រាជធានីភ្នំពេញ ៖ ថ្ងៃទី២៨ មីនា ទីស្តីការគណៈរដ្ឋមន្ត្រី សារមន្ទីរ Denver Art Museum (សារមន្ទីរ DAM) និងព្រះរាជាណាចក្រកម្ពុជា បានប្រកាសថា សារមន្ទីរ DAM បានប្រគល់រូបបដិមាខ្មែរធ្វើពីថ្មភក់នាសតវត្សទី១០ មកឲ្យប្រទេសកម្ពុជាវិញ ។ រូបបដិមាដងខ្លួនព្រះរាមនេះត្រូវបានដាក់តាំងក្នុងសារមន្ទីរអស់រយៈពេលជិត៣០ឆ្នាំ ។ ក្នុងអំឡុងពេលនៃការស្រាវជ្រាវពីរូបបដិមានេះ និងបន្ទាប់ពីការពិភាក្សាជាមួយសហការីនៅប្រទេសកម្ពុជា សារមន្ទីរ DAM បានដឹងនូវអង្គហេតុថ្មីស្តីពីប្រភពរបស់រូបបដិមាដែលមិនដឹង នៅពេលសារមន្ទីរទិញរូបបដិមានេះ ។
រូបបដិមាដងខ្លួនព្រះរាម ជារូបចម្លាក់ធ្វើពីថ្មភក់របស់ព្រះរាមដែលមានបំពង់ព្រួញនៅពីក្រោយព្រះអង្សាស្តាំ ។ រូបបដិមាធ្វើឡើងនៅដើមសតវត្សទី១០ មានកម្ពស់៦២អ៊ីញ (ប្រហែល១៥៧សង់ទីម៉ែត្រ) និងនៅបាត់ព្រះកេស ព្រះហស្ថ និងព្រះបាទ ។ សារមន្ទីរ Denver Art Museum បានទិញរូបបដិមាដងខ្លួនព្រះរាម នៅឆ្នាំ១៩៨៦ពី Doris Weiner Gallery នៅទីក្រុងញូវយ៉ក ។ រូបបដិមាដងខ្លួនព្រះរាម ត្រូវបានដាក់តាំងក្នុងសារមន្ទីរផ្នែកសិល្បៈអាស៊ី ។
ជាផ្នែកមួយនៃការស្រាវជ្រាវរបស់យើង សារមន្ទីរ Denver Art Museum បានទាក់ទងទៅសហការីនៃសារមន្ទីរនៅប្រទេសកម្ពុជា ដើម្បីស្វែងរកអង្គហេតុបន្ថែមពីរូបបដិមាដងខ្លួនព្រះរាមនេះ» តាមប្រសាសន៍លោក Christoph Heinrich ប្រធានសារមន្ទីរ Denver Art Museum ។ «ថ្មីៗនេះយើងបានទទួលនូវភស្តុតាងជាក់លាក់ដែលយើងពុំមាននៅពេលទិញរូបបដិមានេះ បន្ទាប់មកបានចាត់វិធានការ ភ្លាមៗដើម្បីដករូបបដិមានេះចេញពីបញ្ជីរបស់យើង និងរៀបចំការបញ្ជូនរូបបដិមានេះត្រលប់ទៅទីឋានកំណើតរបស់ខ្លួន ។
បន្ថែមពីការប្រគល់ត្រឡប់នេះ ក្នុងអំឡុងពេលនៃការចរចា យើងបានបង្កើតនូវទំនាក់ទំនងកិច្ចសហការជាមួយសហការីនៅកម្ពុជា ហើយសង្ឃឹមថានឹងអភិវឌ្ឍន៍គម្រោង ឬកម្មវិធីសហការ ដែលនឹងផ្តល់ផលប្រយោជន៍ដល់អ្នកទស្សនានៅសារមន្ទីរនៅទីក្រុង Denver និងរាជធានីភ្នំពេញ ។
លោក យឹម ណុលសន អនុប្រធានក្រុមប្រឹក្សាសេដ្ឋកិច្ច សង្គមកិច្ច និងវប្បធម៌ តំណាងលោកបណ្ឌិតសភាចារ្យ សុខ អាន ឧបនាយករដ្ឋមន្ត្រី រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី បានសម្តែងនូវការកោតសរសើរចំពោះការប្រគល់ត្រឡប់មកវិញ នៃរូបបដិមាដងខ្លួនព្រះរាមពីសារមន្ទីរ Denver Art Museum និងការផ្តល់នូវឱកាស សម្រាប់ការជួបជុំគ្នាវិញនៃរូបបដិមា ផ្សេងៗដែលស្ថិតនៅប្រាសាទចិន នៃរមណីយដ្ឋានប្រវត្តិសាស្ត្រកោះកេរ ។ លោកក៏បានបន្ថែមទៀតថា «ការប្រគល់ត្រឡប់ដោយស្ម័គ្រចិត្តនៃរូបបដិមានេះ គឺបង្ហាញនូវការគិតគូរបស់សារមន្ទីរ Denver Art Museum ចំពោះសារសំខាន់នៃសម័យកាលកោះកេរចំពោះវប្បធម៌របស់កម្ពុជា ។ ការប្រគល់ត្រឡប់មកវិញនេះ ក៏ឆ្លុះបញ្ចាំងពីការលួចយ៉ាងធ្ងន់ធ្ងរ ដែលបានកើតឡើងនៅប្រទេសយើងកាលពីអតីតកាល ព្រមទាំងបង្ហាញពីកិច្ចខិតខំប្រឹងប្រែងរបស់រដ្ឋាភិបាលក្នុងការទាមទារត្រឡប់មកវិញនូវរូបបដិមាដែលជាផ្នែកមួយនៃដួងព្រលឹងជាតិ ដែលត្រូវបានយកចេញពីប្រទេសកម្ពុជាដោយខុសច្បាប់ ៕
ចែករំលែកព័តមាននេះ