ខេត្តបាត់ដំបង៖ ក្រោយពីមានលិខិតអនាមិកហែកទម្លាយពីរឿងលោក ស៊ុន សុវណ្ណ អធិការស្រុកសង្កែ ឃុបឃិតជាមួយកូនចៅជំនិតមួយចំនួន ប្រព្រឹត្តអំពើពុករលួយនៅក្នុងអង្គភាព ស្នងការការខេត្ត លោក សាត គឹមសាន បានថ្លែងយ៉ាងដូច្នេះថា «ពេលនេះ ខ្ញុំបានដាក់ផែនការនេះ ឱ្យទៅខាងបុគ្គលិកចុះធ្វើការស្រាវជ្រាវលើករណីនេះហើយ»។ លោក សាត គឹមសាន បានបញ្ជាក់តាមទូរស័ព្ទប្រាប់កោះសន្តិភាព កាលពីព្រឹកថ្ងៃទី២៥ តុលា ថា «ខ្ញុំបានទទួលដំណឹងនូវលិខិតអនាមិក ដែលបានសរសេរលាតត្រដាងអំពីរឿងអាស្រូវពុករលួយរបស់លោកអធិការស្រុកសង្កែនោះហើយ។ ហើយពេលនេះ ខ្ញុំបានដាក់ផែនការនេះ ទៅឲ្យខាងបុគ្គលិក ជាអ្នកធ្វើការស្រាវជ្រាវ តែរហូតមកដល់ពេលនេះ ខ្ញុំមិនទាន់ទទូលបានលទ្ធផលយ៉ាងណានៅឡើយទេ»។
សូមបញ្ជាក់ថា លិខិតអនាមិកជាច្រើនសន្លឹក ត្រូវបានគេប្រទះឃើញនៅលើដងផ្លូវ ម្ដុំរង្វង់មូលលោកតាដំបងគ្រញូង ក្នុងក្រុងបាត់ដបង កាលពីព្រឹកថ្ងៃទី២២ តុលា ហើយត្រូវបានគេផ្ញើចែករំលែកបន្តគ្នាតាមរយៈបណ្ដាញសង្គម រហូតដល់ដៃមន្ត្រីនានា នៅក្នុងស្នងការខេត្ត។ គោលបំណង នៃលិខិតនេះសូមគោរពជូន «សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ឯកឧត្តម ឧត្តមសេនីយ៍ទោ សាត គឹមសាន ស្នងការខេត្ត មេត្តាអនុវត្តអភិក្រមទាំង៥ របស់សម្ដេចអគ្គសេនាបតីតេជោ ហ៊ុន សែន»។ លិខិតអនាម៉ឹកនោះ បានសរសេរខ្លឹមសារវាយប្រហារចំៗទៅលើទង្វើមិនប្រក្រតីរបស់លោក ស៊ុន សុវណ្ណ អថិការស្រុកសង្កែ និង លោក ហៀង យ៉ុងហុង អធិការរង ទទូលបន្ទុកសេនាធិការ ដែលគេអះអាងមន្ត្រីទាំង០២រុបនេះ បានរួមដៃគ្នាប្រព្រឹត្តអំពើពុករលួយពេញអង្គភាព។
យោងខ្លឹមសារតាមរយៈលិខិតអនាមិកដែលកោះសន្តិភាពទទូលបាន បានហែកកកាយនិងបានចង្អុលចំៗទៅលើ លោក ស៊ុន សុវណ្ណ អធិការស្រុកសង្កែ និងលោក ហៀង យ៉ុងហុង អធិការរងទទូលបន្ទុកសេនាធិការថា «បានរួមគំនិតគ្នាប្រព្រឹត្តអំពើពុករលួយបក្សពួកនិយម តម្លើងឋានន្តរស័ក្ដិទារលុយពីកូនចៅក្រោមឱវ៉ាតរបស់ខ្លួន ឲ្យមន្ត្រីអសកម្មមិនមកធ្វើការបើកប្រាក់ខែរដ្ឋ និង កាប់ទន្ទ្រានដីព្រៃលិចទឹកនៅតំបន់៣ របស់រដ្ឋក្នុងឃុំកំពង់ព្រៀង ស្រុកសង្កែ ធ្វើជាកម្មសិទ្ធរបស់ខ្លួន»។ លិខិតអនាមិកនេះ បានលាតត្រដាងទៀងថា «ដោយសារតែទង្វើបែបនេះរបស់លោកអធិការ ទើបធ្វើឲ្យមន្ត្រីមួយចំនួននៅក្នុងអង្គភាពមានសតិអារម្មណ៍មិនល្អ បណ្ដាលឲ្យគ្មានវិន័យក្នុងអង្គភាព ចំពោះការដឹកនាំរបស់លោកទាំង០២នាក់នេះ»។ លិខិតអនាមិកនេះ បានលាតត្រដាងឈ្មោះ និង អត្តលេខច្បាស់លាស់ចំពោះមន្ត្រីអសកម្ម និង មន្ត្រីខិលខូចជាច្រើនរូបនៅក្នុងអង្គភាពផងដែរ។
បើយោងលើលិខិតនេះ បានបង្ហាញឈ្មោះមន្ត្រីចំនួន០៨នាក់ ដែលអសកម្មមិនដែលឃើញមុខចូលធ្វើការ តែមានវត្តមានចុះក្នុងបញ្ជីវត្តមានរាល់ថ្ងៃ ហើយថែមទាំងបានបើកប្រាក់យ៉ាងទៀងទាត់ទៀតផង។ ដោយឡែក មន្ត្រីចំនួន០៥រូបទៀត ក៏ត្រូវបានលិខិតនេះ លាតត្រដាង និងចោទថា លោក ស៊ុន សុវណ្ណ និងលោក ហៀង យ៉ុងហុង ឃុំឃិតគ្នាស្ងាត់ៗ រៀបចំផ្លាស់ប្ដូរតួនាទីមន្ត្រីទាំង០៥រូបនេះ ពីផ្នែកមួយ ទៅផ្នែកមួយដោយគ្មានការឯកភាពពីថ្នាក់ដឹកនាំតាមផ្នែកជំនាញឡើយ និងខុសពីសេចក្ដីសម្រេចរបស់ថ្នាក់លើ(របៀបបក្សពួក)។
ពាក់ព័ន្ធនឹងការចោទប្រកាន់ពីលិខិតអនាមិកគ្មានប្រភពច្បាស់លាស់ខាងលើនេះ កោះសន្តិភាពមិនទាន់អាចទំនាក់ទនង សុំការប្រតិកម្មបំភ្លឺតបពីលោកស៊ុន សុវណ្ណ អធិការស្រុកសង្កែ និង លោក ហៀង យ៉ុងហុង អធិការរង បាននៅឡើយទេ គិតត្រឹមម៉ោង១និង៣០នាទីរសៀលថ្ងៃទី ២៥ តុលា។ យ៉ាងណាក្ដី បើយោងលើការពិនិត្យលើខ្លឹមសារ ដែលលិខិតអនាមិកបានលាតត្រដាង គឺ គេបានដាក់ការសង្ស័យថា សំណុំរឿងដ៏អាស្រូវនេះ ទំនងផ្ទុះចេញពីផ្ទៃក្នុង នៅក្នុងអង្គភាព ដែលមន្ត្រីមួយចំនួនមិនសប្បាយចិត្ត ស៊ូទ្រាំមិនបានទៅនឹងទង្វើដ៏អាក្រក់របស់លោកអធិការ និង លោកអធិការរង ដែលបានរួមដៃគ្នាប្រព្រឹត្តអំពើពុករលួយ ប្រកាន់បក្សពួក និងកៀបសង្កត់ទៅលើមន្ត្រីក្រោមឱវាទយ៉ាងអយុត្តិធម៌ ។
គេកំពុងរង់ចាំមើលចំណាត់ការរបស់លោកស្នងការខេត្ត និងថ្នាក់ដឹកនាំ តើមានចំណាត់ការបែបណាចំពោះលោកអធិការស្រុកសង្កែ និងលោកអធិការរង តាមបណ្ដឹងរបស់ជនអនាម៉ឹក ដែលសរសេរលិខិតយកទៅបោះចោលលើដងផ្លូវ ដើម្បីឲ្យមហាជនបានឃើញនេះ ? ប៉ុន្តែលោកស្នងការបានបញ្ជាក់ហើយថា ពេលនេះ ដំណើរការស៊ើបអង្កេត បាននិងកំពុងដំណើរការហើយ៕
ចែករំលែកព័តមាននេះ