កីឡាកររត់ប្រណាំងដ៏ឆ្នើមម្នាក់ ត្រូវខ្មា.ន់កាំភ្លើ.ងផ្តាច់ជីវិត ដោយពុំដឹងមូលហេតុ
អេក្វាឌ័រ ៖ លោក Alex Quinonez កីឡាកររត់ប្រណាំងដ៏ឆ្នើមមួយរូបរបស់ប្រទេសអេក្វាឌ័រ បាត់បង់ជីវិតគួរឱ្យសោកស្តាយបំផុត
អេក្វាឌ័រ ៖ លោក Alex Quinonez កីឡាកររត់ប្រណាំងដ៏ឆ្នើមមួយរូបរបស់ប្រទេសអេក្វាឌ័រ បាត់បង់ជីវិតគួរឱ្យសោកស្តាយបំផុត បន្ទាប់ពីត្រូវខ្មា.ន់កាំភ្លើ.ងបា.ញ់ប្រហារកាលពីថ្ងៃទី២២ ខែតុលា កន្លងទៅ។ នេះបើតាមការចេញពីសារព័ត៌មាន BBC កាលពីថ្ងៃទី២៣ ខែតុលា។
ក្រសួងកីឡាអេក្វាឌ័របានបញ្ជាក់ថា កីឡាករវ័យ៣២ឆ្នាំរូបនេះ ត្រូវបានបា.ញ់ប្រហារនៅខាងក្រៅផ្សារទំនិញមួយកន្លែងក្នុងទីក្រុង Guayaquil ដែលជាស្រុកកំណើតរបស់ខ្លួន។ ខណៈបច្ចុប្បន្នមិនទាន់រកឃើញមូលហេតុដែលឈានដល់ការផ្តាច់ជីវិតកីឡាកររូបនេះនៅឡើយទេ។ ខណៈប៉ូលិសកំពុងដុតដៃដុតជើងស៊ើបអង្កេតលើករណីនេះ។
ទន្ទឹមជាមួយគ្នានោះ លោកប្រធានាធិបតី Guillermo Lasso បានសន្យាថា នឹងវែកមុខអ្នកនៅពីក្រោយការសម្លា.ប់កីឡាករ Quinonez ដើម្បីយកមកផ្តន្ទាទោសតាមច្បាប់។ ដោយលោកបានបង្ហោះសារលើបណ្តាញ Twitter យ៉ាងដូច្នេះថា «យើងមានការសោកស្ដាយយ៉ាងខ្លាំងចំពោះការបាត់បង់ Alex Quinonez ដែលជាឪពុក ជាកូនប្រុស និងជាកីឡារត់ប្រណាំងដ៏អស្ចារ្យម្នាក់។ យើងសូមចូលរួមរំលែកទុក្ខយ៉ាងស្មោះស្ម័គ្រ។ ហើយជនដែលឆក់យកជីវិត Quinonez នឹងមិនរួចខ្លួនឡើយ។ យើងនឹងចាត់វិធានការដោយមានប្រសិទ្ធភាពបំផុតក្នុងរឿងនេះ»។
គួរបញ្ជាក់ថា កីឡាករ Alex Quinonez ត្រូវបានចាត់ទុកជាបេះដូងនៃប្រជាជាតិអេក្វាឌ័រ ដោយបានលើកមុខមាត់ប្រទេសជាតិលើឆាកអន្តរជាតិ តាមរយៈការឈ្នះមេដាយពីព្រឹត្តិការណ៍ធំៗជាច្រើន។ ខណៈកាលពីឆ្នាំ ២០១៩ រូបគេបានឈ្នះមេដាយសំរឹទ្ធលើវិញ្ញាសារត់ចម្ងាយ២០០ម៉ែត្រពីព្រឹត្តិការណ៍ World Championships នៅឯប្រទេសកាតា និងបានធ្វើឱ្យរូបគេក្លាយជាកីឡាកររត់ប្រណាំងអេក្វាឌ័រដំបូងគេ ដែលឈ្នះមេដាយពីព្រឹត្តិការណ៍លំដាប់ពិភពលោក៕
ចែករំលែកព័តមាននេះ