រាជធានីភ្នំពេញ ៖ កូនប្រុសច្បងសម្តេចតេជោនាយករដ្ឋមន្ត្រី ហ៊ុន សែន លោក ហ៊ុន ម៉ាណែត បានសម្រេចចូលរួមពិធីបុណ្យចូលឆ្នាំខ្មែរនៅសហរដ្ឋអាមេរិក តែមិនចូលរួម…
រាជធានីភ្នំពេញ ៖ កូនប្រុសច្បងសម្តេចតេជោនាយករដ្ឋមន្ត្រី ហ៊ុន សែន លោក ហ៊ុន ម៉ាណែត បានសម្រេចចូលរួមពិធីបុណ្យចូលឆ្នាំខ្មែរនៅសហរដ្ឋអាមេរិក តែមិនចូលរួមក្នុងពិធីព្យុហយាត្រាទេ ដើម្បីចៀសវាងហេតុការណ៍ណាមួយដែលធ្វើឱ្យអាប់ឱនដល់មុខមាត់ជាតិ ។
លោក ហ៊ុន ម៉ាណែត បានបញ្ជាក់នៅលើសង្គមហ្វេសប៊ុកផ្ទាល់ខ្លួននាថ្ងៃទី២៧ ខែមីនា ថា «ខ្ញុំនិងបងប្អូនក្រុមការងារ នឹងទៅចូលរួមកម្មវិធីផ្សេងៗឆ្លើយតបទៅនឹងការអញ្ជើញរបស់បងប្អូនខ្មែរដែលរស់នៅតាមបណ្តារដ្ឋនានានៅសហរដ្ឋអាមេរិក ដើម្បីអបអរពិធីបុណ្យចូលឆ្នាំថ្មីជាលក្ខណៈមហាគ្រួសារខ្មែរតែមួយ ។ ក្នុងពេលទស្សនកិច្ចនោះផងដែរ ខ្ញុំនិងបងប្អូនរួមដំណើរក៏ត្រូវបានអញ្ជើញឱ្យចូលរួមក្នុងពិធីព្យុហយាត្រាវប្បធម៌នៅទីក្រុងឡងប៊ិច ក្នុងគោលបំណងរួមគ្នាដើម្បីលើកស្ទួយវប្បធម៌និងកិតិ្តយសជាតិរបស់យើង ។ ខ្ញុំសម្រេចចិត្តទទួលយល់ព្រមចូលរួមក្នុងពិធីនេះ តាមការអញ្ជើញរបស់គណៈកម្មាធិការបុរីកម្ពុជា គឺដើម្បីបង្ហាញការគាំទ្រយ៉ាងពេញទំហឹងរបស់ខ្ញុំ ចំពោះគោលគំនិតដ៏ល្អរបស់គណៈកម្មាធិការ ដែលចង់ឃើញខ្មែររួបរួមគ្នា ដោយមិនប្រកាន់ទីកន្លែងរស់នៅ (នៅអាមេរិក នៅស្រុកខ្មែរ ឬនៅប្រទេសណាទេ) និន្នាការនយោបាយ សាសនា ដើម្បីលើកស្ទួយកិត្តិយសជាតិខ្មែរនៅលើឆាកអន្តរជាតិក្នុងឱកាសដ៍ពិសេសនេះ» ។
លោក ហ៊ុន ម៉ាណែត លើកឡើងថា ក្នុងឆ្នាំ២០១០ ក៏ធ្លាប់មានការអញ្ជើញលោក កឹម សុខា ចូលរួមក្នុងពិធីនោះ ហើយលោក ក៏បានដឹកនាំក្រុមការងារចូលរួមផងដែរ ។
ជាការសោកស្តាយណាស់ ក្រោយពីខ្ញុំនិងក្រុមការងារបានសម្រេចចិត្តទទួលការអញ្ជើញរបស់អ្នករៀបចំកម្មវិធីព្យុហយាត្រា ក៏មានការរៀបចំនិងបំផុសឱ្យប្រឆាំងការចូលរួមនេះ ដោយសកម្មជនពីររូបរបស់គណបក្សសង្គ្រោះជាតិ គឺលោក ទូច វិបុល (Touch Vibol) និងលោក ប្រាឌី ណុយ យ៉ាំង (Brady Nuy Young) ដោយបានបំផុសថា ការចូលរួមរបស់ខ្ញុំក្នុងពិធីព្យុហយាត្រានេះ គឺដើម្បីឃោសនាឱ្យគណបក្សប្រជាជនកម្ពុជា ។
អ្នកទាំងពីរបានគំរាមថា នឹងរៀបចំបាតុកម្មប្រឆាំងខ្ញុំនិងក្រុមការងារ នៅពេលព្យុហយាត្រាវប្បធម៌ និងរៀបចំគម្រោងដើរតាមធ្វើបាតុកម្មប្រឆាំងនៅគ្រប់ទីកន្លែង ដែលបងប្អូនសហគមន៍ខ្មែរនៅសហរដ្ឋអាមេរិកមានគម្រោងរៀបចំកម្មវិធីជួបជុំគ្នា ដើម្បីសប្បាយរីករាយ អបអរសាទរបុណ្យចូលឆ្នាំថ្មីជាលក្ខណៈមហាគ្រួសារខ្មែរ ហើយដែលបានអញ្ជើញខ្ញុំ និងក្រុមការងារចូលរួមអបអរសាទរជាមួយគ្នា ។
ក្នុងពេលជាមួយគ្នានេះ ក៏មានប្រជាពលរដ្ឋខ្មែរជាច្រើនបានចេញមកធ្វើការការពារ និងស្វាគមន៍ការចូលរួមរបស់ខ្ញុំ ដោយលោកគិតថាពេលបុណ្យចូលឆ្នាំថ្មីប្រពៃណីជាតិខ្មែរ ជាពេលដែលយើងគួររួបរួមគ្នា មិនយកខ្មែរណាជាសត្រូវ ទោះមាននិន្នាការនយោបាយខុសគ្នាក៏ដោយ ដើម្បីរួមគ្នាលើកស្ទួយប្រពៃណី វប្បធម៌ និងកិត្តិយសជាតិខ្មែរយើង ។ បងប្អូនបានធ្វើសកម្មភាពតាមច្រើនរូបភាព ដូចជាការដាក់ញត្តិគាំទ្ររបស់ប្រជាពលរដ្ឋខ្មែរជាង២០០នាក់ ដែលរស់នៅក្នុងទីក្រុងឡងប៊ិច និងតំបន់ជុំវិញទៅជូនលោកចៅសង្កាត់ទី៦ នៃទីក្រុងឡងប៊ិច (លោក អាន់ឌ្រូ ឌី) ការចេញឃ្លីបវីដេអូគាំទ្រ តាមហ្វេសប៊ុករបស់បងប្អូនខ្មែរដែលរស់នៅទីក្រុងឡងប៊ិច នៅតាមបណ្តារដ្ឋនានានៅសហរដ្ឋអាមេរិក និងបណ្តាប្រទេសមួយចំនួនទៀត ។
រហូតដល់មានបងប្អូនមួយចំនួនបានប្រកាសថា នឹងរៀបចំប្រមូលគ្នាដើម្បីធ្វើបាតុកម្មប្រឆាំងបាតុកម្ម ដែលគ្រោងរៀបចំដោយក្រុមលោក ទូច វិបុល និងលោក ណុយ យ៉ាំង នៅក្នុងពិធីព្យុហយាត្រានោះផងដែរ ។ ខ្ញុំសូម អរគុណបងប្អូនទាំងអស់ដែលបានគាំទ្រចំពោះការចូលរួមរបស់ខ្ញុំ និងក្រុមការងារក្នុងពិធីព្យុហយាត្រានេះ ។ ប៉ុន្តែដូចដែលខ្ញុំបានសរសេរនៅក្នុងសារដែលបានបង្ហោះរួចមកហើយនៅលើទំព័រហ្វេសប៊ុករបស់ខ្ញុំកាលពីពេលកន្លងទៅនេះ ដែលបានបញ្ជាក់ថា បុណ្យចូលឆ្នាំថ្មីប្រពៃណីជាតិខ្មែរ គឺជាឱកាសពិសេសមួយដែលខ្មែរយើងគួររួបរួមគ្នា មិនប្រកាន់គ្នា ដើម្បីធ្វើការរួមគ្នាលើកស្ទួយជាតិសាសន៍យើង តាមរយៈការរួមគ្នាបង្ហាញអំពីវប្បធម៌ និងអរិយធម៌ដ៏ឧត្តុង្គឧត្តមរបស់ខ្មែរឱ្យប្រជាជនអាមេរិក និងជាតិសាសន៍ដទៃទៀតបានស្គាល់ ។ វាមិនមែនជាពេលវេលាសម្រាប់បង្ហាញសាច់ដុំដាក់គ្នារវាងអ្នកគាំទ្រ និងអ្នកមិនគាំទ្រទេ ដែលនេះបង្ហាញពីការបែកបាក់រវាងខ្មែរនិងខ្មែរ នាំឱ្យជាតិសាសន៍យើងអាប់ឱន ។
លោក ហ៊ុន ម៉ាណែត គូសបញ្ជាក់ថា «ក្នុងស្មារតីជាកូនខ្មែរមួយរូប ខ្ញុំមិនចង់ឃើញនូវភាពល្អក់កករ និងការបែកបាក់រវាងខ្មែរនិងខ្មែរ ជាពិសេសដើម្បីបញ្ចៀសអំពើហិង្សាដែលអាចកើតមានឡើងរវាងអ្នកគាំទ្រនិងអ្នកមិនគាំទ្រក្នុងពេលព្យុហយាត្រា ដែលនាំឱ្យខាតប្រយោជន៍ជាតិសាសន៍យើងទាំងមូល ខ្ញុំនិងក្រុមការងារបានសម្រេចចិត្តមិនចូលរួមក្នុងពិធីព្យុហយាត្រានោះទេ» ៕
ចែករំលែកព័តមាននេះ