូវជាតិផងដែរ ជាពិសេសគឺនៅក្នុងរដូវវស្សា។
ជំនួយឥតសំណងគូសាណូណិរបស់ជប៉ុន បានចាប់ផ្តើមនៅប្រទេសកម្ពុជានៅឆ្នាំ១៩៩១ ដើម្បីគាំទ្រដល់កិច្ចខិតខំប្រឹងប្រែងរបស់កម្ពុជាក្នុងការអភិវឌ្ឍ និងស្ថាបនាប្រទេសឡើងវិញនៅតាមកម្រិតមូលដ្ឋាន។
គម្រោងជំនួយនេះ មានទិសដៅការពារជនងាយរងគ្រោះពីកត្តាមួយចំនួនដូចជា ភាពក្រីក្រ និងភាពអកុសល ដែលអាចគំរាមកំហែងដោយផ្ទាល់ដល់ជីវភាពរស់នៅ ការចិញ្ចឹមជីវិត និងសេចក្តីថ្លៃថ្នូររបស់ពួកគេ ក៏ដូចជាជួយជំរុញនូវភាពម្ចាស់ការលើខ្លួនឯងរបស់ប្រជាសហគមន៍។ ចាប់តាំងពីឆ្នាំ១៩៩១ រដ្ឋាភិបាលជប៉ុនបានផ្តល់ថវិកាជាង៥៥លានដុល្លារអាមេរិកដល់អាជ្ញាធរមូលដ្ឋាន និងអង្គការក្រៅរដ្ឋាភិបាល ដើម្បីអនុវត្តគម្រោងគូសាណូណិចំនួន៥៥៤ គម្រោងនៅទូទាំងប្រទេស៕
ចែករំលែកព័តមាននេះ